KATHERINE wakhulela eMelika futsi ngesikhatsi aneminyaka lengu-16 budzala wabhajatiswa waba ngulomunye waBoFakazi BaJehova. Abesebenta kamatima ensimini kodvwa bebabancane bantfu lebebawutsandza umlayeto weMbuso endzaweni lebekashumayela kuyo. Utsi: “Ngafundza lokuhlangenwe nako kwebantfu labathantaza kuNkulunkulu bacela kutsi abaletsele umuntfu longabasita kutsi bamati. Ngangifisa kumtfola umuntfu lonjalo, kodvwa loko akuzange kwenteke.”

Ngemuva kwekushumayela iminyaka letsite endzaweni lefanako, Katherine wacala kucabangela kutfutsela kulenye indzawo lapho bantfu bebangawemukela khona umlayeto weMbuso. Kodvwa abetibuta kutsi utawukhona yini. Abeke wahamba kanye kuphela ekhaya ekuphileni kwakhe futsi wahamba emaviki lamabili nje kuphela. Kuleso sikhatsi abekhumbula ekhaya onkhe emalanga. Nanobe kunjalo, sifiso sakhe lesisuka enhlitiyweni sekutivela injabulo yekusita bantfu labafuna Jehova saba nemandla. Ngemuva kwekubuka tindzawo letimbalwa labengatfutsela kuto, wabhalela ligatja laseGuam futsi watfola imininingwane labeyidzinga. NgaJuly 2007, ngesikhatsi aneminyaka lengu-26 budzala, Katherine watfutsela eSaipan, esihlengeni lesisePacific Ocean, lesingemakhilomitha langaba ngu-10 000 kusuka ekhaya kubo. Tahamba njani tintfo?

Ngemuva kwesikhashana nje afike ebandleni lelisha, Katherine wahlangana naDoris, umfati loseminyakeni yabo-40 budzala lowemukela sifundvo seliBhayibheli. Ngemuva kwekutsi sebafundze tehluko tekucala letintsatfu tencwadzi letsi Lokufundziswa LiBhayibheli, Katherine wacala kukhatsateka. Utsi: “Doris abengumfundzi lokahle kakhulu futsi bengingafuni kona tintfo. Angizange sengichube sifundvo seliBhayibheli futsi bengititjela kutsi Doris udzinga kufundzelwa ngudzadze lonalokuhlangenwe nako, mhlawumbe locishe alingane naye.” Katherine wathantaza wacela Jehova kutsi amsite atfole dzadze lokahle langamnika lesifundvo sakhe seliBhayibheli. Ngemuva kwaloko, wabese ukhetsa kutjela Doris ngelushintjo lobelutawuba khona kubantfu lebebamfundzela.

Katherine utsi: “Ngatsi nje ngisengakacali kukhuluma ngalendzaba, Doris wangitjela kutsi ufuna kukhuluma nami ngenkinga letsite. Ngemuva kwekumlalela, ngamtjela ngendlela Jehova langisite ngayo kute ngihlangabetane nesimo lesifanako ekuphileni. Wabonga.” Ngemuva kwaloko Doris watjela Katherine watsi: “Jehova usebentisa wena kute angisite. Ngelilanga  lekucala nje ufika lakami, besekuphele ema-awa lamanyenti ngifundza liBhayibheli. Ngangikhala, ngicela Nkulunkulu kutsi atfumele umuntfu lotangisita ngilicondze liBhayibheli. Kwatsi kusenjalo, wanconcotsa emnyango wami. Jehova wawuphendvula umthantazo wami!” Emehlo aKatherine avele agcwale tinyembeti nakacoca ngalendzaba letsintsa inhlitiyo. Utsi: “Emavi aDoris abeyimphendvulo yemthantazo wami. Jehova wangikhombisa kutsi bengingakhona kuchubeka nalesifundvo.”

Doris wabhajatiswa nga-2010 futsi nyalo uchuba tifundvo teliBhayibheli letimbalwa. Katherine utsi: “Kungijabulisa kakhulu kutsi sifiso lebenginaso sikhatsi lesidze sekusita umuntfu lonenhlitiyo lecotfo kutsi abe sikhonti saJehova sifezekile.” Lamuhla, Katherine ujabulela kukhonta njengelihlahlandlela lelikhetsekile esihlengeni sasePacific lesiseKosrae.

Bazalwane nabodzadze labangetulu kwelikhulu labasuka etindzaweni letikhashane (labasukela eminyakeni lengu-19 kuya kulengu-79 budzala) bakhonta lapho kunesidzingo lesikhulu khona eMicronesia. Indlela labazalwane labakhutsele labativa ngayo ivetwa kahle nguloko lokwashiwo ngu-Erica, lowatfutsela eGuam nga-2006 ngesikhatsi aneminyaka lengu-19 budzala. Utsi: “Kumnandzi kakhulu kuba lihlahlandlela endzaweni lapho khona bantfu bomele liciniso. Ngibonga kakhulu kutsi Jehova wangisita ngakhetsa loluhlobo lwemsebenti. Lunguyona ndlela lencono kakhulu yekuphila!” Lamuhla, Erica ujabulela kukhonta njengelihlahlandlela lelikhetsekile e-Ebeye esihlengeni saseMarshall. Kuliciniso kutsi kukhonta kulelinye live kunetinsayeya tako. Asesicoce ngaletintsatfu tato futsi sibone kutsi labo labatfutsele eMicronesia bahlangabetana njani nato.

Indlela yekuphila. Ngemuva kwekufika esihlengeni sasePalau nga-2007, Simon loneminyaka lengu-22 budzala watfola kutsi utawuhola incenye lencane yemali lebekayihola eveni lakubo eNgilandi. “Kwadzingeka ngifundze kungatsengi nome ngayini lengiyifunako. Nyalo ngikukhetsa ngekucophelela kudla lengitakutsenga futsi ngicale ngicatsanise linani lentsengo kuletinye titolo bese ngitsenga lapho kuncono khona. Nangabe kukhona lokwephukile, ngitsenga lokuke kwasebenta futsi ngicele lotsite longangisita kutsi ngikulungise.” Kumtsintse njani kuphila imphilo lemelula? Simon utsi: “Kungisite ngabona kutsi yini lebaluleke mbamba ekuphileni, nekutsi ngingaphila njani ngalokuncane lenginako. Sandla saJehova lesinakekelako ngisibone ngalokucacile emahlandla lamanyenti. Kuleminyaka lesikhombisa ngikhonta kulendzawo, angikake ngeswele kudla nendzawo yekulala.” Ecinisweni, Jehova uyabasekela labo labaphila imphilo lemelula ngesizatfu sekutsi bafuna kubeka uMbuso kucala ekuphileni kwabo.—Mat. 6:32, 33.

Kukhumbula ekhaya. Erica utsi: “Ngisondzelene kakhulu nemndeni wakitsi, futsi bengikhatsatekile kutsi kukhumbula ekhaya bekutawuphatamisa umsebenti wami.” Yini layenta kute atilungiselele? Utsi: “Ngesikhatsi ngisengakatfutsi, bengifundza tihloko letiku-Sicongosekulindza letikhuluma ngekukhumbula  ekhaya. Loku kwenta inhlitiyo yami yakulungela kuhlangabetana nalensayeya. Kulesinye sihloko, ngafundza ngalomunye make lowacinisekisa indvodzakati yakhe ngekutsi Jehova uyanakekelana, watsi: ‘Jehova utakunakekela kancono kunami.’ Lesicinisekiso sangikhutsata kakhulu.” Hannah nendvodza yakhe Patrick bakhonta eMajuro esihlengeni saseMarshall. Kuze Hannah alwisane nekukhumbula ekhaya, unaka kakhulu bazalwane nabodzadze labasebandleni. Utsi: “Ngihlale ngimbonga njalo Jehova ngebazalwane betfu labasemhlabeni wonkhe ngobe nabo bangumndeni wami. Ngaphandle kwelusito lwabo, bengingeke ngikhone kukhonta lapho kunesidzingo lesikhulu khona.”

Kwemukeleka. Simon utsi: “Nawufika kulelinye live, ukhandza tonkhe tintfo tehlukile. Ngihle ngikukhumbula kwenta emahlaya bantfu labatawacondza.” Erica utsi: “Ekucaleni, ngativa nginganakwa, kodvwa loko kwangisita kute ngicabangisise ngesizatfu lesangenta ngatfutsa. Angizange ngitfutsele kutizuzisa mine, kodvwa kuze ngentele Jehova lokunyenti.” Uchubeka atsi: “Ngekuhamba kwesikhatsi, ngacala kutfola bangani labakahle, futsi lengibatsandza kakhulu.” Simon wasebenta kamatima kute afundze siPalauan, lokwamenta wakhona ‘kuvula inhlitiyo yakhe’ kubazalwane nabodzadze bakuleyo ndzawo. (2 Khor. 6:13) Imetamo yakhe yekufundza lolulwimi yenta bazalwane bamtsandza. Ecinisweni, lapho bazalwane bendzawo basebentisana nebazalwane labatfutsile, bonkhe bajabulela bungani lobusedvute ebandleni. Ngutiphi letinye tinzuzo letitfolwa ngulabo labatinikela ngekutitsandzela kute bakhonte lakunesidzingo lesikhulu khona?

Umphostoli Pawula watsi: ‘Loyo lohlanyela kakhulu utawuvuna kakhulu.’ (2 Khor. 9:6) Kuyacaca kutsi lesimiso lesivetwe kulombhalo sisebenta kulabo labandzisa umsebenti wabo wekushumayela. Ngutiphi titselo ‘labativuna kakhulu’ eMicronesia?

Asesemanyenti ematfuba ekucala tifundvo teliBhayibheli eMicronesia, futsi utibonele ngewakho indlela labatfutfuka ngayo bantfu labafundza emaciniso laseVini laNkulunkulu baphindze bawasebentise. BoPatrick naHannah bebashumayela nase-Angaur, sihlenge lesincane lesinebantfu labangu-320. Ngemuva kwekushumayela lapho tinyanga letimbili, bahlangana nalomunye make lokhulisa bantfwana ayedvwana. Ngekushesha wasemukela sifundvo seliBhayibheli, wakujabulela kufundza liciniso futsi wenta tingucuko letinyenti ekuphileni kwakhe. Hannah utsi: “Ngemuva kwesifundvo ngasinye, njengobe siphuma ekhaya lakhe sihamba ngemabhayisikili etfu, besibukana bese sitsi: ‘Siyakubonga Jehova!’” Hannah uchubeka atsi: “Ngiyati kutsi Jehova abetamdvonsela kuye lomake nganome ngabe nguyiphi indlela, kodvwa ngesizatfu sekutsi besikhonta lapho kunesidzingo lesikhulu khona, sakhona kumtfola futsi samsita kute ati Jehova. Loku ngulokunye kwalokuhlangenwe nako lokujabulisa kakhulu lesikutfolile ekuphileni kwetfu!” Njengobe Erica asho: “Nawusita umuntfu kutsi ati Jehova, uvuna injabulo longeke uyicatsanise nalutfo!”

Etindzaweni letinyenti, kunesidzingo lesikhulu sebashumayeli beMbuso. Ungaba yini semkhatsini walabo labatfutsele kulenye indzawo ledzinga lusito? Cela kuJehova ngemthantazo kutsi acinise sifiso sakho sekwandzisa umsebenti wakho wekushumayela. Khuluma ngalendzaba nalabadzala belibandla lokulo, nembonisi wesifundza nobe nalabo labajabulele lilungelo lekukhonta etindzaweni letidzinga lusito. Nawusahlela, bhalela ligatja lelinakekela lendzawo longatsandza kuyewukhonta kuyo futsi ucele imininingwane. * Mhlawumbe nawe ungaba semkhatsini waletinkhulungwane tebazalwane nabodzadze labancane nalabadzala, labashadile nalabangakashadi labatinikela ngekutitsandzela futsi bativele bona injabulo ‘yekuvuna kakhulu.’