Nokuba kuti Bbaibbele talibelesyi mabala aakuti “kugusya da,” tupango tunji twamu Bbaibbele tutondezya Leza mbwabubona buumi, kubikkilizya abuumi bwamwana uutanazyalwa.

 Buumi ncipego kuzwa kuli Leza. (Matalikilo 9:6; Intembauzyo 36:9) Ulabubikkila maano buumi boonse kubikkilizya abwamwana uuli mwida. Aboobo ikuti muntu umwi wagusya da acaali, ncimwi buyo akujaya.

 Mulawo wa Leza kubana Israyeli wakali kwaamba kuti: “Ikuti baalumi balwana akucisa mukaintu uulaada kumane watumbuka mazuba aakwe kaatanasika, pele kunyina ntenda yacitika, ooyo uulaamukaintu weelede kulungilwa kufwumbwa mbwaamba; alimwi ooyo wacisa mukaintu weelede kulunga kwiinda mubabetesi. Pele ikuti naa kwacitika ntenda, nkokuti uyoolunga buumi kubuumi.”—Kulonga 21:22, 23. a

•  Ino ndilili buumi bwamuntu nobutalika?

•  Sena Leza inga wamulekelela muntu wakagusya da?

•  Sena kugusya da ncibi ikuti buumi bwabanyina naa bwamwana kabuli muntenda?

 Kuzwa ciindi mwana naamitwa, Leza umubona kuti muntu uupona. Mu Jwi lyakwe Bbaibbele, Leza lyoonse ubona mwana uutanazyalwa kuti muntu. Amulange-lange zikozyanyo zimwi zitondezya kuti kuli Leza kunyina kwiindana mbwabubona buumi bwamwana uuli mwida alimwi abuumi bwamwana iwazyalwa.

•   Kwiinda mukusololelwa amuuya, Mwami Davida wakaambila Leza kuti: “Meso aako akandibona nindakacili nsalalila.” (Intembauzyo 139:16) Nokuba kuti Davida tanaakalinazyalwa, Leza wakali kubala kuti muntu.

•   Kuyungizya waawo, Jeremiya katanazyalwa, Leza wakalizyi kuti wakali kuyoomupa mulimo uulibedelede wabusinsimi. Leza wakamwaambila kuti: “Kanditana kukubumba mwida lyabanyoko, ndakalikuzyi, alimwi kotanazyalwa ndakakusalazya. Ndakakupa kuba musinsimi kumasi.”—Jeremiya 1:5.

•   Mulembi wa Bbaibbele Luka, imusilisi, wakabelesya bbala lyomwe lya Chigiriki kwaamba mwana uutanazyalwa amwana wazwa akutumbukwa.—Luka 1:41; 2:12, 16.

 Aabo ibakagusya da balakonzya kulekelwa a Leza. Ikuti naa buumi kababubona mbuli mbwabubona Leza, tabayandiki kulipa mulandu. “Jehova ngusiluse alimwi ngusilweetelelo . . . Mbubonya kumapolelo aazuba mbokuli kulamfwu kapati kuzwa kumabbililo aazuba, akwalo nkwabikkide zinyonyoono zyesu mbokubede kulampa kuzwa kulindiswe.” b (Intembauzyo 103:8-12) Jehova uyoobalekelela aabo ibakeempwa ncobeni kuzibi zyabo, kubikkilizya akugusya da.—Intembauzyo 86:5.

 Kweelana a Bbaibbele ncolyaamba kujatikizya buumi bwamwana uutanazyalwa, muntu takonzyi kupa cilitamizyo kwiinda mukugusya da akaambo kakuti kulakonzya kuba ntenda kuli banyina naa mwana.

 Ino mbuti kuti mubukkale butacitiki-citiki mbuli aciindi cakutumbuka, kwacitika cintu cimwi calo cikonzya kupa kuti kube kusala ambweni kufwutula buumi bwabanyina naa bwamwana? Mubukkale oobu, aabo ibajatikizyidwe beelede kusala kujatikizya ngobeelede kufwutula.