Bíblia dehan katak Maromak hakarak ema atu “hasees an husi sala seksuál”. (1 Tesalónika 4:3) Iha Bíblia laran, liafuan “sala seksuál” inklui halo relasaun seksuál ho ema seluk nia feen ka laʼen, hahalok omoseksuál, ka relasaun seksuál entre mane no feto neʼebé la kaben.

•  Tanbasá mak Maromak hakarak ema neʼebé kaben ona deʼit mak bele halo relasaun seksuál?

•  Oinsá se ema ema naʼin-rua hela hamutuk antes kaben atu haree uluk se sira cocok duni ka lae?

•  Oinsá mak moris kaben nian bele kontente?

•   Maromak mak hahú arranju kaben nian. Nia hahú arranju kaben bainhira nia tau hamutuk ema primeiru Adão no Eva, nuʼudar feen-laʼen. (Génesis 2:22-24) Nia lakohi mane no feto atu hela hamutuk se sira la halo juramentu kaben nian.

•   Maromak hatene saida mak diʼak liu ba ema. Maromak hakarak moris kaben nian atu tahan ba nafatin. Tanbasá? Tanba nia hakarak atu proteje ema hotu iha família laran. Moris kaben nian bele kompara hanesan atu monta meza ida. Se ita hakarak susesu, ita tenke halo tuir matadalan husi kompañia neʼe. Hanesan neʼe mós, atu moris kaben nian bele sai kontente, ita tenke halo tuir Maromak nia matadalan. Kuandu ita halo tuir, Ita sei hetan susesu.—Isaias 48:17, 18.

•   Ema neʼebé halo relasaun seksuál maibé seidauk kaben bele hetan konsekuénsia aat. Konsekuénsia balu mak sai isin-rua, hetan moras neʼebé hadaʼet husi relasaun seksuál no laran-susar.

•   Maromak fó mane no feto abilidade atu iha oan liuhusi relasaun seksuál. Ba Maromak, moris mak sagradu, no abilidade atu iha oan mak prezente folin-boot husi nia. Nia hakarak ita atu uza prezente neʼe iha dalan neʼebé hatudu respeitu ba ninia arranju kaben nian.—Ebreu 13:4.

 Iha ema balu neʼebé hela hamutuk antes kaben atu koko haree uluk se sira mak cocok duni atu kaben ka lae. Se sira haree katak sira la cocok, sira lalais atu hakotu sira-nia relasaun. Maibé, neʼe laʼós dalan atu halaʼo moris kaben nian neʼebé kontente. Moris kaben nian bele kontente se feen-laʼen nafatin laran-metin ba malu no hakaʼas an atu rezolve problema hamutuk. a Kaben sei ajuda feen-laʼen atu laran-metin ba malu.—Mateus 19:6.

 La iha moris kaben nian neʼebé perfeitu. Maibé, se feen-laʼen halo tuir Bíblia nia matadalan, sira-nia moris kaben bele kontente. Porezemplu, haree toʼok matadalan balu tuirmai:

•   Tau ita-nia pár nia hakarak uluk liu fali Ita-nian.—1 Korinto 7:3-5; Filipe 2:3, 4.

•   Haburas domin no respeitu ba malu.—Éfeso 5:25, 33.

•   Aprende atu kontrola ita-nia liafuan.—Provérbios 12:18.

•   Hatudu pasiénsia no fó perdua lalais.—Koloso 3:13, 14.