Ngatalelwa endzaweni yasemakhaya eSaxony, lebeyibitwa ngekutsi yi-German Democratic Republic (GDR). Imphilo beyimnandzi ekhaya, ngihlala nebantfu labanelutsandvo futsi batali bami bangifundzisa indlela lekahle yekutiphatsa. I-GDR beyibuswa ngemaKhomanisi, ngako bantfu labanyenti bebangenandzaba nenkholo. Nami bengitsi Nkulunkulu akekho. Ngaze ngaba neminyaka lengu-18 budzala solo kuphila kwami kulawulwa kungakholelwa kuNkulunkulu kanye nebuKhomanisi.

Kungani bengibutsandza kangaka buKhomanisi? Bengitsandza lombono wekutsi bonkhe bantfu bayalingana. Ngetulu kwaloko, bengikholelwa kutsi umnotfo kufanele wabiwe ngekulingana kuze kube bete lonjinge kakhulu nobe lophuye kakhulu. Ngako ngasebenta enhlanganweni yebantfu labasha, leholwa ngemaKhomanisi. Nangineminyaka lengu-14 budzala, bengenta umsebenti wekugaya kabusha emaphepha. Baphatsi belidolobha lase-Aue bawujabulela umsebenti lebengiwenta, baze banginika imendlela. Nanobe bengisemncane, ngatfola litfuba lekwati baholi be-GDR. Bengicabanga kutsi ngitibekele imigomo lemihle futsi likusasa lami belitawuba lihle.

Kodvwa ngekuhamba kwesikhatsi tintfo tashintja. Nga-1989 Lubondza lwaseBerlin lwadzilitwa futsi loku kwabangela kutsi kubusa kwemave ebuKhomanisi laseMphumalanga neYurophu kuphele. Kwase kwenteka tintfo letinyenti letetfusako ngekulandzelana. Ngekushesha nje ngatfola kutsi bekwenteka tintfo letimbi e-GDR. Sibonelo saloku kutsi bantfu labanyenti lebebangabusekeli buKhomanisi bebabukelwa phansi. Kwenteka njani loku? Kantsi tsine maKhomanisi besingakholelwa yini kutsi bonkhe bantfu bayalingana? Kambe ngabe buKhomanisi bebungasiyo yini intfo sibili? Ngakhatsateka kakhulu.

Ngenca yaloko, ngayishintja imigomo yami, ngase nginaka umculo nekudvweba. Njengobe bengisesikolweni lesifundzisa umculo, benginelitsemba lekutsi ngitawugcine ngiye enyuvesi kute ngigcine sengingumhlabeleli. Ngetulu kwaloko, ngayiyekela imikhuba yami lemihle lebengifundziswe yona nangisemncane. Intfo lebeseyibaluleke kakhulu kimi bekukutijabulisa, lokufaka ekhatsi kuba netintfombi letinyenti. Nobe kunjalo, umculo, kudvweba kanye nekwenta nobe yini lengiyifunako akuzange kukucedze kukhatsateka kwami. Ngisho netitfombe  lebengitidvweba betikhombisa kutsi ngiyesaba. Belingiphatseleni likusasa? Beyiyini injongo yekuphila?

Ngamangala kakhulu nangitfola timphendvulo talemibuto. Ngalelinye lilanga kunguntsambama, bengihleti nalabanye bafundzi esikolweni sicoca ngelikusasa. Besifundza naMandy  * lobekanguFakazi WaJehova. Ngalelolanga wangilayela umtfombo lobewutangisita ngitfole timphendvulo lebengitifuna. Watsi: “Andreas, nangabe ufuna timphendvulo mayelana nekuphila nelikusasa, fundza liBhayibheli.”

Bengingakwetsembi loko lebekakusho, kodvwa ngancuma kulifundza liBhayibheli kuze ngitfole timphendvulo. Mandy watsi angifundze Danyela sehluko 2, futsi loko lengakufundza kwangimangalisa kakhulu. Lesiphrofetho sikhuluma ngemibuso lebeyitawubusa kuze kube sesikhatsini setfu. Mandy waphindze wangikhombisa naletinye tiphrofetho lebetikhuluma ngelikusasa letfu. Ekugcineni ngatitfola timphendvulo temibuto yami! Ngubani vele lowabhala letiphrofetho, nalobekangakhona kushaya emhlolweni nakabiketela likusasa? Kungenteka yini kutsi vele ukhona Nkulunkulu?

Mandy wangihlanganisa naBoFakazi labashadene, boHorst na-Angelika labangisita kutsi ngilicondze kahle liBhayibheli. Ngekushesha nje, ngabona kutsi BoFakazi BaJehova ngibo kuphela labasebentisa ligama laNkulunkulu lelitsi Jehova futsi bafundzise nalabanye ngalo. (Tihlabelelo 83:18; Matewu 6:9) Ngafundza nekutsi Jehova Nkulunkulu utsi bantfu batawuphila phakadze emhlabeni lolipharadisi. Tihlabelelo 37:9 titsi: “Labalindzela Simakadze bayakudla lifa lemhlaba.” Kwangijabulisa kwati kutsi lelitfuba livulekele bonkhe bantfu labenta loko lokushiwo nguNkulunkulu eBhayibhelini.

Nanobe kunjalo, akuzange kube melula kushintja indlela lebengiphila ngayo kute ngente loko lokushiwo liBhayibheli. Kuba ngumhlabeleli lodvumile kwangenta ngatigcabha, ngako kwadzingeka kutsi ngifundze kutfobeka kucala. Ngetulu kwaloko, bekulukhuni kuyekela kutiphatsa kabi. Ngiyajabula ngekutsi Jehova unemusa futsi uyababeketelela labo labenta konkhe lokusemandleni abo kuze bente loko lokufundziswa liBhayibheli!

Bukhomanisi kanye nekungakholelwa kuNkulunkulu bekusolo kulawula imphilo yami ngaze ngaba neminyaka lengu-18; kodvwa ngemuva kwaloko liBhayibheli labese liyayishintja indlela lebengiphila ngayo. Loko lengakufundza kwakucedza nya kukhatsateka kwami ngelikusasa futsi kwangenta ngaphila kuphila lokunenjongo. Nga-1993 ngabhatjatiswa, ngaba nguFakazi WaJehova futsi nga-2000 ngashada naTabitha, naye lobekanguFakazi lokhutsele. Sihlale sisita labanye kutsi balati kahle liBhayibheli. Labanyenti lesihlangana nabo bakhuliswe njengami, bangemakhomanisi futsi abakholelwa kuNkulunkulu. Ngiyakujabulela kubafundzisa ngaJehova.

Nangicala kutihlanganisa naBoFakazi BaJehova, batali bami batfukutsela kakhulu. Nanobe kunjalo, bayibonile indlela kuphila kwami lokushintje ngayo kusukela ngacala kutihlanganisa naBoFakazi. Lokungijabulisa kakhulu kutsi nabo sebafundza liBhayibheli futsi sebaya nasemihlanganweni yaBoFakazi BaJehova.

Mine naTabitha sinemshado lojabulisako ngobe setama kwenta loko lokufundziswa liBhayibheli. Kulalela seluleko salo lesimayelana nekwetsembeka emshadweni kuyawucinisa umshado wetfu.​—Hebheru 13:4.

Sekute lengikwesabako ekuphileni futsi angisakhatsateki ngelikusasa. Sengijabulela kuthula mbamba kanye nebunye lobukhona emkhatsini webazalwane labasemhlabeni wonkhe. Kute loncono kunalomunye emkhatsini wetfu. Nguloku kanye lebengikukholelwa futsi bengifuna kuphila ngalendlela kuphila kwami konkhe.