“Tena nimafe tamako naho fa nihabey raho satria te hila ajalahy manahake ahy fa tsy somondrara. Nieretseretse raho tie mandalo avao i rahay, faie hatrake amy izao raho le mbe mialy mafe amy ze fagniriako zay avao.”​—David, 23.

 Kristiana ty David, sady te hampifale an’Andrianagnahare. Faie te hila lahilahy manahake aze reke. Hampifale an’Andrianagnahare vao reke naho manao izay? Akore ty fiheveran’Andrianagnahare ty lahilahy sambe lahilahy mifampila ndra ty ampela sambe ampela mifampila?

•  Ino ty rehafe ty Baiboly?

•  Midika vao zay tie...?

•  Faie akore naho...?

 Va’e sambe managne ty heve’e miomba ty lahilahy sambe lahilahy mifampila ndra ty ampela sambe ampela mifampila o ndatio, arakarake ty kolontsai’e. Miovaova ka ty heve o ndatio arakarake i fotoagney. Faie tsy magnorike ze hevetse tea ty maro ty Kristiana, ndra “haviombio ze o karazan-tioke ty fampianaragne iaby zao.” (Efesianina 4:14) Ty fitsipike amy Baiboly ao miomba ty lahilahy sambe lahilahy mifampila ndra ty ampela sambe ampela mifampila (naho ty findesam-batagne hafa) ty orihe’e.

 Mazava soa ty rehafe ty Baiboly miomba ty lahilahy sambe lahilahy ndra ty ampela sambe ampela mifampila. Izao ty rehafegne ao:

•  “Ko mila lahilahy, mitovy amy ty mila ampela.”​—Levitikosy 18:22.

•  “Nengàn’Andrianagnahare hagnorike fanao maloto areke iareo, ... [sady] hagnaram-po amy ty filà ty nofotse mampangorigne. Tsy fanao voajagnahare sasa ty natao ty ampela tamy iareo eo, fa fanao tsy voajagnahare.”​—Romanina 1:24, 26.

•  “Ko mete fitahegne nareo: Fa ndra ty tsy mpivaly mifampila, ndra mpanao masimasy, ndra mpampirafe, ndra lahilahy mila lahilahy, ndra lahilahy mete naho ilaen-dahilahy, ndra mpangalatse, ndra mpihagne, ndra mpimamo lava, ndra mpiteratera, ndra mpandrava, le sambe tsy handova i fanjakàn’Andrianagnaharey iaby.”​—1 Korintianina 6:9, 10.

 Mihatse amy ze kila ndaty o fitsipin’Andrianagnahare reo, ndra lahilahy ty tea i ndatỳ hilaegne ndra ampela. Tsy maintsy mifehe tegna areke ze magniry mafe hanao raha tsy mampifale an’Andrianagnahare.​—Kolosianina 3:5.

 Midika vao zay tie mandrisike antikagne halaigne lahilahy mila lahilahy ty Baiboly?

 Aha’a. Tsy mandrisike antikagne halaigne ndra ia ndra ia ty Baiboly, ndra lahilahy ty tea’e hilaegne ndra ampela. Mandrisike antikagne reke mba ‘hanao ze hilongoagne amy ze kila ndaty’, ndra manao akore ndra manao akore ty findesam-bata’e. (Hebreo 12:14) Tsy mete areke ty mipay aly ndra malaigne ndra mampijale lahilahy mila lahilahy.

 Midika vao zay tie toko’e hanohetse ty lalàna mienga ty lahilahy hanambaly lahilahy ty Kristiana?

 Mirehake ty Baiboly tie lahilahy raike naho ampela raike ty nataon’Andrianagnahare ho mpivaly, sady iareo roe avao ty afake mifampila. (Matio 19:4-6) Mifandrambe amy ty politike ty alihevetse miomba ty lalàna tie afake mifanambaly ty lahilahy sambe lahilahy. Faie tsy toko’e hanao politike ty Kristiana. (Jaona 18:36) Tsy manohagne ndra manohetse ty lalà o fanjakagneo miomba ty lahilahy manambaly lahilahy ndra lahilahy mila lahilahy areke ty Kristiana.

 Faie akore naho fa nila lahilahy ty ndaty raike? Mbe afake miova vao reke?

 Eka. Nisy niova ohatse ze lahilahy nanao hoe izay tamy ty taonjato voaloha’e. Rehafe ty Baiboly tie tsy handova ty Fanjakàn’Andrianagnahare ze lahilahy mila lahilahy. Hoe ka reke: “Fa nanao hoe izay ty ila’e ama’areo.”​—1 Korintianina 6:11.

 Midika vao zay tie naho fa tsy mila lahilahy sasa ty ndaty raike, le tsy managne fagniriagne hanao izay sasa? Aha’a. Hoe ty Baiboly: “Iakanjò ty toetse vaovao, fa havaozegne tsikede ... arakarake ty ahafantara’areo soa ty hamarenagne.” (Kolosianina 3:10) Mandeha tsikede areke i fiovagney.

 Akore naho te hagnorike ty fitsipin’Andrianagnahare ty lahilahy raike, faie mbe magniry mafe hila lahilahy avao reke?

 Sambe afake mifily hifehe ty fagnirian-drati’e ty ndaty tsikiraidraike. Akore ty hanoagne izay? Hoe ty Baiboly: “Mikezaha hagneke hotarihe ty fagnahy lognandro, amy izay tsy hagnatanterake ty fagniria ty nofotse nareo.”​—Galatianina 5:16.

 Mareho fa tsy mirehake o andine’eo tie tsy ombia hanagne fagnirian-draty i ndatỳ. Faie naho fa zatse mianatse Baiboly naho mivavake tsy tapake reke, le hahavita hanohetse i fagniriagne rey.

 Trea i David, i nirehafegne taloha teoy, fa maregne zay, lohotsie naho fa boake nirehake i olagney tamy ty rae aman-drene’e kristiana reke. Hoe reke: “Tena nahatsapa ho maivagnivagne raho. Tahake izay raho fa nirehake tamy iareo taloha, le mba fa nilamin-tsaigne raho hinane zay.”

 Tena sambatse ze magnorike ty fitsipy i Jehovah. Matoky iareo fa ‘mahitsy naho mahafale fo’ i fitsipike rey, sady “ahazoagne valesoa lahibey ty fagnorihagne aze.”​—Salamo 19:8, 11.