Choong Keon naJulie, emaKhristu lashadene lasemkhatsini weminyaka yabo-30 budzala, bekangemahlahlandlela lavamile eSydney, e-Australia kwate kwaba seminyakeni lecishe ibe sihlanu leyendlulile. Choong Keon utsi: “Besenta umsebenti wekutiphilisa wesikhashana futsi besiphila imphilo lentofontofo. Kulendzawo lebesihlala kuyo, simo selitulu besisihle nemphilo yakhona beyimnandzi. Besikujabulela kuba sedvute netihlobo tetfu kanye nebangani.” Nobe kunjalo, Choong Keon naJulie bebadliwa ngunembeza. Kungani? Kungobe bebati kutsi timo tabo betibavumela kutsi bente lokunyenti emsebentini waJehova, kodvwa bebangabata kwenta lushintjo lobeludzingeka.

Ngemuva kwaloko, emhlanganweni lobewukhona nga-2009, beva inkhulumo leyabatsintsa tinhlitiyo. Sikhulumi sakhuluma nalabo labebangakhona kutfutfukisa umsebenti wabo. Satsi: “Cabanga ngaloku: Umshayeli angakhona kujikisa imoto yakhe iye ngesencele nome ngesekudla kuphela nangabe ihamba. Ngendlela lefanako, Jesu angasicondzisa kutsi sandzise umsebenti wetfu kuphela nakukhona lesikwentako—nasenta konkhe lokusemandleni etfu kuze sifinyelele umgomo wetfu.” * Choong Keon naJulie beva shengatsi lesikhulumi besikhuluma nabo ngalokucondzile. Kuwo wona loyo lomhlangano, kwacocwa nalamanye emaKhristu lashadene latitfunywa telivangeli eTaiwan. Achaza injabulo layitfolako ensimini futsi agcizelela kutsi lunyenti lusito lobelusadzingeka. Nangaleso sikhatsi, boChoong Keon naJulie beva shengatsi lamavi atjelwa bona.

Julie utsi: “Ngemuva kwaloyo mhlangano, sathantaza kuJehova samcela kutsi asiphe sibindzi kute sikhone kutfutsela eTaiwan.” Uchubeka atsi: “Kodvwa besesaba kakhulu. Kwaba shengatsi sitawutijika edamini lelishonako kwekucala ngca.” Umbhalo lowabasita kutsi batsatse leso sinyatselo nguMshumayeli 11:4, lotsi: “Lowo lonaka umoya angeke aze ahlanyele; nalowo lolindzela emafu emvula angeke aze avune.” Choong Keon utsi: “Sancuma kutsi siyekele ‘kunaka umoya nekulindzela emafu’ bese sicala ‘kuhlanyela nekuvuna.’” Baphikelela emthantazweni, bafundza  tindzaba tekuphila tetitfunywa telivangeli, babhalelana nalabo lebesebavele batfutsele eTaiwan, batsengisa timoto tabo nefenisha yabo, futsi batfutsela eTaiwan ngemuva kwetinyanga letintsatfu.

Bazalwane nabodzadze labangetulu kwa-100 labasuka kulamanye emave bakhonta eTaiwan etindzaweni letinesidzingo lesikhulu sebamemeteli beMbuso. Basuka e-Australia, eBritain, eCanada, eFrance, eJapan, eKorea, eSpain naseMelika, futsi iminyaka yabo isukela kulengu-21 kuya kulengu-73 budzala. Emkhatsini wabo kunabodzadze labangakashadi labangetulu kwa-50. Yini lesite labazalwane nabodzadze labakhutsele kutsi bashumayele kulelinye live? Ase sibone.

Laura, longudzadze longakashadi losuka eCanada, ulihlahlandlela enshonalanga yeTaiwan. Abengakutsandzi sanhlobo kushumayela kwate kwaba seminyakeni lecishe ibe lishumi leyendlulile. Laura utsi: “Bengingawutsandzi umsebenti wekushumayela ngobe bengingacitsi sikhatsi lesinyenti kuwo.” Bangani bakhe baseCanada bacela kuhamba naye eMexico kute bashumayele lapho inyanga yinye. Utsi: “Kwaba kwekucala ngca kutsi ngicitse sikhatsi lesidze ensimini, futsi ngamangala ngobe ngakujabulela loko!”

Lesikhatsi lesijabulisako Laura laba naso samkhutsata kutsi acabangele kutfutsela ebandleni lelikhuluma lolunye lulwimi eCanada. Wacala kufundza siShayina, wahlanganyela ecenjini lesiShayina, futsi watibekela umgomo wekutfutsela eTaiwan, lawufinyelela ngaSeptember 2008. Laura utsi: “Kwangitsatsa umnyaka wonkhe kwetayelana nendzawo lensha lebesengihlala kuyo, kodvwa nyalo angikucabangi nekukucabanga kubuyela eCanada.” Utiva njani ngemsebenti wekushumayela? Utsi: “Ngiwujabulela kakhulu. Kute intfo lengenta ngenetiseke kwendlula kubona indlela bantfu lengibafundzela liBhayibheli labashintja ngayo kuphila kwabo nasebamati Jehova. Kukhonta eTaiwan kunginikete litfuba lekutfola lenjabulo lenkhulu tikhatsi letinyenti.”

Brian naMichelle, emaKhristu lashadene lasemkhatsini weminyaka lengu-30 budzala lasuka eMelika,  batfutsela eTaiwan eminyakeni lengaba siphohlongo leyendlulile. Ekucaleni, beva shengatsi kuncane kakhulu labakhona kukufeza emsebentini wekushumayela. Kodvwa lomunye losanesikhatsi lesidze asitfunywa selivangeli watsi kubo: “Ngisho nobe ningakhona kuhambisa lipheshana nje kuphela, kufanele nikhumbule kutsi kungenteka loyo muntfu uyacala kuva ngaJehova. Ngako nisuke nifeze indzima lebalulekile emsebentini wekushumayela!” Lamavi lakhutsatako abasita boBrian naMichelle kutsi bangapheli emandla. Lomunye umzalwane watsi kubo: “Kute ningativa nidvumatekile, ningayikali lilanga ngalinye intfutfuko yenu ekufundzeni lulwimi lwesiShayina, kodvwa bukani kutsi senitfutfuke kangakanani kusuka kulomunye umhlangano kuya kulomunye.” Ngaleyo ndlela bakhona kutfutfuka, futsi lamuhla bangemahlahlandlela laphumelelako.

Yini lengakukhutsata kutsi ufundze lolunye lulwimi? Yetama kuvakashela live longatsandza kukhonta kulo. Yani emihlanganweni, utihlanganise nebazalwane nabodzadze bakuleyo ndzawo futsi uhambe nabo ensimini. Brian utsi: “Nasewuyibonile indlela labanyenti labawulalela ngayo umlayeto weMbuso futsi wabona lutsandvo lwebazalwane nabodzadze, utawukhutsateka kutsi uyokhonta kulelinye live.”

Emahlahlandlela lamanyenti lakhonta lapho kunesidzingo lesikhulu khona eTaiwan, atisekela ngekufundzisa siNgisi. Kristin naMichelle batsengisa tinhlanti. Kristin utsi: “Bengingakaze sengikwente loko, kodvwa lomsebenti wangisita kutsi ngikhone kuchubeka nekuhlala kulelive.” Ngekuhamba kwesikhatsi, Kristin watfola bantfu labebeta batewutsenga ngasosonkhe sikhatsi. Lelitoho labasita kutsi bakhone kutisekela ngetimali, futsi libaniketa sikhatsi lesenele sekunaka umsebenti wabo lobalulekile, lokungumsebenti wekuba ngemahlahlandlela, babe badwebi bebantfu.

William naJennifer, emaKhristu lashadene lasuka eMelika, befika eTaiwan eminyakeni lengaba sikhombisa leyendlulile. William utsi: “Kufundza lulwimi, kuba ngemahlahlandlela, kunakekela libandla nekwetama kutiphilisa bekumatima ngaletinye tikhatsi.” Yini lebasite kutsi baphumelele futsi bahlale bajabulile? Batibekela imigomo labangakhona kuyifinyelela. Nasi sibonelo: Ngenca yekutsi bebangakalindzeli lokukhulu nabafundza siShayina, abazange badvumateke ngesikhatsi babona kutsi abatfutfuki ngekushesha.

William ukhumbula kutsi lomunye umbonisi lojikeletako wake wamtjela kutsi ngemuva kwekutibekela umgomo lotsite ekukhonteni Nkulunkulu, kufanele atijabulele tinyatselo latitsatsako letitamenta awufinyelele. Utsi kusebentisa leseluleko kwamsita yena nemkakhe kutsi bavumelane netimo, balalele seluleko sebazalwane bakuleyo ndzawo, futsi bashintje indlela labenta ngayo tintfo kute baphumelele nabashumayela kulelinye live. Wengeta atsi: “Loko kwaphindze kwasisita kutsi sikhumbule kutinika sikhatsi sekubuka buhle balesihlenge lesabelwe kuso.”

NjengaWilliam naJennifer, Megan, dzadze longakashadi lolihlahlandlela losuka eMelika, uyawujabulela umsebenti wakhe futsi ngesikhatsi lesifanako wetama kufinyelela umgomo wakhe wekusikhuluma kahle siShayina. Kuto tonkhe timphelasontfo uhamba nelicembu lebamemeteli labashumayela ensimini lemnandzi kakhulu lesesikhumulweni semikhumbi saseKaohsiung, lokusikhumulo semikhumbi lesikhulu kunato tonkhe eTaiwan. Megan ukhonile kushumayela tindzaba letimnandzi emkhunjini ngamunye nekushumayela kubadwebi betinhlanti labasuka eBangladesh, eNdiya, e-Indonesia, ePhilippines, eThailand, naseVanuatu. Utsi: “Njengobe badwebi betinhlanti bacitsa sikhatsi lesincane esikhumulweni, sicala nabo sifundvo seliBhayibheli ngaso leso sikhatsi. Kute ngikhone kucoca nabo bonkhe, ngivame kufundza nalabane nobe labasihlanu babo ngesikhatsi sinye.” Uchuba njani ekufundzeni siShayina? Utsi: “Ngifisa shengatsi bengingakhona kufundza ngekushesha, kodvwa ngihlale ngikhumbula emavi lengake  ngawatjelwa ngulomunye umzalwane latsi: ‘Yenta konkhe lokusemandleni akho, Jehova utakusita ngako konkhe lokunye.’”

Ngaphambi kwekutsi Cathy, losuka eBritain atfutse, wahlola kutsi ngusiphi sabelo sakulelinye live lebesingaba yindzawo lephephile njengobe angudzadze longakashadi. Wathantaza kuJehova wamchazela ngaloko lobekumkhatsata futsi wabhalela emahhovisi emagatja lehlukahlukene, wabuta kutsi ngutiphi tingoti letingaba khona kubodzadze labangakashadi. Ngemuva kwaloko, wacabangisisa ngetimphendvulo latitfola futsi waphetsa ngekutsi kuncono aye eTaiwan.

Nga-2004, ngesikhatsi aneminyaka lengu-31 budzala, Cathy watfutsela eTaiwan, futsi wetama kuphila imphilo lemelula. Utsi: “Ngabuta bazalwane nabodzadze kutsi ngutiphi tindzawo letincono lebengingatsenga kuto titselo netibhidvo ngemanani laphansi. Loko labangitjela kona kwangisita kutsi ngikhone konga imali.” Yini lemsita kutsi achubeke aphila imphilo lemelula? Cathy utsi: “Ngihlale ngithantaza kuJehova ngimcele kutsi angisite ngenetiseke ngekudla lokumelula lengikudlako nangetimphahla lengitigcokako letingakaduli. Ngiva shengatsi Jehova uyayiphendvula imithantazo yami ngekungisita kutsi ngikhone kubona tidzingo tami futsi ngingeva buhlungu nangingakutfoli konkhe lengikufunako.” Uchubeka atsi: “Kuyangijabulisa kuphila imphilo lemelula ngobe kungisita kutsi ngihlale nginake buhlobo bami naNkulunkulu.”

Nobe kunjalo, Cathy akagcini nje ngekuphila imphilo lemelula kodvwa uphila imphilo lejabulisako. Nakachaza sizatfu saloko utsi: “Ngishumayela endzaweni lenebantfu labatilalelako tindzaba letimnandzi. Loko kungijabulisa kakhulu!” Ngesikhatsi efika eTaiwan, bekunemabandla lamabili esiShayina kulelidolobha lacala kukhonta kulo njengelihlahlandlela, kodvwa lamuhla sekunemabandla lasikhombisa. Cathy utsi: “Kutibonela ngewami lokwandza lokukhulu lokube khona nekuba nencenye kulomsebenti wekuvuna kwenta kuphila kwami kujabulise lilanga ngalinye!”

Tintfo tibahambela njani boChoong Keon naJulie lesikhulume ngabo ekucaleni kwalesihloko? Ekucaleni Choong Keon bekeva shengatsi kungasati kahle siShayina bekumenta angabi lusito lolungako ebandleni. Kodvwa bazalwane bakuleyo ndzawo bebangacabangi njalo. Choong Keon utsi: “Ngesikhatsi libandla letfu lehlukaniswa liba ngemabandla lamabili, nganiketwa leminye imitfwalo leminyenti njengenceku lesebentako.” Akhuluma ngenjabulo uchubeka atsi: “Ngaleso sikhatsi ngeva kutsi bengikhonta lapho kunesidzingo lesikhulu khona. Bekungijabulisa kakhulu kwati kutsi nami bebangidzinga!” Lamuhla ukhonta njengalomdzala welibandla. Julie wengeta atsi: “Sitiva sifeze lokunyenti, senetisekile futsi sijabule kakhulu kunakucala. Seta kulendzawo kute sisite, kodvwa siva shengatsi kusitakele tsine ngalokuhlangenwe nako lokujabulisako lesikutfolile. Siyambonga Jehova ngekusivumela kutsi sitewukhonta kulendzawo!”

Emaveni lamanyenti, kusenesidzingo setisebenti letinyenti kulomsebenti wekuvuna. Sewuyacedza yini esikolweni, futsi mhlawumbe uyatibuta kutsi utawentani ngekuphila kwakho? Usengakashadi yini futsi mhlawumbe unesifiso sekuba lusito lolukhulu enhlanganweni yaJehova? Ungatsandza yini kutsi umndeni wakho ube netintfo letinyenti longatikhumbula emsebentini waJehova? Sewutsetse umhlala phansi yini futsi unalokuhlangenwe nako lokunyenti longakucocela labanye? Ungaciniseka kutsi utawutfola tibusiso letinyenti nawandzisa umsebenti wakho ngekutsi ukhonte lapho kunesidzingo lesikhulu khona sebamemeteli beMbuso.