Dipaki Tsa Jehova di latela keletso ya Bibele ya hore di se ke tsa arabela diqoso tsohle tse etswang kgahlanong le tsona. Ka mohlala, maele a Bibele a re: “Ya kgalemelang mosomi o inkela ho se hlomphehe.” (Liproverbia 9:​7, 8; 26:4) Ho e na le hore re ngangisane le batho ka lebaka la diqoso tsa bohata, re tsepamisa mohopolo wa rona ho etseng thato ya Modimo.​—Pesaleme ya 119:69.

 Ha e le hantle, ho na le “nako ya ho kgutsa le nako ya ho bua.” (Moeklesia 3:7) Re araba batho ba ikokobeditseng ba batlang ho tseba seo e leng nnete ka rona, empa re qoba dingangisano tse se nang thuso. Ka ho etsa jwalo, re latela dithuto le mehlala ya Jesu le ya Bakreste ba boholoholo.

•   Jesu ha a ka a araba ha a ne a qoswa ka bohata ka pela Pilato. (Matheu 27:11-​14; 1 Petrose 2:​21-​23) Hape, Jesu ha a ka a araba diqoso tse neng di etswa kgahlanong le yena tsa hore ke letahwa le hore ke monyollo. Ho e na le hoo, o ile a dumella diketso tsa hae di ipuelle jwalo ka ha Bibele e bontsha: “Bohlale bo pakwa ke mesebetsi ya bona hore bo lokile.” (Matheu 11:19) Ha maemo a ne a mo susumelletsa ho etsa jwalo, o ne a araba ka sebete ba neng ba mo nyefola.​—Matheu 15:​1-3; Mareka 3:​22-​30.

   Jesu o ile a ruta balatedi ba hae hore ba se ke ba nyahamiswa ke diqoso tsa bohata. O ile a re: “Ho thaba lona ha batho ba le nyedisa mme ba le hlorisa mme ka leshano ba bua ntho ya mofuta o mong le o mong e kgopo ka lona ka lebaka la ka.” (Matheu 5:​11, 12) Le ha ho le jwalo, Jesu o ile a boela a re haeba ho hlokahala hore balatedi ba hae ba fane ka bopaki, o ne a tla phethahatsa tshepiso eo a e entseng ha a ne a re: “Ke tla le fa melomo le bohlale, tseo bahanyetsi bohle ba lona ba ke keng ba kgona ho di hanyetsa kapa ho di phehisa.”​—Luka 21:12-​15.

•   Moapostola Pauluse o ile a eletsa Bakreste hore ba qobe ditsekisano tse se nang molemo le batho ba ba hanyetsang ha a re ditsekisano tse jwalo ha di “ruise molemo mme ke tsa lefeela.”​—Tite 3:9; Baroma 16:17, 18.

•   Moapostola Petrose o ile a kgothatsa Bakreste ka hore ba emele tumelo ya bona ha ho kgonahala. (1 Petrose 3:​15) Empa o ile a hlokomela hore boitshwaro bo botle bo molemo ho feta seo motho a se buang. O ile a ngola a re: “Ka ho etsa se molemo le ka kgutsisa puo e hlokang tsebo ya batho ba se nang kahlolo e molemo.”​—1 Petrose 2:​12-​15.