“Kapau te mou kole ha me‘a ki he Tamaí, te ne ‘oatu ia kiate kimoutolu ‘i hoku hingoá.”​—Sione 16:23.

‘Oku fakahaa‘i mahino ‘i he lea ‘a Sīsuú ‘oku finangalo ‘a Sihova ke tau lotu kiate ia, ‘o ‘ikai fakafou ‘i he ngaahi ‘īmisi, kau sangato, kau ‘āngelo pe ko e kakai kuo maté, ka ‘i he huafa ‘o Sīsū Kalaisí. ‘I he taimi ‘oku tau lotu ai ki he ‘Otuá fakafou ‘i he huafa ‘o Sīsuú, ‘oku tau fakahaa‘i ai ‘oku tau lāu‘ilo ki he ngafa mahu‘inga ‘o Sīsuú. “‘Oku ‘ikai ha‘u ha taha ki he Tamaí ka ‘i he‘ene fou pē ‘iate au,” ko e lea ia ‘a Sīsuú.​—Sione 14:6.

“Hua‘i atu homou lotó ‘i hono ‘aó.”​—Saame 62:8.

‘I he taimi ‘oku tau lotu ai kia Sihová, ‘oku totonu ke tau lea kiate ia ‘o hangē ko ‘etau lea ki ha tamai ‘ofa. ‘I he ‘ikai ke lau ia mei ha tohi pe lea‘aki ha me‘a na‘e ako ma‘uloto, ‘oku totonu ke tau lea anga-faka‘apa‘apa kiate ia mei he lotó.

“‘Ilonga ha me‘a ‘oku tau kole ‘o fakatatau ki hono finangaló, ‘okú ne fanongo mai kiate kitautolu.”​—1 Sione 5:14.

‘I he Tohi Tapú, ‘oku tala mai ai ‘e Sihova ko e ‘Otuá ‘a e me‘a te ne fai ma‘a kitautolu mo e me‘a ‘okú ne finangalo ke tau fai ange ma‘ana. Ke tali ‘e he ‘Otuá ‘etau lotú, ‘oku fiema‘u ke tau lotu “‘o fakatatau ki hono finangaló.” Ko ia ai, ‘oku fiema‘u ke tau ako ‘a e Tohi Tapú koe‘uhi ke tau ‘ilo‘i lelei ange ia. Kapau te tau fai eni, ‘e fakahōifua ‘etau ngaahi lotú kiate ia.

Lotu Fekau‘aki mo Ho‘o Fiema‘ú. ‘E lava ke tau lotu ki he ‘Otuá fekau‘aki mo ‘etau ngaahi fiema‘u faka‘ahó​—ko e me‘akai, vala mo e nofo‘anga. ‘E lava foki ke tau lotu ki ha poto ke fai ‘a e ngaahi fili totonú pea ki ha mālohi ke tau kātekina ‘a e ‘ahi‘ahí. ‘E lava ke tau lotu ki ha tui, ki ha fakamolemole pea ki he tokoni ‘a e ‘Otuá.​—Luke 11:3, 4, 13; Sēmisi 1:5, 17.

Lotu Ma‘á e Ni‘ihi Kehé. Ko e ngaahi mātu‘a tokangá ‘oku nau fiefia ‘i he fe‘ofa‘aki ‘enau fānaú. ‘Oku loto foki ‘a Sihova ke fetokanga‘aki ‘ene fānau ‘i he māmaní. ‘Oku fe‘ungamālie ke lotu ma‘a hotau hoá, fānaú, fāmilí, mo hotau ngaahi kaume‘á. “Mou felotu‘aki,” ko e tohi ia ‘a e ākonga ko Sēmisí.​—Sēmisi 5:16.

Fakahaa‘i ‘a e Fakamālō. ‘Oku pehē ‘e he Tohi Tapú fekau‘aki mo hotau Tokotaha-Fakatupú: “‘I he‘ene faileleí, ‘aki hono foaki mai kiate kimoutolu ‘a e ‘uha mei he langí mo e ngaahi fa‘ahita‘u mahu, ‘o ne fakamākona kimoutolu ‘aki ‘a e me‘akai pea fakafonu homou lotó ‘aki ‘a e fiefia.” (Ngāue 14:17) ‘I he taimi ‘oku tau fakakaukau ai ki he me‘a kotoa kuo fai ‘e he ‘Otuá ma‘a kitautolú, ‘e ue‘i ai kitautolu ke fakamālō kiate ia ‘i he lotu. Ko e mo‘oni, ‘oku totonu foki ke tau fakahāhā ‘etau hounga‘ia ki he ‘Otuá ‘i he‘etau founga mo‘uí.​—Kolose 3:15.

‘I he taimi ‘e ni‘ihi, te tau ongo‘i loto-si‘i nai koe‘uhi ko e ‘ikai ke tali vave ‘etau ngaahi lotu loto-mo‘oní. ‘Oku totonu ke tau pehē ai ‘oku ‘ikai ke mahu‘inga‘ia ‘a e ‘Otuá ‘iate kitautolu? Mole ke mama‘o! Fakakaukau ki he ngaahi hokosia ko eni ‘oku fakamamafa‘i ai ‘a e fiema‘u ke tau hanganaki lotú.

Ko Steve, na‘e lave ki ai ‘i he ‘uluaki kupú, ‘okú ne pehē, “Ka ne ta‘e‘oua ‘a e lotú, kuo fuoloa ‘eku fo‘i ‘i he mo‘uí ‘i he ngaahi ta‘u kuo maliu atú.” Ko e hā na‘á ne ‘ai ia ke ne liliú? Na‘e kamata ke ne ako ‘a e Tohi Tapú pea ‘ilo‘i ‘a e fiema‘u ke lotu pea kīvoi aí. “‘Oku ou lotu ki he ‘Otuá ke fakamālō kiate ia ki he poupou anga-‘ofa kotoa kuó u ma‘u mei hoku ngaahi kaume‘a ‘ofeiná,” ko e lea ia ‘a Steve. “‘Oku ou fiefia ange ‘i he taimí ni ‘i ha toe taimi ki mu‘a.”

Kae fēfē ‘a Jenny, na‘á ne ongo‘i na‘e ‘ikai ke ne tuha ke fanongo mai kiate ia ‘a e ‘Otuá? ‘Okú ne pehē, “‘I he‘eku ongo‘i mātu‘aki vaivaí, na‘á ku kōlenga ki he ‘Otuá ke ne tokoni‘i au ke mahino‘i ‘a e ‘uhinga ‘oku ou ongo‘i ta‘efe‘unga aí.” Na‘e tokoni fēfē ia kiate ia? “Ko e talanoa ki he ‘Otuá kuó ne tokoni‘i au ke ma‘u ‘a e vakai totonu kiate aú, ke sio neongo kapau ‘oku fakahalaia‘i au ‘e hoku lotó, ‘oku ‘ikai ke Ne pehē. Kuo toe tokoni‘i ai au ke ‘oua te u fo‘i kae hanganaki feinga.” Ko e hā ‘a e olá? “Kuo tokoni‘i au ‘e he lotú ke vakai kia Sihova ko ha ‘Otua mo‘oni, anga-‘ofa mo tokanga, ko ha Tamai mo ha Kaume‘a, te ne ‘i ai ma‘u pē ke tokoni‘i au kehe pē ke u hanganaki feinga ke fai ‘a hono finangaló.”

Fakakaukau foki ki he hokosia ‘a Isabel. ‘I he taimi na‘á ne feitama aí, na‘e tala ange ‘e he‘ene toketaá ‘e faingata‘a‘ia lahi ‘ene ki‘i tamá hono fanau‘i maí. Na‘á ne loto-mamahi lahi. Na‘e a‘u ‘o tala ange ‘e he ni‘ihi ke ne fakatooki ia. “Na‘á ku ongo‘i ‘o hangē te u mate ‘i he mamahi kotoa na‘e ‘i hoku lotó.” Ko e hā na‘á ne faí? “Na‘á ku lotu mo lotu ki he ‘Otuá ki ha tokoni,” ko ‘ene leá ia. ‘I he faai atu ‘a e taimí, na‘á ne fanau‘i ha tamasi‘i, ko Gerard, pea na‘á ne poliō. ‘Oku ongo‘i ‘e Isabel na‘e tali ‘e he ‘Otuá ‘ene lotú? ‘Io! ‘I he founga fē? “‘I he‘eku sio ki he‘eku tamasi‘í, ‘okú ne ta‘u 14 he taimí ni, ‘okú ne fiefia neongo ‘ene faingata‘a‘iá,” ko e lea ia ‘a Isabel, “‘Oku ou ‘ilo‘i ko e tali lelei taha ia ki he‘eku ngaahi lotú, ko e tāpuaki lahi taha ia kuo foaki mai ‘e Sihova ko e ‘Otuá kiate aú.”

Ko e ngaahi fakamatala loto-mo‘oni peheé ‘okú ne ‘ai ke tau fakakaukau ki he lea ‘a e tokotaha-tohi-sāmé: “Te ke fanongo ki he tautapa ‘a e anga-vaivaí, ‘e Sihova. Te ke ‘ai honau lotó ke mālohi pea te ke mātu‘aki tokanga kiate kinautolu.” (Saame 10:17) He ngaahi ‘uhinga fakaofo ē ke tau kīvoi ‘i he lotú!

‘Oku hiki ‘i he Tohi Tapú ‘a e ngaahi lotu lahi ‘a Sīsū. Ko ‘ene lotu ‘oku ‘ilo‘i lahi tahá ‘a ē na‘á ne ako‘i ki he‘ene kau ākongá. Ko e hā ‘e lava ke tau ako mei aí?