Ukun-Fuan Sanulu mak saida?
Bíblia nia resposta
Ukun-Fuan Sanulu mak mandamentu neʼebé Maromak fó ba nasaun Izraél iha tempu uluk. Ukun-Fuan neʼe mós bolu nuʼudar Liafuan Sanulu, tradusaun husi liafuan Ebraiku asereth haddevarim. Liafuan neʼe mosu dala tolu iha livru Pentateuku (Torah), livru lima primeiru iha Bíblia. (Éxodo 34:28; Deuteronómio 4:13; 10:4) Iha lian Gregu, liafuan neʼebé hanesan tradús nuʼudar deka (sanulu) logous (liafuan), liafuan rua neʼe tau hamutuk sai “dekálogu”.
Maromak hakerek Ukun-Fuan Sanulu iha fatuk-belar rua no fó ida-neʼe ba ninia profeta Moisés iha Foho Sinai. (Éxodo 24:12-18) Ukun-Fuan Sanulu neʼe temi iha Éxodo 20:1-17 no Deuteronómio 5:6-21.
Lista Ukun-Fuan Sanulu
Adora Maromak Jeová mesak deʼit.—Éxodo 20:3.
Labele adora estátua.—Éxodo 20:4-6.
Labele temi Maromak nia naran iha dalan neʼebé la respeitu.—Éxodo 20:7.
Halaʼo loron Sábadu.—Éxodo 20:8-11.
Respeitu inan-aman.—Éxodo 20:12.
Labele oho.—Éxodo 20:13.
Labele halo adultériu.—Éxodo 20:14.
Labele naʼok.—Éxodo 20:15.
Labele fó sasin falsu.—Éxodo 20:16.
Labele kaan buat neʼebé ema seluk nian.—Éxodo 20:17.
Tanbasá iha lista Ukun-Fuan Sanulu neʼebé la hanesan?
Bíblia la fó númeru ba ukun-fuan ida-idak. Tan neʼe, ema balu iha hanoin neʼebé la hanesan kona-ba ukun-fuan sira-nia orden. Baibain, orden ba ukun-fuan sira-neʼe mak hanesan hakerek iha leten. Maski nuneʼe, iha mós lista neʼebé dalan temi la hanesan. Baibain, buat neʼebé la hanesan mak kona-ba orden ba ukun-fuan primeiru, segundu no ikus. a
Tanbasá Maromak fó Ukun-Fuan Sanulu?
Ukun-Fuan Sanulu inklui iha Moisés nia Ukun-Fuan. Iha Ukun-Fuan neʼe, iha mandamentu 600 liu no sai aliansa entre Maromak no nasaun Izraél antigu. (Éxodo 34:27) Maromak promete ba Izraél katak sira sei moris kontente kuandu sira halo tuir Moisés nia Ukun-Fuan. (Deuteronómio 28:1-14) Maski nuneʼe, ukun-fuan sira-neʼe nia objetivu primeiru mak prepara nasaun Izraél atu simu Mesias ka Kristu neʼebé promete nanis ona.—Galásia 3:24.
Ema Kristaun tenke halo tuir Ukun-Fuan Sanulu ka lae?
Lae. Maromak fó Ukun-Fuan sira-neʼe, inklui Ukun-Fuan Sanulu ba nasaun Izraél antigu. (Deuteronómio 5:2, 3; Salmo 147:19, 20) Moisés nia Ukun-Fuan la aplika ba ema Kristaun, ema Kristaun Judeu mós “sai livre ona husi Ukun-Fuan neʼe”. (Roma 7:6) b “Kristu nia ukun-fuan” neʼebé inklui Jesus nia mandamentu hotu ba ninia dixípulu sira mak troka Moisés nia Ukun-Fuan.—Galásia 6:2; Mateus 28:19, 20.
Ukun-Fuan Sanulu bele ajuda ita-nia moris ohin loron ka lae?
Sin. Tanba Ukun-Fuan Sanulu hatudu sai Maromak nia hanoin, ita bele hetan benefísiu se ita estuda kona-ba neʼe. (2 Timóteo 3:16, 17) Ukun-Fuan Sanulu bazeia ba prinsípiu sira neʼebé bele ajuda ema toʼo ohin loron. (Salmo 111:7, 8) Tuir loloos, prinsípiu sira-neʼe barak mak sai hun ba hanorin sira iha Testamentu Foun.—Haree “ Prinsípiu sira husi Ukun-Fuan Sanulu hakerek mós iha Testamentu Foun.”
Jesus hanorin katak Moisés nia Ukun-Fuan, inklui Ukun-Fuan Sanulu bazeia ba mandamentu rua neʼebé importante. Jesus hatete: “‘Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak no ho imi-nia neon tomak.’ Neʼe mak mandamentu neʼebé boot liu no primeiru. Ida segundu neʼebé hanesan mandamentu neʼe mak: ‘Imi tenke hadomi imi-nia maluk hanesan imi-nia an rasik.’ Mandamentu rua neʼe mak hun ba Ukun-Fuan tomak no Profeta sira-nia liafuan.” (Mateus 22:34-40) Entaun, maski ema Kristaun la presiza halo tuir tan Moisés nia Ukun-Fuan, maibé sira simu mandamentu atu hadomi Maromak no mós ema.—João 13:34; 1 João 4:20, 21.
Prinsípiu husi Ukun-Fuan Sanulu hakerek mós iha Testamentu Foun
Prinsípiu |
Referénsia husi Testamentu Foun |
---|---|
Adora Maromak Jeová mesak deʼit |
|
Labele adora estátua |
|
Respeitu Maromak nia naran |
|
Adora Maromak beibeik |
|
Respeitu inan-aman |
|
Labele oho |
|
Labele halo adultériu |
|
Labele naʼok |
|
Labele fó sasin falsu |
|
Labele kaan buat neʼebé ema seluk nian |
a Bazeia ba lista neʼebé ema Judeu mak halo, “Éx[odo] xx. versíkulu 2 mak ‘liafuan’ primeiru, no versíkulu 3-6 mak ukun-fuan ida ka ‘liafuan’ segundu”. (The Jewish Encyclopedia) Maibé ema Katólika sira dehan katak Éxodo kapítulu 20, versíkulu 1-6, mak ukun-fuan ida. Entaun, ukun-fuan neʼebé bandu ema atu la koʼalia aat Maromak nia naran sai fali ukun-fuan segundu. No atu ukun-fuan neʼe iha sanulu, ema Katólika fahe ukun-fuan ikus ba parte rua. Parte primeiru mak labele kaan ema seluk nia feen no parte segundu mak labele kaan ema nia sasán.