Yahwe n’agonza obwesigwa tubutwale nk’ekintu ekikuru. (Mika 6:8) Obwesigwa kintu kikuru muno omu maka habwokuba kileetera amaka kubamu engonzi.

Omu kasumi kanu abaswerangaine abarukukira obwingi tibakyali besigwa. Kyonka amaka gaanyu kuba marungi, haroro ebintu bibiri ebi mwine kukora.

BAIBULI EGAMBA: “Mumanye ebintu ebirukukira obukuru.” (Abafiripi 1:10, NW) Obuswere bwanyu kiri kimu ha bintu ebirukukirayo obukuru omu bwomezi bwanyu.

Yahwe n’agonza musemerererwe omu buswere bwanyu. (Omugambizi 9:9) Yahwe tarukugonza onagirize mutahi waawe baitu buli omu aserre omulingo ogw’okusemezamu mutahi we. (1 Abakolinso 10:24) Mutahi waawe osemerire kumwoleka ngu n’osiima eby’akora.

EKY’OKUKORA:

• Lengaho kutunga obwire buli kiro kuba na mutahi waawe kandi omuhulirize kurungi obw’araaba aine eky’arukugambira

• Otefaaho weenka baitu na mutahi waawe muteekerezeho oine ekintu kyoona eky’orukugonza kukora

BAIBULI EGAMBA: “Omuntu wena anyakurora omukazi namwegomba, buli amazire kusihana nawe omu mutima gwe.” (Matayo 5:28) Omuntu obw’aikara n’ateekereza ha bintu eby’orwanju, taba mwesigwa hali mutahi we.

Yahwe atugambira kulinda emitima yaitu. (Enfomu 4:23; Yeremiya 17:9) Kusobora kulinda emitima yaitu, twina kwerinda kurora ebintu ebitarukumusemeza. (Matayo 5:29, 30) Kirungi kuhondera ekyokuroraho kya Yobu ayakozere ekiragano n’amaiso ge kutarolerra omukazi weena akamwengomba. (Yobu 31:1) Mwerinde kurora ebisisani eby’orwanju. Mwetantale kukora enkoragana yoona etali nungi n’omuntu atali mukazi waawe rundi musaija waawe.

EKY’OKUKORA:

• Kyoleke ngu n’ogonza muno mukazi waawe rundi omusaija waawe

• Obworaaba oine enkoragana yoona etali nungi n’omuntu atali mugenzi waawe omu buswere, kisemerire ogimareho