Ohin loron, pornografia bele hetan iha fatin hotu-hotu. a Neʼe inklui iha iklan, filme, múzika, livru sira, televizaun, video games, no iha telemovel no internét. Ema barak simu deʼit pornografia. Tuir loloos, se kompara ho tempu uluk, ohin loron ema barak liu iha mundu tomak haree pornografia.—Haree kaixa  “Informasaun kona-ba pornografia.”

Agora pornografia mós troka ba beibeik. Porezemplu profesora ida naran Gail Dines hatete: “Dezeñu no vídeo sira agora aat liu fali uluk. Buat neʼebé uluk ema hanoin mak pornografia makaʼas, agora ema haree hanesan buat neʼebé baibain deʼit.”

Saida mak ita-nia hanoin kona-ba pornografia? Ida-neʼe bele estraga ita ka neʼe mak buat neʼebé baibain deʼit? Pornografia bele hamosu buat neʼebé diʼak ka buat neʼebé aat? Jesus hatete: “Ai hotu neʼebé diʼak fó fuan diʼak, no ai neʼebé aat fó fuan aat.” (Mateus 7:17) Saida mak rezultadu kuandu ema haree pornografia? Atu hatene resposta, mai ita hanoin kona-ba pergunta balu.

BUAT NEʼEBÉ MATENEK-NAʼIN SIRA HATETE: Ema matenek-naʼin sira hatete katak ema neʼebé haree pornografia, susar ba sira atu sees husi toman neʼe no mós kompara ida-neʼe hanesan toman atu uza droga.

Brian, b neʼebé toman atu haree pornografia iha internét, hatete: “La iha buat ida neʼebé bele hapara haʼu. Haʼu sente haʼu la bele kontrola buat neʼebé haʼu hanoin. Dala ruma haʼu-nia isin nakdedar no haʼu-nia ulun sente moras. Haʼu hakaʼas an atu para, maibé tinan barak liutiha neʼe, toman neʼe sei iha nafatin.”

Baibain, ema neʼebé iha toman atu haree pornografia koko atu subar buat neʼebé sira halo. Sira mós bosok ema atu la hatene sira-nia toman neʼe. Rezultadu mak ema barak iha sentimentu oioin hanesan laran-tun, moe, hirus, estrese, sente mesamesak no hakarak atu oho an. Mane ida naran Serge, download pornografia ba ninia telemovel loroloron. Nia hatete: “Haʼu komesa atu hanoin an deʼit. Haʼu sente mesamesak no katak haʼu la iha folin. Haʼu mós sente sala no sente haʼu la bele livre husi ida-neʼe. No tanba haʼu taʼuk no moe kona-ba toman aat neʼe, haʼu lakohi husu ajuda husi ema seluk.”

Maski ema haree liu deʼit, maibé ida-neʼe mós bele kona ema iha dalan neʼebé la diʼak. Matenek-naʼin naran Judith Reisman, neʼebé halo peskiza iha Estadus Unidus kona-ba pornografia, hatete katak pornografia nia dezeñu bele belit iha ema nia neon. Dezeñu sira-neʼe ema bele hanoin-hetan ba nafatin maski sira lakohi. Susan neʼebé tinan 19, pornografia husi internét mosu deʼit iha ninia komputadór. Nia hatete: “Dezeñu sira neʼebé haʼu haree, agora metin ona iha haʼu-nia neon no dala ruma ida-neʼe mosu deʼit iha haʼu-nia hanoin. Haʼu sente haʼu sei nunka bele hamoos ida-neʼe husi haʼu-nia neon.”

LIA-LOOS KONA-BA PORNOGRAFIA: Pornografia bele halo ema sai hanesan atan no bele estraga ema nia moris.—2 Pedro 2:19.

BUAT NEʼEBÉ MATENEK-NAʼIN SIRA HATETE: “Kaben-naʼin sira no família sira bele naksobu tanba ema uza pornografia.”—The Porn Trap, livru husi Wendy no Larry Maltz.

Pornografia bele estraga kaben-naʼin no família sira iha dalan oioin. Porezemplu:

• Halo kaben-naʼin sira la fiar ba malu, la sente besik ba malu, no mós la iha domin ba malu.—Provérbios (Amsal) 2:12-17.

• Halo ema hanoin an deʼit, no la sente kontente ona ho sira-nia kaben.—Efeso 5:28, 29.

• Haburas hakarak seksuál nian neʼebé la diʼak.—2 Pedro 2:14.

• Book ema atu obriga sira-nia kaben halo buat ruma neʼebé nia lakohi halo iha dalan seksuál.—Efeso 5:3, 4.

• Book ema atu halo sala-foʼer ka hanoin beibeik kona-ba halo sala-foʼer ho ema seluk.—Mateus 5:28.

Bíblia fó-hatene ema atu la sai traidór ba malu. (Malaquias [Maleakhi] 2:16) Maibé kuandu ema  halo sala-foʼer, neʼe hanesan sira sai traidór no bele halo moris kaben nian naksobu no halo kaben-naʼin soe malu. Depois, rezultadu mak ida-neʼe bele mós estraga oan sira-nia moris.

Maibé pornografia mós bele estraga oan sira iha dalan seluk. Brian, neʼebé temi ona iha leten, hatete: “Kuandu haʼu halimar hela, haʼu haree haʼu-nia aman nia livru sira kona-ba pornografia. Iha tempu neʼebá haʼu maizumenus tinan sanulu. Haʼu komesa atu haree livru sira-neʼe subasubar, no haʼu la hatene tanbasá mak haʼu gosta atu haree dezeñu sira-neʼe. Ida-neʼe halo haʼu komesa iha toman atu haree pornografia, no maski tinan barak liutiha neʼe, haʼu iha toman neʼe nafatin.” Pornografia bele book labarik no joven sira atu halo relasaun seksuál no halo sala-foʼer beibeik, halo ema nia sentimentu tun-saʼe makaʼas, moras mentál, no book sira atu hatudu violénsia iha dalan neʼebé seksuál.

LIA-LOOS KONA-BA PORNOGRAFIA: Pornografia bele estraga ema nia relasaun ho ema seluk no ikusmai halo ema laran-kanek.—Provérbios (Amsal) 6:27.

BUAT NEʼEBÉ BÍBLIA HATETE: “Neʼe duni, imi sei oho hakarak . . . neʼebé book imi-nia laran, hanesan sala-foʼer, hanoin foʼer, hakarak foʼer, laran-aat, laran karak-teen, neʼebé hanesan adora lulik.”—Koloso 3:5.

Maromak Jeová c odi pornografia. Neʼe la dehan katak nia lakohi ema atu halo relasaun seksuál. Tuir loloos, Maromak mak kria ema iha dalan neʼebé sira bele halo relasaun seksuál nuʼudar kaben-naʼin. Hodi nuneʼe, sira bele hametin sira-nia relasaun, halo kontente ba malu, no hetan haksolok kuandu sira iha oan.—Tiago 1:17.

Tanbasá mak ita bele fiar katak Maromak Jeová odi pornografia? Hanoin toʼok kona-ba razaun balu.

• Nia hatene katak pornografia bele estraga ema nia moris.—Efeso 4:17-19.

• Nia hadomi ita no hakarak proteje ita.—Isaías (Yesaya) 48:17, 18.

• Maromak Jeová hakarak kuidadu ita-nia moris kaben nian no família.—Mateus 19:4-6.

• Nia hakarak ita moos nafatin iha dalan morál no atu hatudu respeitu ba ema seluk nia direitu.—1 Tesalonika 4:3-6.

• Nia hakarak ita atu hafolin ita-nia isin hodi proteje ita-nia kbiit atu iha oan, se hakarak.—Ebreu 13:4.

• Maromak Jeová hatene katak pornografia bele halo ema atu hanoin sala kona-ba buat neʼebé seksuál no tau sira-nia hakarak uluk. No hahalok neʼe halo tuir Satanás nia hanoin kona-ba buat seksuál nian.—Gênesis (Kejadian) 6:2; Judas 6, 7.

LIA-LOOS KONA-BA PORNOGRAFIA: Pornografia estraga ema nia relasaun ho Maromak.—Roma 1:24.

Maibé Maromak Jeová hanoin tebes no ajuda sira neʼebé hakarak hasees an husi pornografia. Bíblia hatete: “Jeová mak laran-sadiʼa no laran-luak, neineik atu hirus no hatudu laran-diʼak neʼebé nakonu ho domin. Nia hatene loos oinsá mak nia kria ita, nia hanoin-hetan katak ita mak rai-rahun.” (Salmo [Mazmur] 103:8, 14) Nia hakarak sira neʼebé haraik-an atu “simu laran-luak no hetan grasa no tulun wainhira ita presiza.”—Ebreu 4:16; haree kaixa  “Hasees an husi pornografia.”

Maromak bele ajuda ita ka lae? Sin, ema barak simu ona Maromak nia ajuda. Haree toʼok buat neʼebé Bíblia hatete kona-ba ema neʼebé manán hasoru toman aat sira: “Imi sai santu ona, imi sai ona ema loos iha Naʼi Jesus Kristu nia naran no iha Maromak nia espíritu.” (1 Korinto 6:11) Loos duni, ema bele manán toman aat neʼe. No hanesan apóstolu Paulo, sira bele hatete: “Haʼu bele halo buat hotu iha Nia neʼebé fó kbiit mai haʼu.”—Filipe 4:13.

Susan, neʼebé manán hasoru ninia toman aat atu haree pornografia, hatete: “Só Maromak Jeová deʼit mak bele ajuda ita atu hasees an husi pornografia. Se ita husu ajuda no matadalan husi nia, ita bele sai moos iha ninia oin. Nia sei nunka husik ita.”