Nimey i Jehovah ho antika ndaty ty tane toy mba hitobohantikagne. Tsy nisaontsy tamy i Adama naho i Eva ty Andrianagnahare tie mamenoa i lagnitsey nareo, satria ty anjely ro namboare’e hitoboke agne. (Joba 38:4, 7) Nampitobohen’Andrianagnahare tagnate ty paradisa mahafinaritse atao tihoe tonda i Edena iareo. (Genesisy 2:15-17) Tea i Jehovah ho sambatse naho ho velogne nainai’e an-tane etoy ty Adama naho i Eva vaho ty tarana’e.​—Vakio Salamo 37:29; 115:16.

I tonda i Edenay avao ro paradisa tamy ty voaloha’e. I Adama naho i Eva ty hiterake naho hameno ty tane toy. Iareo naho ty tarana’e amy izay ty ho nagnova ty tane toy iaby ho paradisa naho fa ela ty ela. (Genesisy 1:28) Tsy hopotehegne ty tane toy. Tsy maintsy hisy ndaty hitoboke avao ty ama’e eo.​—Vakio Salamo 104:5.

Henteo ty video Ino ty Anto’e Namorognan’Andrianagnahare ty Tane Toy?

Tsy nankatò an’Andrianagnahare ty Adama naho i Eva, le niroahe’e boake amy tonda i Edenay ao. Simba i paradisay tafara tatoy, sady tsy nisy ndaty nahavita namboatse aze sasa. Nanomboke tamy izay, le nanjare feno ndaty raty fagnahy ty tane toy.—Joba 9:24.​—Vakio Genesisy 3:23, 24.

Midika vao zay fa tsy vitan’Andrianagnahare ty nagnatanterake i fikasa’ey? Tsy izay. Tompo ty hery reke, le tsy maintsy tanterake ze fikasa’e. (Isaia 45:18) Hovà’e ho paradisa indraike ty tane toy sady hiadagne o ndatio.​—Vakio Salamo 37:11, 34.

Ty fitondrà i Jesosy ty hagneregne aze ho Paradisa. Hitarike o anjelio hey ty Jesosy amy i aly atao tihoe Hara-magedonay, le hamonovono ze ndaty manohetse an’Andrianagnahare. Afara izay, le hogadraegne 1000 taogne ty Satana. Faie harova i Jesosy  ty vahoan’Andrianagnahare. Ho sambatse naho hiaigne nainai’e iareo amy Paradisa an-tane etoỳ.​—Vakio Apokalypsy 20:1-3; 21:3, 4.

Ombiagne vata’e ty Andrianagnahare ro hagnafoagne ze kila raha raty iaby? Nagnomey “famantaragne” ty miomba izay ty Jesosy, sady fa tanterake zay. Trea amy ty loza maro mampijale ty ndaty amy hinane zao tie fa andro fara’e zao. Fa kedekede areke ty sisa, le ho foagne o fijaleagneo.​—Vakio Matio 24:3, 7-14, 21, 22.

Hitondra boake an-dagnitse agne ty Jesosy agnate ty 1000 taogne, le hagnafake ty fijaleagne an-tane etoy. (Isaia 9:6, 7; 11:9) Tsy tihoe Mpanjaka avao reke fa Mpisorom-bey hagnafake ty fahota ze kila ndaty tea an’Andrianagnahare. I Jesosy ty hampiasae i Jehovah hagnafoagne o aretegneo naho o hanteragneo vaho o fateo.​—Vakio Isaia 25:8; 33:24.

Ze mankatò an’Andrianagnahare avao. (1 Jaona 2:17) Nagnirake ty mpiana’e ty Jesosy mba hipay ze mpandefetse naho hampianatse iareo ze raha andilian’Andrianagnahare. Fa an-tapetrisa’e iareo amy hinane zao, sady fa omane i Jehovah hiaigne amy Paradisay ao. (Zefania 2:3) Ampianaregne ho soa fagnahy amy ty vali’e naho ty ana’e ty ndaty manambaly, naho fa amy ty Anjomba fivoria ty Vavolombelo i Jehovah agne. Anjomba i Fanjakagney ty agnara o anjomba iohoe. Miara-mianatse i talily soay ka ty rae aman-drene naho ty ana’e, le mihasoa ty fiaigna iareo.​—Vakio Mika 4:1-4.