Enya, Chiuta wangamugowokerani zakwananga zinu para mwalondezga ivyo vikukhumbikwa. Baibolo likuti Chiuta ‘ngwakunozgeka kugowokera’ ndipo iyo ‘wakugowokera chomene.’ (Nehemiya 9:17; Salimo 86:5; Yesaya 55:7) Para Chiuta wagowoka, wakugowoka zanadi. Zakwananga zithu zikuŵa kuti “zasisitika.” (Milimo 3:19) Nakuti para Chiuta wagowoka, wakukumbukaso yayi, lekani wakuti: “Nizamukumbukaso chara kwananga kwawo.” (Yeremiya 31:34) Iyo para wagowoka, wakutikumbuskaso yayi zakwananga zithu panji kutilanga chifukwa cha ivyo tikabuda kumasinda.

 Ndipouli, Chiuta wakugowoka chifukwa chakuti walije nkhongono panji chifukwa cha umo wakujipulikira pa nyengo iyo yayi. Iyo wakusintha yayi fundo zake zaurunji izo wakwendera. Pa chifukwa ichi, iyo wakukana kugowoka zakwananga zinyake.​—Joshuwa 24:19, 20.

Ivyo mungachita kuti Chiuta wamugowokerani

1. Zomerani kuti para mwabuda ndikuti mwaswa fundo za Chiuta. Nanga vingaŵa kuti ŵanyake ŵakhuŵara na ivyo mwachita, kweni mukwenera kumanya fundo yakuti para mwabuda ndikuti mwanangira Chiuta.​—Salimo 51:1, 4; Milimo 24:16.

2. Lapani zakwananga zinu kwa Chiuta mu lurombo.​—Salimo 32:5; 1 Yohane 1:9.

3. Muchitenge chitima chifukwa cha ivyo mwabuda. “Chitima chakukolerana na khumbo la Chiuta” chikupangiska kuti munthu walape, panji kuti wang’anamuke mtima. (2 Ŵakorinte 7:10) Chitima ichi chikupangiska kuti munthu wajiyimbenge mulandu chifukwa cha ivyo vikamupangiska kuti wabude.​—Mateyu 5:27, 28.

4. Sinthani nthowa zinu, kung’anamura kuti “ng’anamukani mtima.” (Milimo 3:19) Ichi chikung’anamura kuti mukwenera yayi kuwerezgapo ivyo mukabuda, panji kuti musinthe kaghanaghaniro kweniso kachitiro kinu ka vinthu.​—Ŵaefeso 4:23, 24.

5. Chitanipo kanthu kuti munozge ivyo mwabuda panji kuwezgerapo ivyo mwananga. (Mateyu 5:23, 24; 2 Ŵakorinte 7:11) Phepiskani ku awo ŵakakhwaskika chifukwa cha ivyo mukachita panji kutondeka kuchita, ndipo usange mungafiska wezgeranipo ivyo mukananga.​—Luka 19:7-10.

6. Pemphani Chiuta mu lurombo kuti wamugowokerani kwizira mu sembe yakuwombora ya Yesu. (Ŵaefeso 1:7) Kuti Chiuta wazgore lurombo lwinu, namwe mukwenera kugowokera awo ŵamubudirani.​—Mateyu 6:14, 15.

7. Para zakwananga zinu ni zikuru, phalirani munthu wakwenelera kuti wamovwirani mwauzimu kweniso kumulomberani.​—Yakobe 5:14-16.

Mautesi pa nkhani ya umo Chiuta wakugowokelera ŵanthu

 “Para nalapa kwa wasembe panji kwa muteŵeti wa Chiuta, mbwenu zakwananga zane zagowokereka.”

 Pasono palije munthu uyo wali kupika mazaza gha kugowokera zakwananga za munthu munyake uyo wanangira Chiuta. Nangauli kuphalira munthu munyake ivyo wabuda vikovwira kuti ujipulikeko makora, kweni ni Chiuta pera uyo wangagowokera zakwananga.​—Ŵaefeso 4:32; 1 Yohane 1:7, 9.

 Para fundo ni iyo, kasi Yesu wakang’anamuranga vichi apo wakaphalira ŵapositole kuti: “Usange mukugowokera zakwananga za munthu waliyose, zakwananga zake zikugowokereka. Usange munthu waliyose mundamugowokere zakwananga zake, zakwananga zake zikhalilirenge”? (Yohane 20:23) Iyo wakayowoyanga vya mazaza ghapadera agho ŵapositole ŵazamupika para ŵapokera mzimu utuŵa.​—Yohane 20:22.

 Nga umo wakaŵalayizgira, ŵapositole ŵakapokera chawanangwa ichi apo mzimu utuŵa ukapungulikira pa iwo mu 33 C.E. (Milimo 2:1-4) Mpositole Petrosi wakagwiliskira ntchito mazaza agha apo wakeruzganga Hananiya na Safira. Mwa munthondwe Petrosi wakamanya ivyo ŵakapangana kuchita, ndipo cheruzgo icho wakaŵapa chikalongora kuti zakwananga zawo zingagowokereka yayi.​—Milimo 5:1-11.

 Chawanangwa cha munthondwe ichi, icho chikaŵa cha mzimu utuŵa, chikamara ŵapositole ŵati ŵafwa, umo vikamalira vyawanangwa vinyake nga nkhuchizga, na kuyowoya malulimi. (1 Ŵakorinte 13:8-10) Ntheura mazuŵa ghano palije munthu uyo wangagowokera zakwananga za munthu munyake.