• Filifili ne te Atua. “Ko oti ne fakasopo ne au taku tupu . . . ka tuku atu ne au a atufenua mo fai tou tofi kae ko te lalolagi kātoa ka tuku atu ma koe.”—Salamo 2:6, 8.

• Se sui tupu mai te gafa o te Tupu ko Tavita. “E isi se tamaliki ne fanau mō tatou, se tamaliki tagata ne tuku mai ki a tatou.  . . Ka seai se gatamaiga o te gasoloakaga o tena pulega mo te filemu, i luga i te nofogaaliki o Tavita mo tena malo ko te mea ke faka‵mautakitaki  . . . te mea tenā.”—Isaia 9:6, 7.

• Fanau mai i Peteleema. “E Peteleema . . . , ka vau mai i a koe se tino mō oku telā ka fai mo pule . . . a tena sili ka oko atu ki koga katoa o te lalolagi.”—Mika 5:2, 4.

• ‵Teke a tāgata ki a ia kae fakasauagina. “Ne takalialiagina a ia kae ne ‵kilo atu tatou ki a ia e pelā me e se taulia. . . . Ne velo a ia mō ‵tou amioga solitulafono; ne tuki pala a ia mō ‵tou mea ‵se.”—Isaia 53:3, 5.

• Fakatu aka mai te mate kae faka‵malugina. “Ka se tuku tiaki ne koe au i te Tanuga. Ka se talia ne koe a tau tino fakamaoni ke lavea ne ia te lua. . . . E maua faeloa te fiafia i tou lima fakaatamai ki te se-gata-mai.”—Salamo 16:10, 11.

E tokotasi fua te tino mai tino i tala fakasolopito katoa, e fetaui ‵lei mo fakamatalaga konei ke fai mo Pule, kae ko te tino tenā ko Iesu Keliso. A te tonuga loa, ne fai atu se agelu ki a Malia, te mātua o Iesu: “Ka tuku atu ne [te Atua] ki a ia te nofogaaliki o Tavita, tena tamana, . . . kae ka seai se gataga o tena Malo.”—Luka 1:31-33.

Ne seki fai eiloa a Iesu pelā me se pule i tena nofoga i te lalolagi. Kae ka pule mai a ia ki tino mai te lagi e pelā me ko te Tupu o te Malo o te Atua. Kaia e fetaui ‵lei ei a ia ke fai mo Pule? Mafaufau ki mea ne fai ne Iesu kae koi nofo ei i te lalolagi.

•   Ne atafai a Iesu ki tino. Ne fesoasoani a Iesu ki tāgata mo fāfine, tama‵liki mo tino ma‵tua, faitalia a koga ne ‵tupu mai ei latou mo olotou tulaga i te olaga. (Mataio 9:36; Maleko 10:16) I te taimi ne fakamolemole atu ei se tagata lepela penei: “Kafai e manako koe ki ei, e mafai o fai ne koe au ke ‵ma,” ne otia te loto o Iesu kae faka‵lei ne ia tou tagata.—Maleko 1:40-42.

• Ne akoako ne Iesu a tatou ki te auala ke fakafiafia ei te Atua. Ana muna: “E se mafai o tavini koutou ki te Atua fakatasi mo Koloa.” Ne fai mai foki a ia me e ‵tau o fai ne tatou ki nisi tino a mea kolā e ma‵nako tatou ke fai mai ki a tatou—se fakatakitakiga telā ko taku pelā me ko te Tulafono Aulo. E se gata i ei, ne fakaasi mai foki ne ia me i te Atua e fiafia ki ‵tou mea e fai kae penā foki loa mo mea e mafau‵fau tatou ki ei mo ‵tou lagonaga. Tela la, ke fakafiafia te Atua, e ‵tau o pule faka‵lei atu tatou ki ‵tou lagonaga ‵loto. (Mataio 5:28; 6:24; 7:12) Ne faka‵mafa mai ne Iesu me i te fiafia tonu e maua māfai e tauloto tatou ki mea e manako te Atua ke fai ne tatou kae fai foki a mea konā.—Luka 11:28.

• Ne akoako ne Iesu te auala ke fakaasi atu te alofa. Ne ma‵losi ‵ki a pati mo faifaiga a Iesu kae ne otia ei a loto o ana tino fakalogo‵logo. “Ne ofo masei te vaitino i te auala ne akoako atu ei a ia, me ne akoako atu ne ia latou e pelā me se tino e isi sena pule.” (Mataio 7:28, 29) Ne akoako atu a ia ki a latou: “A‵lofa ki otou fili.” Ne ‵talo foki a ia mō latou kolā ne tamate ne latou a ia: “Tamana, fakamagalo atu latou, me e se iloa ne latou te lotou mea tenei e fai.”—Mataio 5:44; Luka 23:34.

Ko Iesu eiloa te tino e fetaui ‵lei ke fai mo Pule ‵lei ki te lalolagi, e toka a ia o fesoasoani kae atafai. Ko te taimi fea ka kamata ei o pule mai a ia?