Mapenzi mapati ayooleta ziindi zyamapenzi aakatazya kapati aatanabacitikilide bantu. Kweelana abusinsimi bwamu Bbaibbele, ayootalika lya ‘mazuba aamamanino,’ naa “ziindi zyamamanino.” (2 Timoteyo 3:1; Daniele 12:​4, New American Bible) Anooli mazuba “aamapenzi aatanacitikide kuzwa kumatalikilo aazilenge eezyo nzyaakalenga Leza kusikila ciindi eeco, alimwi kunyina naayooba limbi pe.”​—Marko 13:19; Daniele 12:1; Matayo 24:​21, 22.

Zintu iziyoocitika lyamapenzi mapati

•   Kunyonyoonwa kwabukombi bwakubeja. Mukulaba kwaliso, bukombi bwakubeja buyoonyonyoonwa. (Ciyubunuzyo 17:​1, 5; 18:​9, 10, 21) Mbunga zyatwaambo twacisi iziimininwa a Lukamantano Lwazisi (United Nations) ziyoocita kuyanda kwa Leza kwiinda mukubweza ntaamu eeyi.​—Ciyubunuzyo 17:​3, 15-​18. a

•   Kulwana bukombi bwakasimpe. Nkamu yazisi, iyaambwa mucilengaano ca Ezekieli kuti “Gogo wakucisi ca Magogo,” iyoosola kunyonyoona baabo batobela bukombi bwakasimpe. Pele Leza uyoobakwabilila bakombi bakwe kutegwa batanyonyoonwi.​—Ezekieli 38:​1, 2, 9-​12, 18-​23.

•   Kubetekwa kwabantu bamunyika. Jesu uyoobabeteka bantu boonse alimwi “uyoobaandaanya bantu mbubonya mweembezi mbwaandaanya mbelele ampongo.” (Matayo 25:​31-​33) Lubeta lwakwe lunooyeeme alugwasyo, naa kutapa lugwasyo muntu umwi aumwi nkwaakacita ‘kubanabokwabo’ Jesu aabo ibayoolela antoomwe anguwe kujulu.​—Matayo 25:​34-​46.

•   Kubuganizyigwa kwabaleli ba Bwami. Bantu basyomeka ibakasalwa kuyoolela a Kristo bayoomanizya buumi bwabo bwaanyika akubusyigwa kuunka kujulu..​—Matayo 24:31; 1 Bakorinto 15:​50-​53; 1 Batesalonika 4:​15-​17.

•   Amagedoni. Eeyi ‘nkondo yabuzuba bupati bwa Leza Singuzuzyoonse’ alimwi yiitwa kuti ‘buzuba bwa Jehova.’ (Ciyubunuzyo 16:​14, 16; Isaya 13:9; 2 Petro 3:​12) Aabo Kristo mbayoobeteka kuti bali amulandu, bayoonyonyoonwa. (Zefaniya 1:​18; 2 Batesalonika 1:​6-​10) Eeci ciyoobikkilizya kunyonyoonwa kwambunga zyatwaambo twacisi nyika yoonse, zyalo mu Bbaibbele iziimininwa amunyama uujisi mitwe iili ciloba.​—Ciyubunuzyo 19:​19-​21.

Zintu iziyoocitika aakwiinda mapenzi mapati

•   Kwaangwa kwa Saatani amadaimona. Mungelo singuzu uyoowaala Saatani amadaimona “mumulindi uutagoli,” kuba muciimo icili mbuli kuti balifwide cakutakonzya kucita cintu cili coonse.(Ciyubunuzyo 20:​1-3) Mbwanoobede Saatani mumulindi uutagoli kulakonzya kukozyanisyigwa akuba muntolongo; tanookonzyi kuyunga bantu kuli koonse.​—Ciyubunuzyo 20:7.

•   Myaka Iili Cuulu yatalika. Bwami bwa Leza buyootalika bulelo bwambubo bwamyaka iili 1,000, bwalo iibuyooleta zilongezyo zitaambiki kubantu. (Ciyubunuzyo 5:​9, 10; 20:​4, 6) “Nkamu mpati” yabantu batabaliki ‘bayoozwa mumapenzi mapati,’ bayoofwutuka akubona matalikilo aa Myaka Iili Cuulu anyika.​—Ciyubunuzyo 7:​9, 14; Intembauzyo 37:​9-​11.