1 Bakorinto 5:1-13
5 Mubwini kwaambwa kuti kuli bwaamu*+ akati kanu, alimwi bwaamu* oobo mboobo butacitwi naaba akati kabamasi, bwakuti mwaalumi umwi ukkala amukaintu* wabausyi.+
2 Pele sena eeco cilamukonda? Sena tamweelede kuusa akufwa nsoni+ ikutegwa mwaalumi ooyo wakacita ceeci agusyigwe akati kanu?+
3 Nokuba kuti tandili andinywe kumubili ndili andinywe kumuuya, alimwi ndamubeteka kale muntu ooyo iwakacita cintu cili boobo mbuli kuti ndilaandinywe ooko.
4 Mwaakuswaangana antoomwe muzina lya Mwami wesu Jesu, alimwi kamuzyi kuti ndilaandinywe mumuuya antoomwe anguzu zya Mwami wesu Jesu,
5 mukamwaabe kuli Saatani+ mwaalumi ooyo kutegwa mubili ukanyonyoonwe, pele muuya ukafwutulwe mubuzuba bwa Mwami.+
6 Ikaambo kamupa kulidunda nywebo takali kabotu pe. Sena tamuzyi kuti bumena busyoonto bupa kuti mulwi woonse wafulaulu uukandidwe ufwufwumuke?+
7 Amugusye bumena bwakaindi, kutegwa mube mulwi mupya, mbwaanga tamujisi bumena bumupa kufwufwumuka.* Nkaambo ncobeni Kristo, imwanaambelele wesu wa Pobwe Lyakwiindilila+ wapaizyigwa kale.+
8 Aboobo atucite pobwe eeli,+ ikutali abumena bwakaindi naa bwacibi azinyonyoono, pele azinkwa zitajisi bumena izibambwa camoyo woonse alimwi mukasimpe.
9 Mulugwalo lwangu ndakamulembela kuti muleke kuyanzana* abasibwaamu,*
10 ikutali kwaamba kuti abasibwaamu* boonse bamunyika eeyi+ naa basyaacivwulemwangu azigwebenga naa basikukomba mituni. Nkaambo ikuti naa caba boobo inga mwayandika kuti muzwe buya munyika eeyi.+
11 Pele lino ndimulembela kuti muleke kuyanzana*+ amuntu uuli woonse uutegwa mukwesu pele sibwaamu,*+ syaacivwulemwangu, sikukomba mituni, simatusi, mukolwi,+ naa cigwebenga,+ alimwi mutasoli nokuba kulya amuntu uuli boobo.
12 Nkaambo sena mulimo wangu ikubeteka baabo bali kunze? Sena tamuli ndinywe nomubeteka baabo bali mukati,
13 eelyo Leza walo nabeteka baabo bali kunze?+ “Amumugusye muntu ooyo mubi akati kanu.”+
Bupanduluzi buyungizyidwe
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Mu Chigiriki, “ujisi mukaintu.”
^ Mu Chigiriki, “tamujisi bumena.”
^ Naa “kumvwana.”
^ Amubone Bupanduluzi Bwamabala, “Koonana ikutali kwamumulawo.”
^ Amubone Bupanduluzi Bwamabala, “Koonana ikutali kwamumulawo.”
^ Naa “kumvwana.”
^ Amubone Bupanduluzi Bwamabala, “Koonana ikutali kwamumulawo.”
