Sena Bbaibbele Lilakonzya Kumugwasya Ikuti Kamujisi Bulwazi Butasilikiki?
Bwiinguzi bwamu Bbaibbele
Inzya. Leza ulabalanganya babelesi bakwe bacisidwe. Kujatikizya mubelesi uusyomeka, Bbaibbele lyaamba kuti: “Jehova ulamutabilila naaciswa abulo.” (Intembauzyo 41:3) Ikuti naa muciswa bulwazi butasilikiki, ntaamu zyotatwe zitobela zilakonzya kumugwasya kuliyumya:
Amupailile nguzu kutegwa muliyumye. Mulakonzya kutambula “luumuno lwa Leza oolo lwiinda kumvwisya koonse,” lwalo lukonzya kumugwasya kuliyumya nokuba kuti mujisi makatazyo.—Bafilipi 4:6, 7.
Amuzilange zyintu munzila yeelede. Bbaibbele lyaamba kuti: “Moyo uukondwa musamu mubotu, pele muuya uutyokede ulayuminizya mubili.” (Tusimpi 17:22) Kamuseka-seka lyoonse, nkaambo kucita oobo takupi buyo kuti buumba buceye-ceye pele kulakonzya kugwasya kuti buumi bwanu bube kabotu.
Amube abulangizi bwakuti zisyomezyo zya Leza ziyoozuzikizyigwa. Bulangizi bulakonzya kumugwasya kuba alukkomano nokuba kuti muciswa bulwazi butasilikiki. (Baloma 12:12) Bbaibbele lilasinsima kujatikizya ciindi nokutakabi “naba omwe akati kabantu banyika uuamba kuti, Ndaciswa.” (Isaya 33:24) Mpoonya Leza uyoobaponya bantu bajisi malwazi aatasilikiki aayo ngobaalilwa kusilika basayaansi. Mucikozyanyo, Bbaibbele lipandulula kuti bacembeede bayooba bakubusi alimwi nolyaamba kuti: “Lino inyama yakwe ilaba impya kwiinda yamwana; inguzu zyabulombe bwakwe bulajoka.”—Jobu 33:25.
Amubone kuti: Nokuba kuti Bakamboni ba Jehova balalumba lugwasyo ndwapa Leza, pele alimwi balayandaula busilisi bwamalwazi aatasilikiki. (Maako 2:17) Pele Bakamboni ba Jehova tabasumpuli busililisi buli boonse; muntu umwi aumwi weelede kulisalila mumakani aabusilisi.