Kwananga kwambura kugowokereka ni para munthu wakulutilira kuchita viheni ivyo vingapangiska kuti Chiuta waleke kumugowokera. Kasi vyanthena vingachitika wuli?

 Chiuta wakugowokera awo ŵalapa zakwananga zawo, na kwamba kulondezga fundo zake mu umoyo wawo, kweniso para ŵakulongora chipulikano mwa Yesu Khristu. (Milimo 3:19, 20) Ndipouli, nyengo zinyake munthu wangaŵikapo mtima pakuchita kwananga mwakuti wangasinthaso yayi. Munthu wanthena Baibolo likuti wali na “mtima uheni” kweniso ‘wanonopeska mtima wake na nkhongono yakupusika ya kwananga.’ (Ŵahebere 3:12, 13) Nga ni m’phika uwo ŵawuwotcha pa moto ndipo ŵangausinthaso yayi, mtima wa munthu wanthena ukuŵa kuti ungasinthaso yayi. (Yesaya 45:9) Palije chifukwa chakupulikikwa makora chakugowokelera munthu wanthena, chifukwa zakwananga zake ni zakuti zingagowokereka yayi.​—Ŵahebere 10:26, 27.

 Ŵalongozgi ŵa chisopa cha Chiyuda ŵa mu nyengo ya Yesu ŵakachita kwananga kwambura kugowokereka. Ŵakamanyanga makora kuti mzimu utuŵa wa Chiuta ndiwo ukamovwiranga Yesu kuchita minthondwe, ndipouli ŵakayowoyanga kuti nkhongono zake zikufuma kwa Satana Dyabulosi.—Mariko 3:22, 28-30.

Zakwananga izo zingagowokereka

•  Kuyuyura Chiuta chifukwa chakuleka kumumanya makora. Mpositole Paulosi pakwamba wakayuyuranga Chiuta, kweni pamanyuma wakayowoya kuti: “Wakanilongora lusungu chifukwa nkhachitanga kwambura kumanya kanthu ndipo nkhaŵavya chipulikano.”—1 Timote 1:13.

•  Uzaghali. Baibolo likuzunurapo vya ŵanyake awo ŵakachitapo uzaghali kweni pamanyuma ŵakasintha ndipo Chiuta wakaŵagowokera.—1 Ŵakorinte 6:9-11.

“Kasi nachita kwananga kwambura kugowokereka?”

 Para mukuvitinkha chomene ivyo mukachitanga kale ndipo mukukhumba nadi kusintha, mbwenu mwachita kwananga kwambura kugowokereka yayi. Chiuta wangamugowokerani nanga vingaŵa kuti mwachita kwananga mwakuwerezgawerezga, chikuru mundanonopeskerethu mtima winu.​—Yesaya 1:18.

 Ŵanthu ŵanyake ŵakuwona kuti ŵachita kwananga kwambura kugowokereka chifukwa chakuti njuŵi yikuŵasuzga chomene. Ndipouli, Baibolo likuti ni nyengo zose yayi apo mtima withu ungatovwira. (Yeremiya 17:9) Chiuta wandatipe udindo wakweruzga ŵanyithu nanga tingaŵa taŵenecho. (Ŵaroma 14:4, 12) Nanga vingaŵa kuti mtima withu uchali kutisuzga, kweni Chiuta wangatigowokera.—1 Yohane 3:19, 20.

Kasi Yudasi Isikariyoti wakachita kwananga kwambura kugowokereka?

 Enya. Mtima wake wauryezi ukamupangiska kuti wibe ndalama izo zikasonkhekanga kuti zovwire pa mulimo wakupatulika. Wakapusikizgiranga kuti wakughanaghanira ŵakavu, apo mtima wake ukaŵa pa kusanga usambazi kwizira mu kwiba. (Yohane 12:4-8) Mtima wa Yudasi ukati wakulungara wakaŵikapo mtima pakuchita kwananga, wakafika mpaka pa kumwendera mphiska Yesu chifukwa cha ndalama zasiliva 30. Yesu wakamanya kuti Yudasi wangasintha yayi pa ubudi uwo wakachita, lekani wakamuchema kuti ni “mwana wa pharanyiko.” (Yohane 17:12) Ivi vikung’anamura kuti Yudasi wakati wafwa wakaparanyikirathu, ndipo palije chilindizga chakuti wangazawuskika.—Mariko 14:21.

 Yudasi wakalongora kuti ngwakupera yayi. Wakalapa, kweni kwa Chiuta yayi, m’malo mwake wakalapa kwa ŵalongozgi ŵachisopa awo wakanozgeranga nawo lumoza chiŵembu.—Mateyu 27:3-5; 2 Ŵakorinte 7:10.