Ema Kristaun fiar katak Jesus mate atu kasu ema hotu nia sala. (1 Pedro 3:18) Maibé, atu bele hetan salvasaun, la toʼo atu fiar deʼit katak Jesus mak Salvadór. Anju aat mós hatene katak Jesus mak “Maromak nia Oan-Mane”, maibé Maromak sei halakon sira, sira sei la hetan salvasaun.​—Lucas 4:41; Judas 6.

•  Saida mak haʼu presiza halo atu bele hetan salvasaun?

•  Saida mak “Sala-naʼin nia orasaun”?

•  “Sala-naʼin nia orasaun” mai husi neʼebé?

•   Ita tenke fiar katak Jesus fó ninia moris nuʼudar sakrifísiu hodi taka ita-nia sala. (Apóstolu 16:30, 31; 1 João 2:2) Neʼe inklui tau fiar katak Jesus moris duni iha tempu uluk no buat hotu neʼebé hakerek iha Bíblia kona-ba nia mak loos.

•   Aprende kona-ba Bíblia. (2 Timóteo 3:15) Bíblia dehan katak apóstolu Paulo no Silas fó-hatene ba guarda komarka nian: “Tau fiar ba Naʼi Jesus, no ó . . . sei hetan salvasaun.” Depois neʼe sira hanorin “Jeová a nia liafuan” ba nia. (Apóstolu 16:31, 32) Ida-neʼe hatudu katak guarda komarka nian bele tau fiar ba Jesus se nia komprende ona hanorin importante balu husi Maromak nia Liafuan. Nia presiza koñesimentu neʼebé loos husi Bíblia.​—1 Timóteo 2:3, 4.

•   Arrepende ita-nia sala. (Apóstolu 3:19) Ita tenke arrepende Ita-nia hanoin no hahalok sala neʼebé uluk Ita halo. Ema seluk bele haree ho klaru katak Ita arrepende an se Ita la halo tan hahalok neʼebé Maromak odi no halo ‘hahalok neʼebé hatudu katak ita arrepende an’.​—Apóstolu 26:20.

•   Hetan batizmu. (Mateus 28:19) Jesus dehan katak ema sira neʼebé sai ninia dixípulu sei hetan batizmu. Guarda komarka nian neʼebé temi iha leten mós hetan batizmu. (Apóstolu 16:33) Hanesan guarda neʼe, ema-lubun neʼebé rona ba Pedro bainhira nia hanorin lia-loos kona-ba Jesus, “ema hotu neʼebé simu ninia liafuan ho laran hetan batizmu”.​—Apóstolu 2:40, 41.

•   Halo tuir Jesus. (Ebreu 5:9) Ema neʼebé “halo tuir mandamentu hotu” husi Jesus hatudu liuhusi dalan neʼebé sira halaʼo sira-nia moris katak sira mak ninia dixípulu. (Mateus 28:20) Sira “sai ema neʼebé halo tuir Maromak nia liafuan, laʼós ema neʼebé rona deʼit”.​—Tiago 1:22.

•   Tahan toʼo rohan. (Marcos 13:13) Jesus nia dixípulu “presiza tahan” atu hetan salvasaun. (Ebreu 10:36) Porezemplu, apóstolu Paulo. Husi loron neʼebé nia sai ema Kristaun toʼo loron neʼebé nia mate, nia nafatin halo tuir Jesus nia hanorin no laran-metin ba Maromak.​—1 Korinto 9:27.

 Iha relijiaun balu, ema hatoʼo orasaun neʼebé hanaran “Sala-naʼin nia orasaun” ka “Orasaun salvasaun nian”. Bainhira ema hatoʼo orasaun neʼe, baibain sira konfesa sira-nia sala no fó sai katak sira fiar Jesus mate atu kasu sira-nia sala. Sira mós husu Jesus atu tama ba sira-nia fuan-laran no mós sira-nia moris. Maibé, Bíblia nunka temi ka haruka ita atu hatoʼo orasaun hanesan neʼe.

 Ema balu hanoin katak kuandu sira hatoʼo “Sala-naʼin nia orasaun”, sira sei hetan duni salvasaun. Maibé la iha ema ida mak hetan salvasaun tanba deʼit halo orasaun hanesan neʼe. Ita hotu ema la perfeitu no kontinua halo sala. (1 João 1:8) Tan neʼe, Jesus hanorin ninia dixípulu sira atu halo orasaun beibeik hodi husu perdua ba sira-nia sala. (Lucas 11:2, 4) Liután neʼe, ema Kristaun balu iha tempu uluk lakon sira-nia esperansa atu hetan salvasaun no moris ba nafatin tanba sira la serbí tan Maromak.​—Ebreu 6:4-6; 2 Pedro 2:20, 21.

 Istória-naʼin sira iha hanoin oioin kona-ba “Sala-naʼin nia orasaun” mai husi neʼebé. Istória-naʼin balu dehan katak toman atu hatoʼo “Sala-naʼin nia orasaun” komesa habelar durante tempu neʼebé relijiaun Protestante mosu (karik hahú husi tinan 1517). Istória-naʼin sira seluk hanoin katak ema komesa hatoʼo “Sala-naʼin nia orasaun” maizumenus iha tinan 200 toʼo 300 liubá kuandu relijiaun Protestante foin mosu. Tuir loloos, Bíblia la anima ita atu repete “Sala-naʼin nia orasaun”. No Bíblia mós hatete katak ita labele repete deʼit ita-nia orasaun.