Mahungu Ya Ku Tsakisa Ya Ku Tsaliwa Hi Marka 1:1-45
-
Yohani Mutsakamisi a chumayela (1-8)
-
Yesu a tsakamisiwa (9-11)
-
Yesu a ringiwa hi Sathana (12, 13)
-
Yesu a sungula ku chumayela aGalileya (14, 15)
-
Yesu a vitana vadjondzisiwa va yena va ku sungula (16-20)
-
Yesu a hlongola dimoni (21-28)
-
Yesu a hanyisa vanhu va vanyingi aKapernawume (29-34)
-
Yesu a khongela ka ndhawu leyi kalaka yi nga na vanhu (35-39)
-
Ku hanyisiwa ka munhu lweyi a a ni mavabyi ya nhlokonho (40-45)
1 Ku sungula ka mahungu ya ku tsakisa hi Yesu Kreste N’wana wa Xikwembu:
2 Hi ku landza leswi muprofeta Esaya a nga swi tsala a ku: “(Phela ni rhuma mutirheli wa mina swaku a rhanga,* a ya ku lunghiselela ndlela na u nge se fika.)+
3 Ku ni lweyi a huwelelaka amananga a ku: ‘Lunghiselelani ndlela ya Yehovha!* Khulani tindlela ta yena ti basa.’”+
4 Yohani Mutsakamisi a a li mananga, a chumayela vanhu swaku va tsakamisiwa kuva va kombisa leswaku va tisolile ka swidjoho swa vona.+
5 Se vanhu va tiko hinkwalu la Yudiya ni hinkwavu lava tshamaka Yerusalema a va huma va ya ka yena, kutani va tsakamisiwa ka Nambu wa Yordani, na va vula swidjoho swa vona hinkwaswu.+
6 Yohani a a yambala mpahla ya ku yendliwa hi mavoya ya kamela, a a tiboha bandhi la xikhumba ka masenge+ naswona a a dla mintete ni wulombe la tinyoxi.+
7 A a chumayela a ku: “Lweyi a taka ndzhaku ka mina wa ni tlula hi matimba naswona a swi ni faneli ku korhama ni tlhantlha tingoti ta masandaliya ya yena.+
8 Mina ni mi tsakamise hi mati kambe yena a ta mi tsakamisa hi moya wa ku kwetsima.”+
9 Ka masiku wolawo, Yesu a ta hi le Nazareta ku nga doropa la Galileya, kutani a tsakamisiwa hi Yohani ka Nambu wa Yordani.+
10 Hi ku hantlisa nkama a nga huma matini, a vona matilo ma pfuleka kutani moya wa ku kwetsima wu xikela henhla ka yena na wu fana ni xituvani.+
11 Se ku twakala rito leli taka hi le matilweni li ku: “U N’wana wa mina lweyi ni mu rhandzaka; na ku tsakela.”+
12 Hi ku hantlisa, matimba ya Xikwembu ma mu yisa mananga.
13 A tshame 40 wa masiku amananga naswona Sathana a mu ringile.+ A a tshama ni swiharhi swa khwati, kambe tintsumi a ti mu tiyisa.+
14 Nkama Yohani na a khomiwile, Yesu a ye Galileya+ a ya chumayela mahungu ya ku tsakisa ya Xikwembu+
15 a ku: “Se wu fikile nkama lowu ku nga profetiwa hi wona naswona Mfumu wa Xikwembu wu le kusuhi. Tisoleni,+ mi pfumela ka mahungu ya ku tsakisa.”
16 Na a li ku fambeni atlhelweni ka Lwandle la Galileya, a vona Simoni ni makwavu Andre+ na va hoxa maredi* ya vona ya ku phasa tihlampfi alwandle,+ hikusa a va li vaphasi va tihlampfi.+
17 Kutani Yesu a ku: “Ni landzeleni, ni ta mi yendla vaphasi va vanhu.”+
18 Hi ku kahlula va tshika maredi ya vona va mu landzela.+
19 Nkama a nga ya phambheninyana, a vone Yakobe na Yohani vana va Zebedewu na va li ka boti va lunghisa maredi ya vona.+
20 A va vitana hi xihantla. Kutani va siya papayi wa vona Zebedewu ka boti ni vatirhi va yena, va mu landzela.
21 Se va ya Kapernawume.
Nkama ku nga sungula Savata, Yesu a nghena ka sinagoga* a sungula ku djondzisa.+
22 Kutani va hlamalisiwa hi madjondzisela ya yena, hikusa leswi a a swi djondzisa a swi ta hi ka Xikwembu naswona a a nga djondzisi ku fana ni vatsali.+
23 Hi nkama wolowo, a ku ni wanuna lweyi a a ni dimoni* ka sinagoga la vona, a nga huwelela a ku:
24 “Hi ku wonhele yini wena Yesu wa le Nazareta?+ U tele ku ta hi helisa? Ni ku tiva kahle, u Mukwetsimi wa Xikwembu.”+
25 Kambe Yesu a li kawuka a ku: “Miyela! Huma ka yena!”
26 Kutani dimoni leli li mu tlatlalatela li tlhela li huwelela hi rito la le henhla, li gama li huma ka yena.
27 Se vanhu hinkwavu va hlamala hintamu va za va sungula ku byelana va ku: “A hi se tshama hi swi vona leswi; swa hlamalisa leswi a djondzisisaka xiswona! A ni matimba ya ku hlongola ni madimoni naswona ma mu yingisa.”
28 Kutani ndhuma ya yena yi hangalaka hi ku hantlisa ka tindhawu hinkwatu ta tiko la Galileya.
29 Nkama va nga huma ka sinagoga, va ye kaya ka Simoni na Andre na va li na Yakobe na Yohani.+
30 Mamani wa nsati wa Simoni+ a a yetlelile hikusa muzimbha wa yena a wu hiseta, se va byela Yesu leswaku wa vabya.
31 Kutani Yesu a mu tshinelela a fika a mu khoma hi voko a mu pfuxa. Se a hanya, a gama a sungula ku va lunghiselela swakudla.
32 Nkama li nga pela, vanhu va mu tisela hinkwavu va ku vabya ni lava nga ni madimoni+
33 naswona vanhu hinkwavu va le doropeni a va hlengeletane ka xipfalu xa yindlo.
34 Kutani a hanyisa vanhu va vanyingi lava a va ni mavabyi ya ku hambanahambana+ a tlhela a hlongola madimoni ya ku tala, kambe a a nga ma pfumeleli swaku ma vulavula hi ta yena hikusa a ma swi tiva swaku hi yena Kreste.*
35 Yesu a be mpundzu hintamu a huma handle, a ya ka ndhawu leyi kalaka yi nga na vanhu leswaku a ya khongela.+
36 Kambe Simoni ni lava a va li na yena va famba va mu lavetela
37 va za va mu kuma. Se va ku: “Vanhu va ku lavetela.”
38 Kambe a va hlamula a ku: “A hi fambeni ka madoropa man’wani lama nga kusuhi, leswaku na kona ni ta ya chumayela, hikusa hi leswo ni nga tela swona.”+
39 Se a famba a ya chumayela ka masinagoga ya tiko hinkwalu la Galileya, a tlhela a hlongola ni madimoni.+
40 Kutani a teliwa hi munhu lweyi a nga ni mavabyi ya nhlokonho,* a fika a khizama a mu kombela a ku: “Loko u swi lava, u nga ni hanyisa.”*+
41 Se a mu twela wusiwana, a tshandzavuta voko a mu khumba a ku: “Na swi lava! Hanyisiwa.”+
42 Kutani mavabyi ya yena ma tekela ku nyamalala hi ku hantlisa, se a hanya.
43 Na munhu yelweyo a nge se famba, Yesu a mu byele
44 a ku: “U nga byeli munhu mhaka leyi, kambe famba ka muprista u fika u nyikela gandzelo leli Moxe a nga vula swaku li fanele li humesiwa hi munhu lweyi a nga hanyisiwa mavabyi ya nhlokonho, leswaku vaprista+ va ta tiyiseka swaku se u hanyisiwile.”*+
45 Kambe nkama munhu lweyi a nga suka, a sungula ku byeletela vanhu hi mhaka leyi hinkwaku lomu a a ya kona, lakakuva Yesu a nga ha swi koti ku nghena doropeni na swi nga tiviwi hi munhu, kambe a a tshama handle ka doropa lomu a ku nga na vanhu. Hambileswo, a va tama va ya ka yena na va ta hi ka tindhawu ta ku hambanahambana.+
Tinhlamunselu ta le hansi
^ Hi Xigriki: “ka kara la wena”.
^ Vona Xiyengetelo A5.
^ Kumbe: “tikoka ta”.
^ I ndhawu leyi Vayuda a va kumana kona swaku va khongela va tlhela va lerha matsalwa.
^ Hi Xigriki: “moya wa chaka”.
^ Kumbexana: “a ma swi tiva leswaku hi yena mani.”
^ Kumbe: “lepra”. Ku nga muxaka wa mavabyi ya ku bola xikhumba.
^ Kumbe: “basisa.”
^ Kumbe: “basisiwile.”
