Sigungu Lesibusako silicembu lelincane lemaKhristu lavutsiwe laniketa ticondziso kuBoFakazi BaJehova emhlabeni wonkhe. Umsebenti waso uhlukene kabili:

•   Bengamela kulungiselelwa kweticondziso letisekelwe eBhayibhelini kusetjentiswa tincwadzi, imihlangano kanye netikolwa taBoFakazi BaJehova.​—Lukha 12:42.

•   Bengamela umsebenti waBoFakazi BaJehova emhlabeni wonkhe ngekucondzisa umsebenti wekushumayela baphindze babuke indlela iminikelo lesetjentiswa ngayo.

 Sigungu lesibusako silandzela sibonelo sangelikhulu lekucala ‘sebaphostoli nesemadvodza lamadzala aseJerusalema,’ lenta tincumo letibalulekile lebetitsintsa lonkhe libandla lebuKhristu. (Imisebenti 15:2) Njengalamadvodza letsembekile, emalunga eSigungu Lesibusako awasibo baholi benhlangano yetfu. Bafuna sicondziso eBhayibhelini, bavuma kutsi Jehova Nkulunkulu umise Jesu Khristu kutsi abe yiNhloko yelibandla.​—1 KubaseKhorinte 11:3; Kubase-Efesu 5:23.

 Emalunga eSigungu Lesibusako ngu-Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, kanye na-Jeffrey Winder. Basebenta endlunkulu yetfu leseWarwick, eNew York, e-U.S.A.

 Sigungu Lesibusako simise emakomidi lasitfupha lengamela tincenye letehlukahlukene temsebenti wetfu, futsi ikomidi ngayinye inelilunga leSigungu Lesibusako linye nobe ngetulu.

•   Ikomidi Yebachumanisi: Yengamela tindzaba temtsetfo, isite nakuvele tehlakalo, isite nalapho BoFakazi BaJehova bahlushwa ngenca yaloko labakukholelwako, iphindze isite nasetindzabeni letiphutfumako letitsintsa BoFakazi BaJehova.

•   Ikomidi Yetisebenti: Yengamela tintfo letiphatselene nemndeni waseBethel.

•   Ikomidi Yekushicilela: Yengalema kukhicitwa nekuhanjiswa kwetincwadzi letisekelwe eBhayibhelini, kwakhiwa kwetindzawo tekuhlanganela, emahhovisi ekuhumusha kanye netakhiwo teligatja.

•   Ikomidi Yemsebenti: Yengalema umsebenti wetfu wekushumayela ‘tindzaba letimnandzi teMbuso.’​—Matewu 24:14.

•   Ikomidi Yekufundzisa: Icondzisa kulungiselelwa kwemfundvo levela kuNkulunkulu lesiyitfola ngemihlangano, ngetikolwa, ngalokulalelwako kanye nangema-video.

•   Ikomidi Yekubhala: Icondzisa kulungiselelwa kwemfundvo levela kuNkulunkulu lesiyitfola ngetintfo letiphrintiwe naletiku-website yetfu, iphindze yengamele umsebenti wekuhumusha.

 Ngetulu kwemsebenti lesiwenta kulamakomidi, Sigungu Lesibusako sihlangana njalo ngeliviki kuze sicabangele tidzingo tenhlangano. Kulemihlangano, lamalunga adzingidza lokushiwo yimiBhalo, avumele umoya waNkulunkulu uwacondzise futsi alwele kuphuma nelivi linye lesincumo.​—Imisebenti 15:25.

 Lawa ngemaKhristu letsembekile lasita emakomidini eSigungu Lesibusako. (1 KubaseKhorinte 4:2) Banesikhatsi lesidze nemakhono ekwenta lomsebenti lowenganyelwe ngulamakomidi labakuwo futsi babakhona kulomhlangano wemalunga eSigungu Lesibusako wamaviki onkhe. Ngisho nobe bangahlanganyeli ekwenteni tincumo, labasiti baniketa kwatiswa neteluleko letilusito, basebentise tincumo letentiwe yikomidi futsi balandzelele kusebenta kwato nemiphumela yekutisebentisa. Bangahle bacelwe Sigungu Lesibusako kutsi bavakashele bazalwane etindzaweni letehlukahlukene letisemhlabeni wonkhe nobe betfule tinkhulumo emihlanganweni yemnyaka nobe nakuphotfulwa eGiliyadi.