Mintirho Ya Vapostolo 8:1-40
8 Sawulo a a ku seketela ku dlayiwa ka Stefano.+
Hi siku lelo, bandla leli a li li Yerusalema li sungule ku xanisiwa swinene; vadjondzisiwa hinkwavu va hangalakile va ya Yudiya ni le Samariya, ku sala vapostolo ntsena.+
2 Kambe vavanuna lava xi hloniphaka hintamu Xikwembu va rhwale ntsumbu wa Stefano va ya wu lahla, kutani va mu rila swinene.
3 Kambe Sawulo a sungula ku hlasela bandla. A a nghena hi munti ni munti, a khoma vavanuna ni vavasati a va yisa djele.+
4 Kambe vadjondzisiwa lava a va hangalaka a va tama va chumayela mahungu ya ku tsakisa ya rito la Xikwembu.+
5 Se Filipi a ye ka doropa* la Samariya,+ a fika a va djondzisa hi Kreste.
6 Vanhu lava a va li kolanu a va swi yingisela kahle leswi Filipi a a swi vula va tlhela va vona masingita lawa a a ma yendla.
7 Hikusa a ku ni vanhu va vanyingi lava a va ni madimoni naswona a ma ba huwa ma huma.+ Naswona swilima swa swinyingi ni lava khwitaka va hanyisiwile.
8 Se doropa hinkwalu li tsaka hintamu swinene.
9 Ka doropa lolelo, a ku tshama wanuna lweyi a a vitaniwa Simoni, lweyi a a yendla masalamusi,* a hlamalisa doropa la Samariya, na a hlaya swaku yena i munhu wa lisima swinene.
10 Hinkwavu a va mu yingisa ku sukela ka wamukulu ku ya fika ka wamutsongo, va ku: “Wanuna lweyi a ni Matimba yamakulu ya Xikwembu.”
11 Leswi a va hlamalisa xiswona hi masalamusi ya yena, swi yendle swaku va mu landzela swa nkamanyana.
12 Kambe nkama Filipi a nga va chumayela mahungu ya ku tsakisa ya Mfumu wa Xikwembu+ ni ya vito la Yesu Kreste, va kholwile ka yena kutani va tsakamisiwa.+
13 Simoni na yena a ve mupfumeli, kutani nkama a nga tsakamisiwa, a namarhele Filipi;+ a a hlamala loko a vona masingita ni mintirho yayikulu ya matimba loko yi yendleka.
14 Nkama vapostolo lava a va li Yerusalema va nga twa swaku vanhu va le Samariya va yamukele rito la Xikwembu,+ va rhume Pedru na Yohani swaku va va yela;
15 se nkama va nga fika, va va khongelelile swaku va ta kuma moya wa ku kwetsima,+
16 hikusa a va yo tsakamisiwa hi vito la Hosi Yesu ntsena kambe a va nga se va ni moya wa ku kwetsima.+
17 Se va va tlhateka mavoko+ kutani va sungula ku yamukela moya wa ku kwetsima.
18 Nkama Simoni a nga vona swaku vadjondzisiwa a va yamukela moya wa ku kwetsima loko va tlhatekiwa mavoko hi vapostolo, a va tshembise ku va nyika male
19 a ku: “Na mina ni nyikeni matimba lawa swaku lweyi ni nga ta mu tlhateka mavoko na yena a kuma moya wa ku kwetsima.”
20 Kambe Pedru a ku: “Male ya wena ya prata a yi helisiwe na wena, hikusa u pimisa swaku u nga kuma nyiko ya mahala ya Xikwembu hi male.+
21 A wu nga ta kuma nchumu naswona a wu ngheni ndhawu ka mhaka leyi hikusa mbilu ya wena a yi lulamanga ka Xikwembu.
22 Kutani tisoli ka tindlela ta wena ta ku biha, u txintxa mapimiselo ya wena ya ku biha u tlhela u kombela Yehovha* swaku loko swi koteka a ku rivalela;
23 hikusa na swi vona swaku u vhenenu leli nga ni nghozi ni xikarawa xa leswi kalaka swi nga lulamanga.”
24 Se Simoni a va hlamula a ku: “Ni kombeleleni ka Yehovha* swaku leswi mi nga swi vula swi nga ni humeleli.”
25 Nkama va nga gama ku fakaza hi ku helela ka vanhu hinkwavu ni ku khuluma hi rito la Yehovha,* va tlhelele Yerusalema, va famba na va chumayela mahungu ya ku tsakisa ka swidoropani swa swinyingi swa Vasamariya.+
26 Se ntsumi ya Yehovha*+ yi khuluma na Filipi yi ku: “Famba u ya sul* hi ndlela leyi sukaka Yerusalema yi ya Gaza.” (Leyi i ndlela leyi nga amananga.)
27 Se a famba kutani a vona mutheniwa wa Muetiyopiya, ku nga wanuna lweyi a a ni xitshamu xa ku tlakuka ka mfumu wa Kandaki, hosi ya xisati ya Vaetiyopiya* naswona a a vonelela tshomba la yona hinkwalu. A a ye Yerusalema a ya gandzela Xikwembu+
28 naswona a a tlhelela kaya, na a tshame ka nyolo* ya yena na a lerha buku la muprofeta Esaya hi rito la le henhla.
29 Se moya wa ku kwetsima wu byela Filipi wu ku: “Tshinelela nyolo liyani.”
30 Filipi a tsutsuma a ya ka yona kutani a twa mutheniwa na a lerha buku la muprofeta Esaya hi rito la le henhla a mu vutisa a ku: “Indjhe wa swi twisisa leswi u swi lerhaka?”
31 A mu hlamula a ku: “Ni nga swi kotisa ku yini ku swi twisisa na ku nga na lweyi a ni tlhamuselaka ke?” Se a kombela Filipi swaku a khwela a tshama na yena.
32 Tsalwa leli a a li lerha hi leli nge: “A a fana ni nyempfu leyi yisiwaka ku dlayiweni, leyi kalaka yi nga rili loko yi tsemetiwa mavoya, naswona a nga pfulanga nomo.+
33 A nkama na a danisiwa, va mu tsone ku lulama.+ Leswi a nga ta fa, i mani lweyi a nga ta byela van’wani hi ta wutomi la yena?”+
34 Se mutheniwa a byela Filipi a ku: “Ni kombela u ni tlhamusela: Kasi muprofeta a vulavula hi mani? A vulavula hi yena kumbe hi munhu mun’wani?”
35 Kutani Filipi a sungula ku mu tlhamusela; a rhange hi tsalwa leli, a tlhela a mu byela mahungu ya ku tsakisa hi Yesu.
36 Na va ha li ku fambeni, va fika lomu a ku ni mati, kutani mutheniwa a ku: “Txuvuka! Hi lawa mati; kasi i yini lexi ni sivelaka ku tsakamisiwa ke?”
37 * ——
38 Se mutheniwa a rhuma mufambisi wa nyolo* swaku a nyima, kutani Filipi ni mutheniwa va ya ka mati, se Filipi a mu tsakamisa.
39 Nkama va nga huma ka mati, moya wa ku kwetsima wa Yehovha* wu hantla wu teka Filipi naswona mutheniwa a nga ha mu vonanga, kambe a tifambele na a tsakile swinene.
40 Filipi a tikume na a li Axidodi; a fambafambe ka tiko lolelo na a chumayela mahungu ya ku tsakisa ka madoropa hinkwawu anze a ya fika Khezariya.+
Tinhlamunselu ta le hansi
^ Kumbexana: “ka doropa lin’wani”.
^ Kumbe: “magia”.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Kumbe: “dzongeni”.
^ Xigriki xi yengetela rito “Kandaki”, ku nga vito leli a li nyikiwa tihosi ta xisati ta Etiyopiya.
^ Kumbe: “n’qolo; kalichi”.
^ Vona Xiyengetelo A3.
^ Kumbe: “n’qolo; kalichi”.
^ Vona Xiyengetelo A5.
