‘Buka ya botshelo,’ e gape e bidiwang “lokwalo lwa momeno lwa botshelo” kgotsa “buka ya kgakologelo,” e na le maina a batho ba ba nang le tsholofelo ya go amogela mpho ya botshelo jo bo sa khutleng. (Tshenolo 3:5; 20:12; Malaki 3:16) Modimo o tlhopha maina ao a lebile tsela e motho a mo ikobelang ka boikanyegi ka yone.—Johane 3:16; 1 Johane 5:3.

Modimo o bolokile leina la mongwe le mongwe wa batlhanka ba gagwe ba ba ikanyegang mo mogopolong wa gagwe, jaaka e kete o kwadile maina a bone mo bukeng, go tloga ‘fa e sa le lefatshe la batho le thaiwa.’ (Tshenolo 17:8) Go bonala monna yo o ileng a ikanyega e bong Abele, e le motho wa ntlha yo leina la gagwe le neng la kwalwa mo bukeng ya botshelo. (Bahebera 11:4) Le fa go ntse jalo, buka ya botshelo ga se lenaane fela le le sa reng sepe la maina ka gonne e re bontsha gore Jehofa ke Modimo yo o lorato yo o ‘itseng ba e leng ba gagwe.’—2 Timotheo 2:19; 1 Johane 4:8.

A maina a ka phimolwa mo “bukeng ya botshelo”?

Ee. Modimo o ne a bua jaana ka batho ba Iseraele wa bogologolo ba ba neng ba sa mo ikobele: “Le fa e le mang yo o nteofetseng, ke tla mo phimola mo bukeng ya me.” (Ekesodo 32:33) Mme fa re ikanyega, re tla nnela ruri mo ‘lokwalong lwa momeno lwa botshelo.’—Tshenolo 20:12.