NGUMUPHI umbono lovumelana nawo kulena lemibili? Bantfu labanyenti ayabadvudvuta emavi aSawula waseThasusi lophindze abitwe ngekutsi ngumphostoli Pawula. (Imisebenti 17:26, 27) LiBhayibheli linawo lamanye emavi lagcizelela umcondvo lofanako. Nasi sibonelo: Ngesikhatsi Jesu athantaza watjela balandzeli bakhe kutsi bebangamati Nkulunkulu.​—Johane 17:3.

Ngakulolunye luhlangotsi tati tefilosofi njengaPhilo betinalomunye umbono. Beticabanga kutsi angeke simati Nkululnkulu ngobe angeke size simcondze. Singalitfola kuphi liciniso?

LiBhayibheli lisitjela ngalokucacile kutsi tikhona vele tintfo lesingeke siticondze ngaNkulunkulu. Nasi sibonelo: Budzala bakhe, kukhalipha kwengcondvo yakhe, nekuhlakanipha kwakhe angeke sikucondze nobe sikulinganise. Loku kujule kakhulu kutsi umuntfu angakucondza. Kodvwa loko angeke kusivimbe kutsi simati Nkulunkulu. Nanobe singeke siticondze letinye tintfo, kodvwa kuzindla ngato ngiko lokungasisita ‘sisondzele kuNkulunkulu.’ (Jakobe 4:8) Asesicoce ngaletinye tintfo lesingeke siticondze ngaNkulunkulu. Ngemuva kwaloko sitawubese sifundza ngetintfo lesingaticondza ngaNkulunkulu.

IMINYAKA YANKULUNKULU: LiBhayibheli litsi Nkulunkulu bekasolo akhona “kusukela phakadze kuze kube phakadze.” (Tihlabelelo 90:2) Loku kusho kutsi Nkulunkulu ute sicalo nesiphetfo. LiBhayibheli litsi: “Bunyenti beminyaka yakhe bungetulu kwekubala kwemuntfu.”​—Jobe 36:26.

Kutakusita ngani kwati loku: Nkulunkulu utsembisa kutsi bonkhe labamatiko batawutfola kuphila lokuphakadze. (Johane 17:3) Besingakwetsemba kanjani loko kube Nkulunkulu akaphili phakadze? Kute longagcwalisa lesetsembiso ngaphandle ‘kweNkhosi yaphakadze.’​—1 Thimothi 1:17.

IMICABANGO YANKULUNKULU: LiBhayibheli litsi: “Nekucondza kwakhe kute longakuphenyisisa” ngobe imicabango yakhe iphakeme kakhulu kuneyetfu. (Isaya 40:28; 55:9) LiBhayibheli linembuto losenta sicabange lotsi: “Ngubani lowati imicabango yaJehova, kangangekutsi angate ameluleke?”​—1 Khorinte 2:16.

Kutakusita ngani kwati loku: Nkulunkulu uyakhona kulalela imithantazo yetigidzi tebantfu ngesikhatsi sinye. (Tihlabelelo 65:2) Kute jolwane lowela phansi Nkulunkulu angaboni. Kuyoke kwenteke yini kutsi Nkulunkulu angasakhoni kulalela imithantazo yetfu? Akuyoze kwenteke loko ngobe imicabango yakhe ijule kakhulu. Lokunye lokwenta angasikhohlwa kutsi ‘sibaluleke kwendlula bojolwane labanyenti.’​—Matewu 10:29, 31.

IMISEBENTI YAKHE: LiBhayibheli lifundzisa kutsi bantfu angeke bakhone “kuyicondza imisebenti yaNkulunkulu kusukela ekucaleni kwayo kuze kube ngusekugcineni.” (Umshumayeli 3:11) Ngako-ke asiyoze sati konkhe ngaNkulunkulu. Kuhlakanipha kwakhe “kujule kakhulu!” (Roma 11:33) Nanobe kunjalo, Nkulunkulu utembulile tindlela takhe kubantfu labamlalelako.​—Amose 3:7.

Kutakusita ngani kwati loku: Nawufundza liBhayibheli nobe ulitadisha utawutfola tintfo letinsha ngaNkulunkulu. Loko kusho kutsi sitawuchubeka sisondzelana naBabe wetfu losezulwini kuze kube phakadze.

Kungacondzi tintfo letitsite ngaNkulunkulu akusho kutsi ngeke sisamati sanhlobo. Kunyenti lokubhalwe eBhayibhelini lokusisita kutsi simati kahle Nkulunkulu. Asesicoce nganati tibonelo letilandzelako:

LIBITO LANKULUNKULU: LiBhayibheli lifundzisa kutsi Nkulunkulu unalo ligama. EBhayibhelini Nkulunkulu utsi: “NginguSimakadze [Jehova NW] lelo libito lami!” Ligama laNkulunkulu livela tikhatsi letingu-7 000 eBhayibhelini futsi kute lelinye ligama lelivela kanyenti njengalo.​—Isaya 42:8.

Kutakusita ngani kwati loku: Jesu wafundzisa bantfu kutsi babothantaza batsi: “Babe wetfu losezulwini, alingcweliswe libito lakho.” (Matewu 6:9) Nawe ungalisebentisa ligama laNkulunkulu nawuthantaza. Jehova utawubasindzisa bonkhe bantfu labalisebentisako ligama lakhe.​—Roma 10:13.

INDZAWO YAKHE YEKUHLALA: LiBhayibheli likhuluma ngetindzawo letimbili tekuhlala​—lizulu nemhlaba. Lizulu ngulakuhlala khona tingelosi bese kutsi emhlabeni ngulakuhlala khona bantfu. (Johane  8:23; 1 Khorinte 15:44) LiBhayibheli nalikhuluma ‘ngelizulu’ lisuke lisho ‘indzawo’ lesingeke sikhone kuyibona. Kulapho-ke ‘lakuhlala’ khona uMdali wetfu.​—1 Emakhosi 8:43.

Kutakusita ngani kwati loku: Kwati loku kutakusita kutsi umati kahle Nkulunkulu. Jehova Nkulunkulu ukhona mbamba futsi unendzawo yakhe yekuhlala, akekho kuyo yonkhe indzawo. Ngisho nobe angekho kuyo yonkhe indzawo ‘kute indalo lefihlekile emehlweni akhe.’​—Hebheru 4:13.

BUNGUYE BANKULUNKULU: LiBhayibheli lifundzisa kutsi Nkulunkulu ungumuntfu lokahle. “Nkulunkulu ulutsandvo.” (1 Johane 4:8) Akawacambi emanga. (Thithusi 1:2) Akakhetsi, uneluvelo, uyephuta kutfukutsela unemusa. (Eksodusi 34:6; Imisebenti 10:34) Labanye abakholwa kutsi Nkulunkulu uyafuna kuba ngumngani wabo.​—Tihlabelelo 25:14.

Kutakusita ngani kwati loku: Nawe ungaba ngumngani waNkulunkulu. (Jakobe 2:23) Nasewumati Nkulunkulu kutsi ungumuntfu lonjani utawukhona kucondza letinye tincenye letiseBhayibhelini.

LiBhayibheli limchaza kahle Nkulunkulu. Ngalokwehlukile kuloko lokushiwo bantfu, Nkulunkulu ufuna kutsi umati kahle. LiVi lakhe liBhayibheli litsembisa kutsi ‘nasimfuna, sitamtfola.’ (1 Tikhronike 28:9) Kufundza liBhayibheli uphindze uzindle ngalo kutakusita kutsi umati. Nawenta njalo Nkulunkulu “utawusondzela” kuwe.​—Jakobe 4:8.

Mhlawumbe uyatibuta, kungenteka njani kutsi ngibe ngumngani wemuntfu lengingati konkhe ngaye? Asesitsi unemngani longudokotela, kudzingeka kutsi nawe ufundzele budokotela yini? Cha akudzingeki! Nanobe ungasuye dokotela kodvwa nisengaba bangani. Lokubalulekile kutsi umati umngani wakho longudokotela kutsi utsandzani nekutsi yini langayitsandzi. Ngendlela lefanako liBhayibheli limchaza kahle Jehova kutsi unjani, nguloko lokudzingako kute wakhe bungani naye.

LiBhayibheli alisitjeli lwati loluncane ngeMdali wetfu kodvwa lisitjela konkhe lokufanele sikwati kute sibe bangani bakhe. Uyafuna yini kwati lokunyenti ngaJehova? BoFakazi BaJehova baneluhlelo lwekufundzisa bantfu ngeliBhayibheli emakhaya abo. Sicela utsintsane naBoFakazi labasendzaweni yangakini nobe ungene ku-website, letsi www.pr418.com/ss.