“Ia ani outou i te tahi mea i te Metua ma to ˈu iˈoa, e horoa ˈtu oia.”—Ioane 16:23.

Te faaite papu ra ta Iesu mau parau e te hinaaro ra Iehova ia pure tatou ia ˈna eiaha na roto i te arai o te mau hohoˈa, te mau peata, te mau melahi aore ra te mau tupuna, na roto râ i te iˈoa o Iesu Mesia. Ia pure tatou i te Atua maoti te iˈoa o Iesu, te farii ra ïa tatou i to Iesu tiaraa faufaa roa. Ua parau Iesu: “Aore roa e taata e tae i te Metua ra, na roto noa râ ia ˈu.”—Ioane 14:6.

‘E haamahora hua i to outou aau i mua ia ˈna.’—Salamo 62:8.

Ia pure tatou ia Iehova, e paraparau tatou mai ta tatou e rave i te hoê metua tane î i te here. Eita tatou e faahiti i te mau parau papaihia i roto i te mau buka pure aore ra e tahana noa i te mau parau o te hoê pure ta tatou i tamau aau. E paraparau râ tatou i te Atua ma te tura e ma to tatou aau atoa.

“Noa ˈtu eaha ta tatou e ani ia au i to ˈna hinaaro, e faaroo mai o ˈna.”—Ioane 1, 5:14.

I roto i te Bibilia, te faaite ra Iehova eaha ta ˈna e rave no tatou e eaha ta ˈna e titau mai ra ia rave tatou no ˈna. Ia fariihia ta tatou mau pure e te Atua, e titauhia ia pure tatou “ia au i to ˈna hinaaro.” No te na reira, e titauhia ia tatou ia haapii i te Bibilia ia nehenehe tatou e ite maitai ia ˈna. Ia na reira tatou, e farii oia i ta tatou mau pure.

A pure no to tatou mau hinaaro. E pure tatou i te Atua no to tatou mau hinaaro i te mahana tataitahi mai te maa, te ahu e te nohoraa. E nehenehe atoa tatou e pure no te fanaˈo i te paari no te rave i te mau faaotiraa tano e i te puai no te faaruru i te mau tamataraa. E nehenehe tatou e pure no te faatupu i te faaroo, no te faaore i te hapa e no te fanaˈo i te tauturu a te Atua.—Luka 11:3, 4, 13; Iakobo 1:5, 17.

A pure no vetahi. E oaoa te mau metua o te here ra i ta ratou mau tamarii, ia here atoa ratou te tahi e te tahi. E tamarii tatou na Iehova e te hinaaro nei oia ia anaanatae e ia tâuˈa tatou te tahi e te tahi. Mea tano ia pure tatou no to tatou hoa faaipoipo, no ta tatou mau tamarii, to tatou mau fetii e to tatou mau hoa. “A pure no te tahi e te tahi,” ta Iakobo hoi i papai.—Iakobo 5:16.

A faaite i te mauruuru. Te parau ra te Bibilia no nia i to tatou Atua Poiete: ‘E hamani maitai mai oia, ma te horoa mai i te ûa mai te raˈi mai e te tau auhune, a fanaˈo rahi atu ai tatou i te maa e a oaoa ˈi to tatou aau.’ (Ohipa 14:17) Ia feruri tatou i te mau mea atoa ta te Atua i rave no tatou, e turaihia tatou ia faaite i to tatou mauruuru ia ˈna na roto i te pure. Oia mau, e titau-atoa-hia ia faaite i to tatou mauruuru i te Atua na roto i to tatou huru oraraa.—Kolosa 3:15.

I te tahi mau taime, e inoino tatou no te mea aita te Atua i pahono oioi mai i ta tatou mau pure haavare ore. Te auraa anei e aita te Atua e tâuˈa ia tatou? E ere! A feruri anaˈe i to muri nei mau faatiaraa o te faaite ra i te faufaaraa ia tamau noa i te pure.

Te farii ra o Steve, ta tatou i faahiti i te omuaraa o teie vea: “Mai te peu e aita vau i tamau i te pure, eita ïa vau e oaoa faahou.” Eaha tei tauturu ia ˈna ia taui i to ˈna huru feruriraa? Ua haamata oia i te haapii i te Bibilia e ua ite oia i te faufaaraa o te pure e o te tamau-noa-raa i te na reira. “Te pure nei au i te Atua no te haamauruuru ia ˈna no te tauturu î i te here ta ˈu i fanaˈo maoti to ˈu mau hoa here,” ta Steve ïa i parau. “Mea oaoa aˈe au i teie nei.”

Eaha ta tatou e nehenehe e parau no Jenny, o tei haafaufaa ore ia ˈna iho e o tei manaˈo aita te Atua e tâuˈa ra ia ˈna? Te parau ra o ˈna: “I te mau taime a haafaufaa ore rahi ai au ia ˈu, ua taparu vau i te Atua ia tauturu mai ia taa no te aha vau i haafaufaa ore ia ˈu.” Mea nafea te pure i te tautururaa ia ˈna? “Maoti te pure, ua hiˈo vau ia ˈu mai ta te Atua e rave ra. Ua taa atoa vau e noa ˈtu e faautua mai to ˈu aau, eita Iehova e na reira. Ua tauturu te reira ia ˈu ia tamau noa i te pure.” Te faahopearaa? “Ua tauturu mai te pure ia faariro ia Iehova ei Atua, Metua e ei Hoa mau, î i te here o te aupuru e o te vai noa ra i pihai iho ia ˈu. E tauturu noa mai oia a tamau ai au i te rave i to ˈna hinaaro.”

A hiˈo na i to Isabel tupuraa. I te taime a hapû ai oia, ua parau atu to ˈna taote e e fanau oia i te hoê aiû e maˈi teimaha to ˈna. Ua oti roa o Isabel. Ua faaitoito vetahi ia ˈna ia haamarua i te tamarii. “No te mauiui o to ˈu aau, mai te huru ra e te pohe atura vau.” Eaha ta Isabel i rave? “Ua pure au i te Atua e ua tamau i te pure ia tauturu mai oia ia ˈu.” A maˈiri ai te tau, ua fanau mai oia i te hoê tamaiti, o Gerard te iˈoa, e huma o ˈna. Te manaˈo ra anei Isabel e ua pahono te Atua i ta ˈna pure? Oia mau. Mea nafea ïa? Te parau ra o ˈna: “Ia hiˈo vau i ta ˈu tamaiti e 14 matahiti to ˈna i teie nei, te oaoa ra o ˈna i to ˈna oraraa noa ˈtu to ˈna hapepa, te papu ra ia ˈu e o o ˈna te pahonoraa maitai roa ˈˈe i ta ˈu mau pure, ta Iehova haamaitairaa rahi aˈe ia ˈu.”

Te haamanaˈo mai ra teie mau parau hohonu i ta te papai Salamo i faahiti: “Ua faaroo mai oe, e Iehova, i te hinaaro o tei ati ra! ua haapapu oe i to ratou aau, ua faaroo to tariˈa.” (Salamo 10:17) E ere anei e mau tumu nehenehe mau teie no te tamau i te pure?

Te vai ra i roto i te Bibilia e rave rahi pure a Iesu. Hoê râ tei matau-maitai-hia, te pure ïa ta ˈna i haapii i ta ˈna mau pǐpǐ. Eaha ta tatou e haapii mai?