Sono singunobe ngusiphi sento, indlela lotiva ngayo, nobe umcabango longahambisani netimiso taNkulunkulu. Sifaka ekhatsi kwephula imitsetfo yaNkulunkulu ngekwenta lokubi nobe lokungakalungi emehlweni aNkulunkulu. (1 Johane 3:4; 5:17) LiBhayibheli liphindze lichaze sono ngekutsi kwehluleka kwenta lokulungile.​—Jakobe 4:17.

 Etilwimini tekucala teliBhayibheli, emagama latsi sono bekasho “kugeja luphawu.” Sibonelo nje, licembu lemasotja aka-Israyeli wasendvulo belinelikhono lekudubula litje ngesidubulelo futsi ‘lingageji.’ Leligama lelitsi kungageji, nalihunyushwa lingasho “kungoni.” (Tikhulu 20:16) Ngako, kona kusho kugeja luphawu lolutimiso taNkulunkulu letiphelele.

 Njengemdali, Nkulunkulu unelilungelo lekubekela bantfu timiso. (Sembulo 4:11) Sitawulandzisa kuye ngetento tetfu.​—KubaseRoma 14:12.

Kungenteka yini kutsi umuntfu angoni sanhlobo?

 Cha. LiBhayibheli litsi “bonkhe bonile, futsi abakwati kuveta inkhatimulo yaNkulunkulu.” (KubaseRoma 3:23; 1 Emakhosi 8:46; Umshumayeli 7:20; 1 Johane 1:8) Kungani kunjalo?

 Bantfu bekucala, bo-Adamu na-Eva, badalwa bete sono. Loko kungenca yekutsi badalwa ngemfanekiso waNkulunkulu. (Genesisi 1:27) Nobe kunjalo, kuba bete sono kwabaphelela ngobe abamlalelanga Nkulunkulu (Genesisi 3:5, 6, 17-19) Nasebaba nebantfwana bendlulisela kubo sono njengelifa. (KubaseRoma 5:12) Njengobe iNkhosi Davide yaka-Israyeli yasho: “Ngatalwa nginesono.”​—Tihlabelelo 51:5.

Tikhona yini tono letimbi kunaletinye?

 Yebo. Sibonelo nje, liBhayibheli litsi emadvodza aseSodoma yasendvulo ‘bewenta tintfo letimbi, ona kakhulu’ futsi ‘tono tawo betitinyenti kakhulu.’ (Genesisi 13:13; 18:20) Cabanga ngetintfo letintsatfu letichaza kutsi sibi kangakanani sono.

1.   Bukhulu baso. LiBhayibheli lisecwayisa kutsi sibalekele tono letimbi njengekutiphatsa kabi ngekwelicansi, kukhonta titfombe, kweba, kudzakwa, bugebengu, kubulala kanye nekusebentisa imimoya. (1 KubaseKhorinte 6:9-11; Sembulo 21:8) LiBhayibheli alitifananisi letono leti netono lotente ungakacondzi, njengekusho nobe kwenta lokutsite lokuvisa lomunye umuntfu buhlungu. (Taga 12:18; Kubase-Efesu 4:31, 32) Nobe kunjalo, liBhayibheli lisikhutsata kutsi singatibukeli phansi letinye tono, ngobe tingaholela ekwenteni tono letinkhulu.​—Matewu 5:27, 28.

2.   Imbangela yekusenta. Letinye tono tentiwa ngenca yekungayati imitsetfo yaNkulunkulu. (Imisebenti 17:30; 1 KuThimothi 1:13) Ngisho nobe lingavumi kutsi letono tentiwe, liBhayibheli liyatehlukanisa kuleto letentiwa ngemabomu. (Numeri 15:30, 31) Tono letentiwa ngemabomu tivela ‘enhlitiyweni lembi.’​—Jeremiya 16:12.

3.   Emahlandla lesentiwe ngawo. LiBhayibheli liphindze livete umehluko emkhatsini wesono lesentiwe kanye, nesono lesentiwe emahlandla. (1 Johane 3:4-8) Labo ‘labenta sono ngemabomu,’ ngisho sebakwati lokulungile, batfola sehlulelo saNkulunkulu.​—KumaHebheru 10:26, 27.

 Labo labatisolako ngetono letinkhulu labatentile bangativa bacindzetelekile ngenca yalokona kwabo. Sibonelo nje iNkhosi Davide yabhala: “Ngobe tono tami tiyangengama; angisakhoni kutetfwala, setifana nemtfwalo lowesindzako.” (Tihlabelelo 38:4) Nobe kunjalo liBhayibheli lisiniketa lelitsemba: “Umuntfu lomubi akashiye indlela yakhe nalokhohlakele akayekele imicabango yakhe; akabuyele kuJehova lotawuba nemusa kuye, abuyele kuNkulunkulu wetfu ngobe utamtsetselela ngekukhululeka lokukhulu.”​—Isaya 55:7.