Nangabe sichubeka sifundza ngebuntfu balotsite, sibese simati kahle loyo muntfu futsi nebungani betfu naye buyacina. Kuyafanana nangaJehova, nangabe sati lokunyenti ngebuntfu bakhe sibese simati kancono kutsi ungumuntfu lonjani futsi buhlobo betfu naye buyacina. Kuto tonkhe timfanelo taNkulunkulu, tine letihamba embili: Ngemandla, kuhlakanipha, bulungisa kanye nelutsandvo.

“Awu, Nkhosi Simakadze, wena wenta emazulu nemhlaba ngemandla akho lamakhulu.”—JEREMIYA 32:17.

Bufakazi bemandla aNkulunkulu sibubona endalweni yakhe. Nasi sibonelo, nangabe ume ngephandle emini libalele, uvani esikhumbeni sakho? Uva kushisa kwelilanga. Ecinisweni usuke uva umphumela wemandla aJehova ekudala. Linemandla kangakanani lilanga? Bososayensi batsi kushisa kwalo kulinganiselwa ku-15 000 000°C (27 000 000 degrees Fahrenheit). Njalo ngemzuzu, lilanga likhipha emandla lalingana nekuchuma kwemabhomu e-nuclear latitigidzigidzi.

Noma kunjalo, lilanga letfu lincane nalicatsaniswa netinkhanyeti letitigidzigidzi letisesibhakabhakeni. Bososayensi balinganisela kutsi bubanti bayinye yetinkhanyeti letinkhulu lebitwa ngekutsi yi-UY Scuti bungalingana nebukhulu belilanga naliphindvwe ka-1 700. Uma bewungatsatsa i-UY Scuti, uyibeke endzaweni yelilanga, beyingambonya wonkhe umhlaba ize iyewufika lapho kune-Jupiter khona. Mhlawumbe loku kungasisita siwacondze kancono emavi aJeremiya latsi  Jehova wadala emazulu nemhlaba, nako konkhe lokukhona ngemandla akhe lamakhulu.

Sizuza kanjani emandleni aNkulunkulu? Kuphila kwetfu kusekelwa yindalo yaNkulunkulu, lefaka ekhatsi lilanga kanye nato tonkhe tintfo letilusito emhlabeni. Ngetulu kwaloko, Nkulunkulu usebentisa emandla akhe kute umuntfu ngamunye azuze. Kanjani? Ngesikhatsi Jesu aphila lapha emhlabeni, Nkulunkulu wamniketa emandla ekwenta timangaliso. UmBhalo utsi: “Timphumphutse setiyabona, tinchute setihamba kahle, labanebulephelo bayahlanjululwa, tihhulu setiyeva, labafile bayavuswa.” (Matewu 11:5) Kutsiwani ngesikhatsi salamuhla? LiBhayibheli litsi: “Ubapha emandla labo labakhatsele,” futsi lichubeka litsi: “Labo labetsembele kuSimakadze batfola emandla lamasha.” (Isaya 40:29, 31) Nkulunkulu angasinika “emandla lamakhulu kakhulu” kute sikhone kubhekana nobe sibeketelele tinkinga netilingo ekuphileni. (2 Khorinte 4:7) Asingabati kutsi nawe uyafuna kuba nebuhlobo naNkulunkulu lositsandza kangangekutsi uze asebentise emandla akhe lamakhulu kuze kuzuze tsine.

“Awu, Simakadze! Maye, minyenti imisebenti yakho! Yonkhe uyente ngekuhlakanipha.”—TIHLABELELO 104:24.

Nasichubeka sifundza kabanti ngetintfo letidalwe nguNkulunkulu, kuba kunyenti lokusimangalisako ngekuhlakanipha kwakhe. Kunelucwaningo lwabososayensi lapho bahlolisisa khona tintfo letidalwe nguJehova bese bakopa indlela latidale ngayo kuze bakhe tabo tintfo. Lolucwaningo lubitwa ngekutsi yi-biomimetics nobe i-biomimicry. Loku kusukela ekwakheni tintfo tekufasa kuya ekwakhiweni kwetindiza.

Kuhlakanipha kwaNkulunkulu kuphindze kubonakale nakakhulu endleleni ladale ngayo umtimba wemuntfu. Cabanga ngendlela umtimba wemntfwana lokhula ngayo. Loku kucala ngelingcamutane lelincane lelakheka nakuhlangana babe namake. Lelingcamutane lisuke linayo yonkhe imininingwane yetakhi telufuto letidzingekile. Lelongcamutane libese lehlukana ekhatsi liba ngemangcamutane lamanyenti lafananako. Lamangcamutane abese acala kwakhekha abe ngemangcamutane lamanyenti lahlukahlukene njengemangcamutane engati, emangcamutane emsipha kanye nemangcamutane ematsambo. Ngekushesha nje bese kucala kwakheka titfo temtimba, bese ticala kusebenta. Ngetinyanga letiyimfica nje, lelingcamutane lekucala libese liba ngumntfwana lophelele lowakhiwe ngemangcamutane latigidzigidzi. Lokuhlakanipha lesikubona kuloku lesicoce ngako kwenta bantfu labanyenti bavumelane nalamavi embhali weliBhayibheli latsi: “Ngiyakudvumisa ngobe ngentiwe ngendlela leyesabekako nalemangalisako.”—Tihlabelelo 139:14.

Sizuza njani ekuhlakanipheni kwaNkulunkulu? UMdali uyati kutsi yini lesiyidzingako kuze sijabule. Ngenca yekutsi unelwati lolunyenti futsi usati kahle, usiniketa seluleko lesihlakaniphile lesiseVini lakhe liBhayibheli. Nasi sibonelo, liBhayibheli litsi: “Chubekani . . . nitsetselelana ngekukhululeka.” (Kholose 3:13) Siyasita yini leseluleko? Yebo, siyasita. Bodokotela batfole kutsi kucolela kungenta umuntfu alale kahle futsi kwehlise sifo sekushaya kakhulu kwemitsambo yengati. Kungaphindze kwehlise ingoti yekucindzeteleka kanye naletinye tifo. Nkulunkulu ufanana nemngani lohlakaniphile nalokukhatsalelako longayekeli kukusita nekukuniketa seluleko lesilusito. (2 Thimothi 3:16, 17) Angeke sewutsandze yini kuba nemngani lofana nalona?

“Simakadze uyakutsandza kwenta tintfo ngendlela lefanele.”​—TIHLABELELO 37:28.

Nkulunkulu wenta lokulungile ngaso sonkhe sikhatsi. LiBhayibheli litsi: “Akube khashane naNkulunkulu kuba ngumenti walokubi, kwenta bubi akube khashane naSomandla.” (Jobe 34:10) Tehlulelo takhe tilungile, kunjengobe nje umhlabeli asho lamavi nakakhuluma naJehova: “Ngobe wehlulela tive ngebucotfo.” (Tihlabelelo 67:4) Ngesizatfu sekutsi “Jehova ubuka inhlitiyo,” uyakhona kubona kutentisa futsi uyakhona nekubona liciniso bese wehlulela ngendlela lelungile. (1 Samuweli 16:7) Ngetulu kwaloko, Nkulunkulu uyatibona tintfo letilungile letentiwa bantfu kanye nekukhohlakala lokwenteka emhlabeni, futsi wetsembisa nekutsi bantfu “lababi bayawususwa eveni.”—Taga 2:22.

Nobe kunjalo, Nkulunkulu akasuye umehluleli lonelunya lohlale agadze kujezisa bantfu. Unemusa nangabe kudzingeka. LiBhayibheli litsi: “Simakadze unemusa nesihawu,” ngisho nakubantfu lababi, nangabe baphendvuka ngebucotfo. Loko akusiko yini kwehlulela ngeliciniso?—Tihlabelelo 103:8; 2 Phetro 3:9.

Kusizuzisa njani kwehlulela kwaNkulunkulu ngekulunga? Umphostoli Phetro watsi: “Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.” (Imisebenti 10:34, 35) Siyazuza ekwahluleleni kwaNkulunkulu ngekulunga ngobe akakhetsi muntfu nobe libala lemuntfu. Singemukeleka kuye futsi sibe tikhonti takhe ngisho nobe sinelibala lelehlukile, buve lobehlukile, sifundze ngelizinga lelingafanani nobe sinjingile nobe siphuyile.

Ngesizatfu sekutsi Nkulunkulu ufuna siyicondze kahle indlela yakhe yekwehlulela, usiphe bonembeza. ImiBhalo ichaza kutsi nembeza usebenta njengemtsetfo ‘lobhalwe etinhlitiyweni tetfu, losiniketa bufakazi’ nangabe senta lokulungile nobe usilahle nasente lokungakalungi. (Roma 2:15) Kusisita ngani loko? Nangabe bonembeza betfu baceceshwe kahle, bangasikhutsata kutsi sishiye tintfo letingasilimata netento letingakalungi. Nasenta liphutsa, lonembeza ungasenta siphendvuke  bese siyalungisa lapho sone khona. Asingabati kutsi kwati indlela yaNkulunkulu yekwehlulela ngekulunga kuyasisita futsi kusenta sisondzele kuye!

“Nkulunkulu ulutsandvo.”—1 JOHANE 4:8.

Nanobe Nkulunkulu anemandla, kuhlanipha nebulungisa, liBhayibheli alimbiti ngekutsi ungemandla, ukuhlakanipha nobe ubulungisa. Kunaloko, liBhayibheli litsi ulutsandvo. Kungani lisho njalo? Sizatfu kutsi emandla akhe ngiwo lawasebentisako kuze atsatse sinyatselo futsi bulungisa kanye nekuhlakanipha kwakhe kucondzisa loko lakwentako. Lutsandvo lwakhe ngilo lolumchubako kuze ente nobe ngabe yini. Ngako lutsandvo ngilo lolulawula konkhe lakwentako.

Jehova bekangadzingi lutfo, kodvwa lutsandvo lwakhe ngilo lolwamenta wadala tidalwa letihlakaniphile ezulwini nasemhlabeni. Letidalwa tiyazuza kulolutsandvo lwakhe futsi tijabulela kunakekelwa nguye. Walungiselela umhlaba kutsi ube likhaya lelikahle labo bonkhe bantfu. Nalamuhla usabatsandza bantfu ngobe “wenta lilanga liphumele bantfu lababi nalabahle, aphindze ente imvula inele bantfu labalungile nalabangakalungi.”—Matewu 5:45.

Ngetulu kwaloko, “Jehova unelutsandvo lolukhulu kanye nemusa.” (Jakobe 5:11) Uyabatsandza bantfu labatsatsa tinyatselo tekumati kancono baphindze basondzele kuye. Kulabanjalo, Nkulunkulu unakekela sidzingo semuntfu ngamunye. Ecinisweni liBhayibheli litsi “uyanikhatsalela.”—1 Phetro 5:7.

Lusisita Njani Lutsandvo LwaNkulunkulu? Siyabujabulela buhle bekushona kwelilanga. Siyachazeka nasibona umntfwana ahleka. Kumnandzi kusondzelana kwemalunga emndeni. Letintfo tingabonakala titincane, kodvwa tenta imphilo yetfu ibe mnandzi.

Siphindze sizuze nasithantaza, lokungulenye yetindlela Nkulunkulu lakhombisa ngayo kutsi uyasitsandza. LiBhayibheli litsi: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga.” Njengababe lonelutsandvo, Nkulunkulu ufuna sicele lusito lwakhe nangabe sibhekene netinkinga letimatima. Ngelutsandvo lwakhe lolute umona, Jehova usetsembisa “kuthula kwaNkulunkulu lokwendlula konkhe kucondza.”—Filiphi 4:6, 7.

Letimfanelo taNkulunkulu letiyinhloko lesesicoce ngato letifaka ekhatsi emandla, kuhlakanipha, bulungisa kanye nelutsandvo, atikakusiti yini wabona kancono kutsi Nkulunkulu unjani? Kute uchubeke ubonga Nkulunkulu, sicela kutsi ufundze ngaloko lakwentile nangaloko latakwentela bantfu.