NgeMgcibelo, mhlaka 13 April 2024, António Guterres lowengamele inhlangano yaMhlabuhlangene washo nankha emavi nakakhuluma ngekuhlaselwa kwelive laka-Israyeli yi-Iran, watsi: “Nyalo sesikhatsi sekutsi sitibambe sente lesimo sibe ncono futsi singabi yingoti.”

 Imphi leka-Israyeli isibonelo saloko lokwenteka emhlabeni wonkhe.

 “Lamuhla emhlabeni kunetimphi letinyenti kunaleto letake taba khona kusukela ngemphi yelive yesibili, futsi titsintsa bantfu labangaba ngu-2 billion.”​—United Nations Security Council, January 26, 2023.

 Emave lanetimphi afaka ekhatsi live laka-Israyeli, iGaza, iSyria, i-Azerbaijan, i-Ukraine, iSudan, i-Ethiopia, iNiger, iMyanmar, kanye neHaiti. a

 Kutawuphela nini lokulwa? Baholi bemave bangakuletsa yini kuthula? Litsini liBhayibheli?

 Timphi letikhonta emhlabeni lamuhla tiluphawu lwekutsi madvutane tonkhe timphi titawuphela. Letimphi tigcwalisa siphrofetho seliBhayibheli lesimayelana nesikhatsi lesiphila kuso. LiBhayibheli libita lesikhatsi setfu ngekutsi ‘kuphela kwalelive.’​—Matewu 24:3.

•   “Nitawuva ngetimphi. . . . sive sitawuvukela lesinye sive, nembuso uvukele lomunye umbuso.”​—Matewu 24:6, 7.

 Fundza sihloko lesitsi “Sitawubona Ngani Kutsi Sesiphila ‘Emalangeni Ekugcina’?” kuze ubone kutsi timphi letikhona lamuhla tisigcwalisa njani siphrofetho seliBhayibheli.

 LiBhayibheli lisitjela kutsi timphi letibangelwa bantfu titawuphela. Kutawenteka njani loko? Angeke kwentiwe bantfu, kodvwa kutawentiwa yi-Amagedoni, lokuyimphi “yelilanga lelikhulu laNkulunkulu Somandla.” (Sembulo 16:14, 16) Ngemuva kwalemphi, Nkulunkulu utawufeza setsembiso sakhe sekutsi bonkhe bantfu bajabulele kuthula.​—Tihlabelelo 37:10, 11, 29.

 Kuze utfole lokunyenti ngalemphi yaNkulunkulu letawucedza tonkhe timphi, fundza sihloko lesitsi “Iyini Impi Ye-Armagedoni?,” lesitfolakala ngesiZulu.