Yahwe obu y’atandikireho amaka, abazaire nibo y’ahaire obujunanizibwa bw’okurolera abaana baabu. (Abakolosai 3:20) Bujunanizibwa bwawe nk’omuzaire kwegesa omwana waawe kugonza Yahwe n’okuba omuntu w’obujunanizibwa. (2 Timoseo 1:5; 3:15) Oine kumanya ekiri ha mutima gw’omwana waawe. Mutereho ekyokuroraho ekirungi. Oine kubanza kugumya Ekigambo kya Yahwe omu mutima gwawe nukwo osobole kukyegesa omwana waawe.—Zabuli 40:8.

BAIBULI EGAMBA: “Omuntu arahukege okuhu’ra naikaraho okutagamba.” (Yakobo 1:19) Abaana baawe tibasemerire kukutiina. Baina kukimanya ngu osobora kubahuliriza obwire bwona. Taho enyikara ey’erukubasobozesa kukugambira kyoona ekibali ha mutima. (Yakobo 3:18) Obu barakirora ngu tokuhuliriza kandi n’otabuka bwangu, tibarukwija kukwemarrayo. Bunu nubwo bulyo habwaki oine kuboleka okugonza n’okugumisiriza.—Matayo 3:17; 1 Abakolinso 8:1.

EKY’OKUKORA:

• Abaana baawe bahe obwire baine ekibarukugonza kukugambira

• Tunga obwire bw’okubazaho n’abaana buli kiro, hatali obu baba hagwireho obuzibu rundi basobeze

BAIBULI EGAMBA: “Ata omutima ha kigambo alibona ebirungi.” (Enfumo 16:20) Obwire obumu mwine kukozesa amagezi kusobora kwetegereza kyonyini abaana ekibarukugambira. Abaana obundi bakihinguraniza, babaza ebisuba rundi babaza n’ekibatarukumanyisa. “Anyakugarukamu atakahuli’re, buba budomadoma.” (Enfumo 18:13) Otayanguha kubabihi’rwa.—Enfumo 19:11.

EKY’OKUKORA:

• Abaana n’obu baraaba babalize ekitakusemiize, otabatabukira baleke bamaleyo ebibarukubaza

• Kirungi kukijuka ngu obu waali omu myaka yaabu, naiwe wayetwaraga nka bo

BAIBULI EGAMBA: “Mwana wange, hu’ra okwegesa kwa ‘so kunu otaleka ekiragiro kya nyoko.” (Enfumo 1:8) Obujunanizibwa bwokurolera abaana Yahwe abukwasize abazaire, taata na maama. Nahabwekyo basemerire kwegesa abaana baabu kuborobera n’okubatamuga ekitiinisa. (Abefeso 6:1-3) Abazaire obu baba batarukwikiraniza, abaana bakimanya. (1 Abakolinso 1:10) Nahabwekyo, mulengo butoleka obutaikiraniza abaana baanyu baroho habwokuba kisobora kubaletera obutabaheereza ekitiinisa.

EKY’OKUKORA:

• Mwikiranize ha mulingo muraterekezamu abaana baanyu

• N’obworaaba oine enteekereza eyahukaine hali eya mutahi waawe ha mulingo gw’okuterekerezamu omwana waanyu, nauwe osemerire kumuhuliriza

BAIBULI EGAMBA: “Yorora omwana omu muhanda ogumuhikirire.” (Enfumo 22:6) Kusobora kutendeka kurungi abaana baanyu, mwina kuba n’entegeka enungi. Entegeka yaanyu ina kubamu omulingo muraterekerezaamu abaana baanyu baine ekibasobeze. (Zabuli 127:4; Enfumo 29:17) Kuterekereza abaana tikimanyisa kubafubira kyonka, baitu kitwaramu n’okubakonyera kwetegereza ensonga habwaki baine kukwata ebiragiro. (Enfumo 28:7) Mwine okubegesa kugonza Ekigambo kya Yahwe, n’okukorra ha misingi eyeri omu Kigambo kye. (Zabuli 1:2) Kinu nikiija kukonyera abaana kukurakuraniza omuntu ow’omunda omurungi.—Abaheburaniya 5:14.

EKY’OKUKORA:

• Mukonyere abaana baanyu kutwara Yahwe nk’Omuntu wonyini ou barukusobora kwesiga

• Mukonyere abaana baanyu kumanya ebintu ebisobora kusisa enkoragana yaabu na Yahwe, ebiri ha intaneeti. Mubeegese omulingo basobora kumanya abantu abarukusobora kubasiisa n’omulingo basobora kubetantaramu