LESOGNE 4
Ia o Jesosy Kristy Zao?
1. Ia ty namorogne i Jesosy?
Nagnino o ndatio ro tsy nisalasala nimbamy i Jesosy mbeo?—MATIO 11:29; MARKA 10:13-16.
I Jesosy ty namboaren’Andrianagnahare voaloha’e. Anjely tan-dagnitse agne reke taloha ty niavia’e tan-tane etoy. (Jaona 8:23) Nampiasae i Jehovah tamy ty famorognagne ty raha ila’e ty Jesosy. Atao tihoe Anake ‘bakotokan’Andrianagnahare’ ty Jesosy, satria ie raike avao ty niforogne i Jehovah mivantagne. (Jaona 1:14) “Ty Saontsy” ka ty anognonagne i Jesosy, satria Mpinday ty saontsin’Andrianagnahare reke.—Vakio Ohabolana 8:22, 23, 30; Kolosianina 1:15, 16.
2. Inogne ty anto’e niavia i Jesosy tan-tane etoy?
Nirahen’Andrianagnahare ho an-tane etoy reke, le nazili’e tan-tro i Maria, somondrara raike mbe virjiny. Tsy ndaty areke ty rae i Jesosy. (Lioka 1:30-35) Telo ty anto’e niavia’e tan-tane etoy: 1) Hampianatse ty maregne miomba an’Andrianagnahare, 2) ho modely ho antikagne, satria tsy nivalike reke ndra tie niatreke raha sarotse, sady 3) hagnomey ty ai’e voririke ho “solovoigne.”—Vakio Matio 20:28.
3. Nagnino tikagne ro mila solovoigne?
O solovoigne zao, drala ndra fanagnagne sarobily aloa mba hagnavotagne fiay o ndaty. (Eksodosy 21:29, 30) Tsy ho nimate naho tsy ho niantetse tikagne, naho ty fikasan’Andrianagnahare avao. Ty anto’e, fa nirehake tamy i Adama ty Jehovah, fa naho manota reke vaho izay ho mate. Tsy ho nimate reke naho tsy nanota. (Genesisy 2:16, 17; 5:5) Hazavae ty Baiboly tie naho fa nanota ty Adama, le nanjare mpanota iaby ty tarana’e. Fahafatezagne ty saze voka izay. Hafara’e tsy maintsy mate ty ndaty iaby. Mila i solovoigney areke tikagne, satria voaheloke ho mate voka ty fahota i Adama.—Vakio Romanina 5:12; 6:23.
Ia ro afake magnavotse antikagne? Tsy misy ndaty tsy voririke afake magnomey solovoigne mba hagnafahagne ty fahota ty ndaty hafa. Naho mate tikagne, le ty fahotantikagne avao ro afantikagne.—Vakio Salamo 49:7-9.
4. Inogne ty anto’e nahafate i Jesosy?
Voririke ty Jesosy fa tsy mpanota manahake antikagne. Tsy tihoe nanota reke le nimate, fa mba hagnafahagne ty fahota ty ndaty toy iaby ty nahafate aze. Tea antikagne ty Andrianagnahare, le nirahe’e i Ana’ey mba ho mate ho antikagne. Tea antikagne ka ty Jesosy, kanao nagneke ho mate voka ty fahotantikagne.—Vakio Jaona 3:16; Romanina 5:18, 19.
Henteo ty video Nagnino i Jesosy Nimateo?
5. Inogne ty atao i Jesosy amy hinane zao?
Nagnasitragne ty marare naho namelogne ty mate vaho nandrombake ze nijale ty Jesosy, tamy ie tan-tane etoỳ. Ty ila’e amy ty raha mbe hatao’e amy ty hoavy o raha rehoe. (Matio 15:30, 31; Jaona 5:28) Naho fa nimate ty Jesosy, le vinelon’Andrianagnahare ho fagnahy indraike. (1 Petera 3:18) Nandigne tankavanan’Andrianagnahare eo reke tafara izay, vaho izay tinendre’e ho Mpanjaka. (Hebreo 10:12, 13) Fa Mpanjaka an-dagnitse agne reke amy hinane zao, sady izay ty talily soa ambara ze mpanonjohy ty lia’e magneran-tane.—Vakio Daniela 7:13, 14; Matio 24:14.
Fa marine hampiasa ty fahefà’e ty Jesosy, le hagnafoagne ty fijaleagne naho hagnafoagne ze kila raha mahavy izay. Ze mino naho mankatò aze avao afara izay ro hiaigne amy paradisa an-tane etoỳ.—Vakio Salamo 37:9-11.
