Ngakhululela etindzaweni letehlukene letise-Los Angeles, eCalifornia, e-U.S.A., letidvume ngekuba netigebengu nekusetjentiswa kwetidzakamiva. Ekhaya besingu-6, futsi mine bengiwesibili.

Sikhule siya namake esontfweni lase-evangelical. Kodvwa ngesikhatsi ngiseminyakeni yekutfomba, ngangiphila imphilo lemphacambili. NgemaSontfo bengihlabela ekwayeni yasesontfweni. Emkhatsini weliviki bengiya emaphathini, ngibhema tidzakamiva futsi ngitiphatsa kabi ngekwelicansi.

Bengisheshe ngihlutfuke futsi nginebudlova. Bengisebentisa nome ngabe yini lesedvutane nangilwa. Akuzange kungisite lebengikufundza esontfweni. Bengivame kutsi: “Imphindziselo yeNkhosi futsi mine ngilithulusi layo!” Ngasekupheleni kwa-1960 ngesikhatsi ngisesikolweni lesiphakeme, licembu lepolitiki lokutsiwa yiBlack Panthers langifaka umoya lomubi, futsi belidvume ngekulwela emalungelo ebantfu. Ngaba lilunga lenyonyane lelwela emalungelo ebafundzi. Sasitoyitoya emahlandla lamanyenti futsi njalo nasitoyitoya sikolwa besivalwa kwesikhashana.

Njengobe bengisidlova, kutoyitoya akuzange kungenetise. Lubandlululo lwangibangela kutsi ngiphatse kabi labanye. Ngikhumbula nje ngalelinye lilanga, nginebangani bami sibukela emafilimu lebekakhombisa indlela bantfu labamnyama labebagcilatwa ngayo eMelika. Sicansulwe nguloko lebesikubukele, sashaya bontsanga yetfu lababelungu lebesibukela nabo lamafilimu. Ngemuva kwaloko saya etindzaweni letibomakhelwane, sitfungatsa labanye belungu lesingabashaya.

Ngesikhatsi sengilibhobhodlelana, mine nabomnaketfu besesatiwa njengetigebengu letinkhulu. Besivame kucabana nemaphoyisa. Umnaketfu lomncane bekasecenjini letigebengu letiyingoti, futsi nami ngagcine sengikulelicembu. Besengenta tintfo letimbi kakhulu.

Batali balomunye umngani wami bebaBoFakazi BaJehova. Bangimema kutsi ngite esifundvweni, futsi ngavuma. Nangifika nje, ngavele ngabona kutsi BoFakazi behlukile. Bonkhe bebanemaBhayibheli futsi bebawavula nakuchubeka umhlangano. Ngisho nebantfwana bebabeka tinkhulumo! Ngajabula kwati kutsi ligama laNkulunkulu nguJehova, nekutsi bebambita ngalo. (Tihlabelelo 83:18, NW.) Lelibandla belakhiwa bantfu betive letehlukene, kodvwa kwakucaca kutsi bete lubandlululo.

 Ekucaleni, bengingafuni kufundza liBhayibheli naBoFakazi BaJehova, kodvwa bengikutsandza kuya emihlanganweni yabo. Ngalelinye lilanga ebusuku, ngesikhatsi ngisesifundvweni, bangani bami baya emdansweni. Nabefika lapho, bashaya lomunye umntfwana loseminyakeni yekutfomba waze wafa ngobe abengafuni kubanika silamba sakhe sesikhumba. Ngakusasa, bebatishaya sifuba ngekubulala lomfana. Ngesikhatsi kutekwa licala labo enkantolo, bebahlekisa ngaloko lebebakwentile. Labanyenti babo banikwa sigwebo sekudzilikelwa lijele. Ngajabula kakhulu ngekutsi bengingakahambi nabo ngalelo langa. Ngase ngishintja kuphila kwami futsi ngacala kufundza liBhayibheli.

Njengobe ngakhula nginelubandlululo, indlela lebebaphila ngayo BoFakazi yangimangalisa. Ngikhumbula ngalelinye lilanga lomunye umzalwane longumlungu washiya bantfwana bakhe emndenini webazalwane labamnyama ngesikhatsi aye ngesheya kwetilwandle. Ngikhumbula nangesikhatsi lomunye umzalwane lomnyama aswele indzawo yekuhlala lomunye umndeni walabamhlophe wamhlalisa. Ngabona kutsi BoFakazi BaJehova bayakwenta loko lokushiwo ngemavi aJesu lakuJohane 13:35 latsi: “Nangabe nitsandzana, bonkhe batawukwati kutsi nibafundzi bami.” Kwangikhanyela kutsi ngitfole inkholo yeliciniso.

Kufundza liBhayibheli kwangenta ngabona kutsi kudzingeka ngishintje indlela lengicabanga ngayo. Bekufanele ngishintje ingcondvo yami hhayi nje kuphela kute ngibe nekuthula nalabanye kodvwa ngobe lena kwakuyindlela lencono kakhulu yekuphila. (Roma 12:2) Kancane kancane, ngatfutfuka. NgaJanuary 1974, ngabhajatiswa ngaba nguFakazi WaJehova.

Ngisho nangemuva kwekubhajatiswa, kwadzingeka kutsi ngichubeke ngitibambe. Ngalelinye lilanga sishumayela emtini ngemuti, lesinye sigebengu seba iwayilesi emotweni yami futsi ngasichosha. Njengobe besengitewusikhandza, salahla phansi lewayilesi. Nangicocela labanye lebesihamba nabo ensimini ngendlela lengiyitfole ngayo lewayilesi, lomunye lomdzala welibandla wangibuta watsi: “Stephen, bewutasentani lesigebengu kube usibambile?” Lombuto wangenta ngacabanga futsi wangikhutsata kutsi ngichubeke ngitimisela kuba nekuthula nalabanye.

Nga-October 1974, ngacala kuba sikhonti sasikhatsi sonkhe, bengisebenta ema-awa langu-100 ngenyanga ngifundzisa bantfu liBhayibheli. Ngekuhamba kwesikhatsi, ngaba nelilungelo lekuvolontiya endlunkhulu yaBoFakazi BaJehova leseBrooklyn, eNew York. Nga-1978, ngabuyela eLos Angeles kute nginakekele make njengobe bekagula. Ngemuva kweminyaka lemibili, ngashada Aarhonda umfati wami lengimtsandzako. Bekalusito lolukhulu kimi njengobe besinakekela make kwaze kwabangulapho ashona. Ngekuhamba kwesikhatsi, mine na-Aarhonda samenywelwa eSikolweni SeliBhayibheli SaseGileyadi sabese sitfunyelwa ePanama, lapho sititfunywa telivangeli khona.

Ngisho nobe senginguFakazi, tinyenti timo letangivelela lebetingangenta ngigcine ngiphunyukelwe sandla. Sengifundze kutsi nangabe bantfu bayangisukela ngivele ngibashiye nobe ngisebentise letinye tindlela kute ngente simo sibe ncono. Bantfu labanyenti, ngisho nemfati wami imbala, bayangincoma ngendlela lengenta ngayo etimeni letinjengaleti. Nami iyangijabulisa indlela lengenta ngayo! Akusiko kutsi ngitishaya sifuba ngalolushintjo lolwenteke ekuphileni kwami. Esikhundleni saloko, ngikholelwa kutsi lokwenteke kimi kubufakazi bekutsi liBhayibheli linemandla ekugucula kuphila.​—Hebheru 4:12.

Kufundza liBhayibheli kwente kuphila kwami kwaba nenjongo futsi kwangifundzisa kutsi ngibe nekuthula sibili. Angisabashayi bantfu, kunaloko, sengiyabasita kutsi babe nebuhlobo lobuhle naNkulunkulu. Ngagcina sengifundzela umuntfu lobekasitsa sami liBhayibheli futsi wagcine sekabhajatisiwe. Ngemuva kwaloko, sahlala kanye kanye sikhatsi lesidze. Nanyalo sisebangani labakhulu. Kuze kube ngulamuhla, mine nemkami sisite bantfu labangetulu kwa-80 kutsi babe BoFakazi BaJehova ngekubafundzela liBhayibheli.

Ngimbonga kakhulu Jehova ngekungipha kuphila lokunenjongo nalokujabulisako enkholweni yeliciniso.