Bbaibbele lilatupa busolozi bubotu kujatikizya kupanga zyakusala. Lilakonzya kutugwasya kutegwa ‘tulijanine busongo, alimwi akulijanina maano.’ (Tusimpi 4:5) Mubukkale bumwi, lilatwaambila nzila mbotu njotweelede kusala. Pele mumwi, litupa buyo lulayo lukonzya kutugwasya kusala camaano.

Mucibalo eeci tulalanga-langa makani aatobela:

•  Mizeezo iikonzya kutugwasya kupanga cakusala cili kabotu

•  Sena ndeelede kucinca ncondakasala kale?

•  Ino mbuti kuti tiindakasala kabotu cakuti tandikonzyi kucicinca?

•   Mutanoofwambaani kupanga cakusala ciyandika kapati. Bbaibbele lyaamba kuti: “Ooyo uucenjede ulakkala ansi kuyeeya ntaamu zyakwe.” (Tusimpi 14:15) Ikuti mwafwambaana kupanga cakusala, mulakonzya kutatubikkila maano twaambo tuyandika kapati. Aboobo amube aciindi cakuzinzibala kuyeeya kujatikizya nzila zisiyene-siyene nzyomukonzya kusala.—1 Batesalonika 5:21.

•   Mutanoopangi zyakusala ziyeeme buyo ambolimvwa. Bbaibbele lilatucenjezya kuti talili lyoonse notukonzya kuusyoma moyo wesu. (Tusimpi 28:26; Jeremiya 17:9) Mucikozyanyo, tatukonzyi kupanga zyakusala zibotu ciindi notunyemede, notuuside, notutyompedwe, notutakkazikide moyo naa notukatede kapati.—Tusimpi 24:10; 29:22.

•   Amulombe busongo. (Jakobo 1:5) Leza ulilibambilide kwiingula mipailo iili boobu. Ngu Taata uubikkila maano uutayandi kuti bana bakwe kabapenga. “Jehova ulapa busongo; kumulomo wakwe kuzwa luzyibo abupampu.” a (Tusimpi 2:6) Nzila njabelesya kapati kucita boobo nkwiinda mu Jwi lyakwe, Bbaibbele.—2 Timoteyo 3:16, 17.

•   Amuvwuntauzye. Kutegwa mucikonzye kupanga cakusala cili kabotu, muyandika kuba amakani ngomukonzya kusyoma. Mbubwenya mbuli Bbaibbele mbolyaamba kuti, “muntu musongo ulaswiilila akutambula malailile manji.” (Tusimpi 1:5) Ino nkuli nkomukonzya kujana makani aagwasya alimwi ngomukonzya kusyoma?

   Kusaanguna, amubone Bbaibbele ncolyaamba mumakani aayo ngomuyeeya. Akaambo kakuti Mulengi wesu ulizizyi zintu zikonzya kutugwasya, mu Jwi lyakwe kuli lulayo lugwasya. (Intembauzyo 25:12) Mubukkale bumwi, Bbaibbele lilapa busolozi bugaminide, ambweni kwiinda mukubelesya milawo. (Isaya 48:17, 18) Nokuba boobo, mubukkale bumwi bunji, talyaambi cacigaminina. Muciindi caboobo, lilapa busolozi kwiinda mukubelesya njiisyo. Njiisyo eezyi zilakonzya kutugwasya kupanga zyakusala izili kabotu nokuba kuti inga kaziindene akusala kwabantu bamwi. Kutegwa mujane zibalo zyamu Bbaibbele zikonzya kumugwasya, amuvwuntauzye muzibalo naa mabbuku aamba zyamu Bbaibbele, mbuli yaayo aatabbadelelwi aajanika awebbusaiti eeyi. b

   Kujatikizya zyakusala zimwi, muyandika kuvwuntauzya makani aakubusena bumbi buyo ikuzwa makani aasyomeka. Mucikozyanyo, kamutanaula cintu cimwi—kwaambisya cidula—mulakonzya kucita camaano ikuti naa mwasaanguna kuzyiba zinji kujatikizya cintu eeco abakacipanga, kubikkilizya acikonzya kucitika ikuti naa canyongana naa ikuti muyanda kucipilusya. Pele alimwi, mweelede kubona naa cintu eeco ncencico ncomuyandika ncobeni.

   Bbaibbele lyaamba kuti: “Makanze alanyongana ikuti kakunyina kubandika. (Tusimpi 15:22) Aboobo kamutanapanga cakusala, amusaangune kubuzya bantu mbomusyoma. Mucikozyanyo, mulakonzya kucita cabusongo ikuti naa mwasaanguna kubuzya musilisi kamutanapanga cakusala mumakani aabusilisi. (Matayo 9:12) Mubukkale bumwi, mulakonzya kubandika abantu ibakali mubukkale bukozyenye abwanu. Nokuba boobo, nomucita oobo mutalubi kuti ndinywe nomuyoopanga cakusala eeco alimwi akucitikilwa zintu ziyooboola kweelana akusala nkomuyoocita, ikutali bantu aabo mbomuyoobuzya.—Bagalatiya 6:4, 5.

•   Amulange-lange zintu zyoonse zijatikizyidwe. Mwamana kulanga-langa twaambo tusiyene-siyene, mulakonzya kulemba mulongo wazintu nzyomukonzya kusala kumane akubikkilizya bubotu abubi bwacakusala cimwi acimwi icili amulongo wanu. Mpoonya mweelede kuyeeya zikonzya kuzwa mpawo akaambo kakusala kwanu. (Deuteronomo 32:29) Mucikozyanyo, ino kusala kwanu inga kwamujatikizya buti nywebo, banamukwasyi, naa bantu bambi buyo? (Tusimpi 22:3; Baroma 14:19) Kuzinzibala kuyeeya mibuzyo iili mbuli yeeyi kweelana anjiisyo zyamu Bbaibbele kulakonzya kumugwasya kupanga cakusala citondezya kuti muli basongo alimwi basiluyando.

•   Amupange cakusala. Zimwi ziindi tulakonzya kuwaya-waya kupanga cakusala akaambo kuti tuladooneka. Pele ikuti naa tiitwabweza ntaamu cakufwambaana, tulakonzya kwiindwa coolwe naa kulijana mubukkale mbotwatakali kuyanda. Munzila imwi inga twaamba kuti mbubwenya mbobuli bufwubafwuba ikuti muntu wapanga cakusala citali kabotu, ncimwi buyo akutapangila limwi cakusala. Bbaibbele lilatugwasya kumvwisya kaambo aaka kwiinda mukukozyanisya bukkale oobu kubulimi. Lyaamba kuti: “Ooyo uulanga muwo takasyangi mbuto pe, alimwi ooyo uulanga makumbi takatebuli pe.”—Mukambausi 11:4, Bbaibbele lya Busanduluzi Bwanyika Mpya.

 Alimwi amuyeeye kuti, nociba cakusala icili kabotu tacilondokede pe. Bunji bwaziindi, notusala cintu cimwi inga tulaliimya icimbi. Kumane, zintu zitalangilwi zilakonzya kucitika. (Mukambausi 9:11) Aboobo amubelesye makani aaliko ngomukonzya kusyoma, akusala cintu ncomubona kuti ciyoozwidilila ncobeni.

 Zyakusala zimwi zilakonzya kucincwa. Bukkale bwanu bulakonzya kucinca naa mulakonzya kujana kuti cakusala ncomwakapangide caleta zintu nzyomwatakali kulangila. Aboobo, inga caba camaano kwaalanga-langa alimwi makani, akusala nzila imbi iilibonya kuti iyoozwidilila kweelana ambomuyanda.

 Nokuba boobo, zyakusala zimwi tazyeelede kucincwa pe. (Intembauzyo 15:4) Mucikozyanyo, Leza uyanda kuti banabukwetene kababamba cikonke cabo cacikwati. c (Malaki 2:16; Matayo 19:6) Nokwabbuka mapenzi mucikwati, banabukwetene beelede kubeleka canguzu kwaamana muciindi cakulekana.

 Toonse buyo aciindi cimwi, kuli notwakapangide cakusala citali kabotu. (Jakobo 3:2) Amana buya tulakonzya kuusa calo icili buyo kabotu. (Intembauzyo 69:5) Ikuti zimwi ziindi mbombubo mbotulimvwa oobo, cilakonzya kutugwasya kutainduluka kucita cintu nceena alimwi! (Tusimpi 14:9) Nokuba boobo, Bbaibbele litwaambila kuti tatweelede kuciindizya kulipa mulandu nkaambo eeci cilakonzya kututyompya kapati alimwi akupa kuti citukatazye kuyeeya kabotu. (2 Bakorinto 2:7) d Bbaibbele lyaamba kuti “Jehova ngusiluse alimwi ngusilweetelelo.” (Intembauzyo 103:8-13) Aboobo, amusoleke kwiiya ciiyo kuzwa kucakusala citali kabotu ncomwakapangide calo ncomutakonzyi kucinca, akucita kufwumbwa ncomukonzya kutegwa mubambulule zintu.