Ciyubunuzyo 12:1-17

  • Mukaintu, mwana musankwa, asimwaaba (1-6)

  • Mikayeli walwana simwaaba (7-12)

    • Simwaaba wawaalwa anyika (9)

    • Diabolosi ulizyi kuti ujisi buyo kaindi kaniini (12)

  • Simwaaba wapenzya mukaintu (13-17)

12  Mpoonya kwakalibonya citondezyo cipati kujulu: Imukaintu+ wakasamide zuba, kunsi aamaulu aakwe kwakali mwezi, kumutwe wakwe kwakali musini wanyenyeezi izili 12,   alimwi wakalimitide. Lino wakali kulila kapati akaambo kakumyongwa alimwi akupenga naakali kuyanda kutumbuka.  Alimwi kwakalibonya citondezyo acimbi kujulu. Amubone! Kwakali simwaaba mupati uusalala pyu mbuli mulilo,+ uujisi mitwe iili ciloba ameja aali kkumi eelyo kumitwe yakwe kwakali misini iili ciloba;  alimwi mucila wakwe wakali kukwelelezya cibeela catatu canyenyeezi+ zyakujulu, eelyo wakaziwaala ansi, anyika.+ Mpoonya simwaaba ooyo wakazumanana kumwiimina kumbele mukaintu+ ooyo iwakali afwaafwi kutumbuka, ikutegwa mbwatiitumbukile buyo, amumene buumbulu mwanaakwe.  Lino mukaintu ooyo wakatumbuka mwana musankwa,+ imulombe, ooyo uuyakweembela masi oonse ankoli yabutale.+ Mpoonya mwanaakwe ooyo wakakwempelwa kuli Leza akucuuno cakwe cabwami.  Lino mukaintu ooyo wakatijila munkanda, ooko nkwajisi busena mbwaakamubambila Leza, eelyo ooko bakali kuyoomusanina kwamazuba aali 1,260.+  Lino kwakabuka nkondo kujulu: Mikayeli*+ abangelo bakwe bakalwana simwaaba, awalo simwaaba abangelo bakwe wakalwana  pele tiibakazunda pe,* alimwi tiibakacijisi busena kujulu.  Aboobo wakawaalwa ansi simwaaba ooyo mupati,+ imuzoka ooyo wakaindi,+ uutegwa Diabolosi+ a Saatani,+ ooyo weena nyika yoonse;+ wakawaalwa ansi, anyika,+ abalo bangelo bakwe bakawaalwa ansi antoomwe anguwe. 10  Ndakamvwa jwi pati kujulu kalyaamba kuti: “Lino kwaba lufwutuko,+ nguzu, Bwami bwa Leza wesu+ alimwi abweendelezi bwa Kristo wakwe, nkaambo sikutamikizya bakwesu twaambo wawaalwa ansi, ooyo uubatamikizya twaambo isyikati amasiku kumbele lya Leza wesu!+ 11  Lino bakamuzunda+ akaambo kabulowa bwa Mwanaambelele+ alimwi akaambo kajwi ndibakali kucitila bumboni,+ alimwi tiibakayandisya buumi bwabo+ noliba leelyo nobakali kulangana alufwu. 12  Akaambo kaceeci amusekelele, nywebo nomajulu andinywe nomukkala mulingawo! Maawe kunyika alimwi akulwizi,+ nkaambo Diabolosi wamuselukila abukali bupati, mbwaanga ulizyi kuti ujisi buyo kaindi kaniini.”+ 13  Lino simwaaba naakabona kuti wawaalwa ansi, anyika,+ wakapenzya mukaintu+ iwakatumbuka mwana musankwa. 14  Pele mukaintu ooyo wakapegwa mababa obilo aasikwaze mupati,+ ikutegwa aulukile kunkanda kubusena bwakwe, ooko nkwayelede kuyoosaninwa kwaciindi comwe aziindi zyobilo acisela+ kali kule amuzoka.+ 15  Mpoonya muzoka wakaluka maanzi manji mbuli mulonga kumukaintu ooyo, ikutegwa mukaintu anywide mumulonga ooyo. 16  Pele nyika yakaboola kuti ivwune mukaintu ooyo, eelyo yakaasamuna mulomo wanjiyo akumena mulonga ooyo ngwaakaluka simwaaba. 17  Mpoonya simwaaba wakaindila kuba abukali kumukaintu ooyo, eelyo wakaunka kuyoolwana basyeede balunyungu lwamukaintu,+ aabo ibabamba milawo ya Leza alimwi ibajisi mulimo wakupa bumboni kujatikizya Jesu.+

Bupanduluzi buyungizyidwe

Nkokwaamba kuti “Nguni Uuli Mbuli Leza?”
Naa ambweni, “pele wakazundwa [nkokuti, simwaaba].”