A tamau i te pure no te fanaˈo i te farii maitai a te Atua
Ua horoa te Atua na te taata i te hoê ô taa ê roa, o te paraparauraa ïa ia ˈna e te faaiteraa i to ratou mau huru aau na roto i te pure. Ua pure hoi te peropheta Davida: “E tei faaroo i te pure ra, e tae atoa mai te taata atoa ia oe ra.” (Salamo 65:2) E nafea tatou e pure ia faaroohia mai e ia haamaitaihia mai e te Atua?
A PURE MA TE HAEHAA E MA TO AAU ATOA
A faaite i to oe mau huru aau atoa na roto i te ‘hohoraraa i to aau i mua ia Iehova.’ (Salamo 62:8) Mea au roa na te Mana hope ia pure te taata ia ˈna ma to ratou aau atoa.
A PURE I TE ATUA MA TE FAAHITI I TO ˈNA IˈOA
Noa ˈtu e rave rahi tiaraa iˈoa to te Atua, te vai ra râ to ˈna iho iˈoa. “O vau o Iehova, o to ˈu ïa iˈoa.” (Isaia 42:8) Hau atu 7 000 taime e itehia te iˈoa Iehova i roto i te Bibilia. E rave rahi peropheta tei faahiti i te iˈoa o te Atua ma te tura ia pure ratou ia ˈna. Ua parau Aberama: “E te Fatu, e Iehova, eaha ta oe e ho mai no ˈu, teie hoi au a pohe ma te tamarii ore.” (Genese 15:2) Ia faaohipa atoa ïa tatou i te iˈoa o te Atua, Iehova, ia pure anaˈe tatou.
A PURE NA ROTO I TO OE IHO REO
Te taa ra i te Atua i to tatou mau manaˈo e mau huru aau noa ˈtu eaha te reo ta tatou e paraparau ra. Te haapapu mai ra ta ˈna Parau: “E ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.”—Ohipa 10:34, 35.
Teie râ, ia haamaitaihia mai tatou e te Atua, e titauhia ia rave hau atu i te pure-noa-raa. I roto i to muri nei mau tumu parau, e hiˈopoa mai tatou eaha te tia ia rave.
E au atoa outou . . .
TA TE FEIA APÎ E UIUI NEI
No te aha ia pure au?
Ua riro anei te pure ei ravea no te maitai mai aore ra mai te tahi mea faufaa ˈtu â?
TE PAHONO RA TE BIBILIA
Ia pure au i te Atua e tauturu mai anei oia?
Te tâuˈa ra anei te Atua ia fifi tatou?
TE PAHONO RA TE BIBILIA
Eaha te mau mea e pure ai tatou?
E ite mai oe te tâuˈa ra te Atua i to oe mau fifi.
