1 Na ke Molimo ea re Bakelang Mathata?
Re Lokela ho Tseba Karabo
Batho ba bangata ha ba batle ho rapela Molimo hobane ba nka hore ke eena ea re bakelang mathata.
Nahana ka Taba Ena
Baeta-pele ba bangata ba bolumeli ba ’nile bua ka ho toba kapa ba fana ka maikutlo a hore Molimo ke eena ea re bakelang lintho tse bohloko. Tse ling tsa lintho tseo ba li buang ke tsena:
-
Molimo o otla batho ka likoluoa tsa tlhaho.
-
Bana ba shoa hobane Molimo a batla mangeloi a eketsehileng leholimong.
-
Molimo o nka lehlakore lintoeng ’me lintoa tsena li baka mesarelo e meholo.
Na ho ka etsahala hore ebe lintho tsee tseo baeta-pele ba bolumeli ba li rutang ka Molimo li fosahetse? Haeba Molimo a sa ba amohele ka lebaka la hore ba ruta mashano ka eena, na re lokela ho kholoa seo ba se rutang?
ITHUTE HAHOLOANYANE
Shebella video e reng Ke Hobane’ng ha U Lokela ho Ithuta Bibele? e fumanehang ho jw.org/st.
Bibele e Re’ng?
Ha se Molimo ea re bakelang mathata.
Haeba re re ke eena ea re bakelang mathata, taba eo e ne e tla be e hanana le seo Bibele e se rutang. Mohlala:
“Litsela tsohle tsa hae ke toka. . . . O lokile ’me o khabane.”—DEUTERONOMA 32:4.
“Ho ke ho be hole le Molimo oa ’nete hore a sebetse bokhopo, le hore Ea Matla ’Ohle a sebetse ka mokhoa o hlokang toka!”—JOBO 34:10.
“Ea Matla ’Ohle ha a khopamise kahlolo.”—JOBO 34:12.
Molimo ha a rate malumeli a rutang mashano ka eena.
Taba ena e akarelletsa malumeli a kenellang lintoeng le liqhoebeshanong le a reng ke Molimo ea re bakelang mathata.
“Baprofeta ba profeta leshano ka lebitso la ka [Molimo]. Ha kea ka ka ba roma, leha e le ho ba laela kapa ho bua le bona. Ba bua le lona ka tsela ea boprofeta ka pono ea bohata . . . le ho qhekella ha lipelo tsa bona.”—JEREMIA 14:14.
Jesu o ile a nyatsa boikaketsi bo teng bolumeling.
“Hase e mong le e mong ea reng ho ’na, ‘Morena, Morena,’ ea tla kena ’Musong oa maholimo, empa ho tla kena ea etsang thato ea Ntate ea maholimong. Letsatsing leo, ba bangata ba tla re ho ’na ‘Morena, Morena, na ha rea ka ra profeta ka lebitso la hao, le ho leleka bademona ka lebitso la hao, le ho etsa mesebetsi e matla e mengata ka lebitso la hao?’ Leha ho le joalo ka nako eo ke tla ba bolella: ‘Ha kea ka ka le tseba le ka mohla! Tlohang ho ’na, lona ba etsang tlolo ea molao.’ ”—MATHEU 7:21-23.
Mohlomong u ka Rata le
LIPOTSO TSA BIBELE LIA ARAJOA
Na Molimo ke Eena ea re Bakelang Mahlomola?
Mahlomola a ka hlahela motho leha e le ofe—esita le bao Molimo a ba ratang. Hobane’ng?
LIPOTSO TSA BIBELE LIA ARAJOA
Ke Hobane’ng ha Molimo a Lumeletse Bajuda ho Bolaoa ka Sehlōhō Ntoeng ea II ea Lefatše?
Batho ba bangata ba ’nile ba botsa hore na ke hobane’ng ha Molimo ea lerato a lumeletse mahlomola a mangata hakaale. Bibele e fana ka likarabo tse khotsofatsang!
MOLULA-QHOOA
Ke Hobane’ng ha re E-ba le Mathata, Na Ebe ke Hobane Molimo a re Otla?
Na Molimo o otla batho ka likoluoa le ho kula ka lebaka la libe tsa bona?
