Sala ka lae atu hemu tua?

“Tua-uvas neʼebé halo ema nia laran haksolok, mina neʼebé halo ema nia oin nabilan, no paun neʼebé halo ema hetan forsa.”—Salmo (Mazmur) 104:15.

BUAT NEʼEBÉ EMA HANOIN

Ema balu toman hemu tua iha tempu han, maibé iha mós ema neʼebé hanoin katak sala atu hemu tua. Tansá mak ema iha hanoin oioin kona-ba tua? Neʼe tanba sira-nia kultura la hanesan, sira-nia hanoin kona-ba saúde no sira-nia relijiaun mós la hanesan.

BUAT NEʼEBÉ BÍBLIA HANORIN

Tuir Bíblia, ita labele hemu tua toʼo lanu, maibé la sala atu hemu uitoan. (1 Korinto 6:9, 10) Tuir loloos, husi tempu ulukliu kedas fiar-naʼin mane no feto hemu tua-uvas, no Bíblia temi kona-ba tua ba dala 200 liu. (Gênesis [Kejadian] 27:25) Eclesiastes (Pengkhotbah) 9:7 hatete: “Han bá ó-nia hahán ho laran-haksolok no hemu bá ó-nia tua-uvas ho laran-kontente.” Tanba tua-uvas bele halo ema kontente, ema iha Bíblia nia tempu hemu tua-uvas iha festa oioin, inklui festa kazamentu nian. Iha festa hanesan neʼe mak Jesus Kristu halo milagre primeiru hodi halo bee sai fali tua-uvas neʼebé “diʼak”. (Joao 2:1-11) Tua-uvas mós bele uza nuʼudar ai-moruk.—Lucas 10:34; 1 Timoteo 5:23.

 Oinsá mak ita bele tetu didiʼak kona-ba hemu tua?

‘Keta sai lanu-teen.’—Tito 2:3.

TANBASÁ MAK IDA-NEʼE IMPORTANTE BA ITA

Família rihun ba rihun hetan susar boot tanba inan ka aman lanu-teen. Hemu tua toʼo lanu mós bele lori perigu oioin, hanesan asidente iha dalan. Liután neʼe, neineik-neineik, tua bele estraga ema nia isin, hanesan kakutak, fuan, kabun no aten.

BUAT NEʼEBÉ BÍBLIA HANORIN

Maromak bandu hahalok kaan-teen kona-ba hahán no tua. (Provérbios [Amsal] 23:20; 1 Timoteo 3:2, 3, 8) Maromak la simu ema neʼebé la hatene kontrola an. Bíblia hatete: “Ema lanu-teen mak gozadór no hatudu hahalok arbiru, ema neʼebé lakon dalan tanba tua mak la matenek.”—Provérbios 20:1.

Dala ruma, tua bele halo ema lakon iha dalan morál. Oséias (Hosea) 4:11 hatete: “Tua-uvas . . . mak halakon hakarak neʼebé diʼak.” Mane ida naran João aprende ida-neʼe liuhusi ninia esperiénsia rasik. * Loron ida, nia haksesuk malu ho ninia feen, depois nia bá hemu iha bár, ikusmai lanu no halo sala-foʼer. Liutiha neʼe, nia arrepende an tebes. Hemu tua demais bele estraga ita-nia isin, ita-nia morál no ita-nia relasaun diʼak ho Maromak. Bíblia hatete katak lanu-teen sira sei la hetan moris rohan-laek husi Maromak.—1 Korinto 6:9, 10.

Bainhira mak tempu neʼebé ladiʼak atu hemu tua?

“Ema neʼebé matenek haree perigu no buka atu subar nia an, maibé ema neʼebé ladún iha esperiénsia kontinua laʼo no loloos hetan susar.”—Provérbios (Amsal) 22:3.

TANBASÁ MAK IDA-NEʼE IMPORTANTE BA ITA

Livru World Book Encyclopedia hatete: “Tua mak hanesan droga ida neʼebé makaʼas.” Tan neʼe, iha situasaun balu, ladiʼak duni ba ita atu hemu tua maski uitoan deʼit.

BUAT NEʼEBÉ BÍBLIA HANORIN

Ema balu “kontinua laʼo no loloos hetan susar” tanba sira hemu tua iha tempu neʼebé sala. Bíblia hatete katak “buat hotu-hotu iha nia tempu”, inklui mós tempu atu hasees an husi tua. (Eclesiastes 3:1) Porezemplu iha rai balu, iha lei neʼebé bandu labarik no joven atu labele hemu tua. Ema neʼebé halo tratamentu ba nia moras, karik doutór bandu nia atu labele hemu tua. Ita mós labele hemu tua antes atu bá serbisu ka durante serbisu, liuliu kuandu ita tenke kaer mákina ruma neʼebé bele lori perigu ba ita no ema seluk. Klaru katak ema neʼebé matenek haree moris no saúde nuʼudar prezente folin-boot husi Maromak. (Salmo 36:9) Ita hatudu respeitu ba prezente neʼe hodi halo tuir Bíblia nia matadalan kona-ba hemu tua.