Kasi Baibolo Likuti Wuli pa Nkhani ya Kumalizga Munthu Uyo Wakhala Pasingo Pera?

JULANI

Ivyo Baibolo likuyowoya

Baibolo likuyowoya mwakudunjika yayi pa nkhani ya kumalizga munthu uyo wakhala pasingo pera. a Kweni ivyo likuyowoya pa nkhani ya nyifwa na umoyo, vikutovwira kumanya ivyo tikwenera kuchita. Baibolo likukana kukoma munthu, kweniso palije dango lakuti titalikiskenge umoyo wa munthu uyo wakhala pasingo pera.

Baibolo likuti Chiuta ni Mlengi withu, kung’anamura kuti ndiyo ‘ntchisimi cha umoyo.’ (Salimo 36:9; Milimo 17:28) Chiuta wakuwona kuti umoyo ngakuzirwa chomene, lekani wakukana kukoma munthu panji kujikoma. (Ekisodo 20:13; 1 Yohane 3:15) Baibolo likutiphaliraso kuti tikwenera kuvikilira umoyo withu kweniso wa ŵanyake. (Dotoronome 22:8) Ivi vikulongora kuti Chiuta wakukhumba kuti tizirwiskenge chomene umoyo uwo ntchawanangwa.

Wuli para munthu wakhala pasingo pera?

Baibolo likuzomerezga yayi kukoma munthu nanga vingaŵa kuti wachilenge yayi. Chiyelezgero pa nkhani iyi, ni ivyo vikachitikira Themba Sauli. Apo Sauli wakapwetekeka chomene ku nkhondo, wakapempha wakumuyeghera vilwero kuti wamumalizge waka. (1 Samuyeli 31:3, 4) Kweni wakuyegha vilwero wakakana. Kweni paumaliro munthu munyake wakamumalizgiska Sauli. Pakuti Davide wakawonanga umoyo umo Chiuta wakuwuwonera, wakati munthu uyu wali na mulandu wa ndopa.—2 Samuyeli 1:6-16.

Kasi ntchakwenelera kutalikiska umoyo wa munthu?

Para vikuwonekerathu kuti vyaumoyo palije, Baibolo likuzomerezga yayi kutalikiskako umoyo wa munthu uyu. Kweni ivyo Baibolo likuyowoya vingatovwira. Nyifwa ni mulwani withu mukuru, ndipo tikufwa chifukwa ndise ŵakwananga. (Ŵaroma 5:12; 1 Ŵakorinte 15:26) Nangauli palije munthu uyo wakukhumba kufwa, kweni tikwenera yayi kopa nyifwa chifukwa Chiuta walayizga kuti wazamuwuska ŵabali ŵithu awo ŵali kufwa. (Yohane 6:39, 40) Munthu uyo wakuchindika umoyo wakupenja wovwiri wakwenelera. Kweni ivi vikung’anamura kuti tikwenera yayi kusankha munkhwala wakutalikiska umoyo para takhala pasingo pera.

Kasi kujikoma ni zakwananga zambura kugowokereka?

Yayi, Baibolo lindayowoyepo kuti munthu uyo wajikoma wangagowokereka yayi. Nangauli kujikoma ni mulandu ukuru, b kweni Chiuta wakupulikiska kuti ŵanyake ŵangajikoma chifukwa cha kufuntha, kusuzgika chomene maghanoghano, kweniso chifukwa chakuti ni vyakumutundu. (Salimo 103:13, 14) Chiuta wali kupeleka Baibolo ndipo likupembuzga awo ŵakusuzgika maghanoghano. Baibolo likuti “kuzamuŵa chiwuka cha ŵarunji na ŵambura urunji.” (Milimo 24:15) Ivi vikulongora kuti ŵanthu ŵanyake awo ŵali kuchita zakwananga zikuru nga kujikoma, ŵazamuwuka.

a Dikishonale yinyake yikuti “kumalizga umoyo wa munthu uyo wakhala pasingo pera, chikung’anamura kukoma munthu uyo walwara panji wapwetekeka chomene kuti waleke kutambura.” (Merriam-Webster Learner’s Dictionary) Madokotala ghakupeleka munkhwala kwa munthu uyo wakhala pasingo pera kumovwira kuti wafwe luŵiro.

b Baibolo likuzunura ŵanthu ŵanyake awo ŵakajikoma ndipo Chiuta wakakondwa yayi.—2 Samuyeli 17:23; 1 Mathemba 16:18; Mateyu 27:3-5.