“குறித்த காலம் வந்துவிட்டது, கடவுளுடைய அரசாங்கம் நெருங்கி வந்துவிட்டது; மக்களே, மனம் திருந்துங்கள், நல்ல செய்தியில் விசுவாசம் வையுங்கள்.”—மாற்கு 1:15, புதிய உலக மொழிபெயர்ப்பு.

 “காலம் நிறைவேறிற்று, தேவனுடைய ராஜ்யம் சமீபமாயிற்று; மனந்திரும்பி, சுவிசேஷத்தை விசுவாசியுங்கள்.”—மாற்கு 1:15, பரிசுத்த வேதாகமம்—தமிழ் O.V. பைபிள்.

 கடவுளுடைய அரசாங்கம் a “சமீபமாயிற்று,” அதாவது “நெருங்கி வந்துவிட்டது” என்று இயேசு கிறிஸ்து சொன்னார். ஏனென்றால், அந்த அரசாங்கத்தின் எதிர்கால ராஜாவாகிய அவர் அப்போது அங்கே இருந்தார்.

 கடவுளுடைய அரசாங்கம் ஏற்கெனவே ஆட்சி செய்ய ஆரம்பித்துவிட்டதாக இயேசு இந்த வசனத்தில் சொல்லவில்லை. அது எதிர்காலத்தில்தான் வரும் என்று அவரே தன் சீஷர்களிடம் பிற்பாடு சொன்னார். (அப்போஸ்தலர் 1:6, 7) ஆனால் மேசியாவாக, அதாவது எதிர்கால ராஜாவாக, அவர் எந்த வருஷத்தில் வருவார் என்று பைபிள் முன்கூட்டியே சொல்லியிருந்ததோ அதே வருஷத்தில் அவர் வந்திருந்தார். b அதனால்தான், “குறித்த காலம் வந்துவிட்டது” என்று சொன்னார்; அதாவது, கடவுளுடைய அரசாங்கத்தைப் பற்றிய சுவிசேஷத்தை (நல்ல செய்தியை) பிரசங்கிக்கும் வேலையை அவர் ஆரம்பிக்க வேண்டிய காலம் வந்துவிட்டதாகச் சொன்னார்.—லூக்கா 4:16-21, 43.

 கடவுளுடைய அரசாங்கத்தைப் பற்றிய நல்ல செய்தியிலிருந்து பயன் அடைவதற்கு மக்கள் மனம் திருந்த வேண்டியிருந்தது. அதாவது, முன்பு செய்த பாவங்களை நினைத்து வருத்தப்படவும், கடவுளுடைய சட்டதிட்டங்களுக்கு ஏற்றபடி வாழவும் வேண்டியிருந்தது. அப்படி மனம் திருந்தியவர்கள், கடவுளுடைய அரசாங்கம் வரப்போகிறது என்ற நல்ல செய்தியில் நம்பிக்கை வைத்ததைக் காட்டினார்கள்.

 கலிலேயா பகுதியில் ஊழியத்தை ஆரம்பித்தபோது இயேசு இந்த வார்த்தைகளைச் சென்னார். “அந்தச் சமயத்திலிருந்து” கடவுளுடைய அரசாங்கத்தைப் பற்றி இயேசு பிரசங்கித்தார் என்று மத்தேயு 4:17 சொல்கிறது. இயேசு பிரசங்கித்த செய்தியின் முக்கியப் பொருளே கடவுளுடைய அரசாங்கம்தான். சொல்லப்போனால், நான்கு சுவிசேஷங்களில் கடவுளுடைய அரசாங்கத்தைப் பற்றி 100-க்கும் அதிகமான தடவை சொல்லப்பட்டிருக்கிறது. c அவை பெரும்பாலும் இயேசு சொன்ன வார்த்தைகள். வேறெந்த விஷயத்தையும்விட கடவுளுடைய அரசாங்கத்தைப் பற்றித்தான் இயேசு அதிகமாகப் பேசினார் என்று பைபிள் பதிவு காட்டுகிறது.