O LOO SAVALI SETUSETU LUZIA. Sa maua o ia i le maʻi pipili (poliomyelitis) mai i lona laʻitiiti, o se faamaʻi pipisi e faaleagaina ai neula o le tino. I le 16 o ona tausaga na faapea atu ai se fafine na ia faigaluega ai, “Ua faasalaina oe e le Atua i le maʻi pipili ona o lou lē usiusitaʻi ma lē faaaloalo i lou tinā.” I tausaga mulimuli ane na manatua pea e Luzia ona faalogona ootia na iai.

INA UA ILOA E DAMARIS UA MAUA O IA I LE KANESA O LE FAIʻAI, na fesili mai lona tamā: “O le ā lau mea ua fai ua tupu ai lenei mea iā te oe? Atonu na e faia se mea matuā leaga tele. O le māfuaaga lenā ua faasala ai oe e le Atua.” Na matuā ootia faalogona o Damaris i na faamatalaga.

Ua autausagā o talitonu tagata o faamaʻi o se faasalaga mai i le Atua. Na taʻua i le tusi Manners and Customs of Bible Lands na talitonu le toʻatele i taimi o Iesu “e māfua ona iai faamaʻi ona o le agasala a se tagata maʻi, po o ona tauaiga, ma o le faasalaga lenā mo lana agasala.” Na taʻua foʻi i le tusi Medieval Medicine and the Plague, i le pe ā ma le 800 tausaga ua mavae “na talitonu nisi tagata na aumaia e le Atua faamaʻi oti e faasalaina ai i latou mo a latou agasala.” O lea, ina ua feoti le faitau miliona o tagata i Europa i se faamaʻi oti i le senituri lona 14, po o lona uiga la na faaoo mai e le Atua lana sala faafaamasinoga i tagata leaga? Pe sa māfua ona o se siama e pei ona taʻua i suʻesuʻega a fomaʻi? E tomānatu nisi pe e faaaogā e le Atua faamaʻi e faasala ai tagata ona o a latou agasala? *

IA MĀTAU: Pe afai o se faasalaga mai i le Atua faamaʻi ma mafatiaga, aiseā na faamālōlōina ai e lona Alo o Iesu tagata mamaʻi? Pe afai o lea, po ua faalēaogāina ai la le faamasinotonu ma le amiotonu o Ieova? (Mataio 4:23, 24) E lē taitai feteenaʻi gaoioiga a Iesu ma le Atua. Na ia faapea mai: “Ou te faia pea mea e fiafia i ai lona finagalo,” ma “ua tuuina mai e le Tamā iā te aʻu poloaʻiga ina ia ou faia, o lea ua ou faia ai.”​—Ioane 8:29; 14:31.

E manino faamatalaga a le Tusi Paia: “E lē o iā te ia [Ieova le Atua] se faiga lē tonu.” (Teuteronome 32:4) Mo se faataʻitaʻiga, e lē taitai finagalo le Atua e tupu se faalavelave tau vaalele, ina ia fasiotia ai le faitau selau o tagata lē sala ona e manaʻo e faasala se tagata se toʻatasi. Na faamaonia mai e Aperaamo o se auauna faamaoni a Ieova lana amiotonu ina ua ia faapea mai, e lē taitai ona ia “faaumatia o ē e amiotonu faatasi ma ē e amioleaga.” Na ia taʻua atili ʻe lē taitai ona finagalo’ Ieova e tupu lenā mea. (Kenese 18:23, 25) O loo taʻua foʻi i le Tusi Paia, “e lē faia e le Atua se mea leaga” ma e na te lē faia foʻi “se mea e lē tonu.”​—Iopu 34:10-12.

O mafatiaga o loo tatou mafatia ai e lē o se faasalaga mo a tatou agasala. E manino faamatalaga a Iesu i lenei mataupu ina ua ia vaaia ma le ʻauaposetolo se tamāloa tauaso talu ona fanau mai. “Ua fesili mai ona soo iā te ia: ʻLe Aʻoaʻo e, o ai na agasala, o le tamāloa lenei po o ona mātua, auā na fanau mai lava o ia ua tauaso?’ Ua tali atu Iesu: ʻE leʻi agasala lenei tamāloa po o ona mātua, ae ina ia faaalia ai galuega a le Atua e ala iā te ia.’”​—Ioane 9:1-3.

Ona o le taatele o talitonuga sesē, atonu na faateʻia soo o Iesu ina ua ia taʻua e lē o le tamāloa po o ona mātua na agasala, ua māfua ai lenei tulaga. E lē gata na faamālōlō e Iesu le tamāloa tauaso ae  o lona faia faapea na ia faalēaogāina ai foʻi talitonuga sesē, o mafatiaga o se faasalaga mai i le Atua. (Ioane 9:6, 7) E mafai e i latou uma o loo mafatia i aso nei ona maua faamāfanafanaga i le iloaina e lē o le Atua le māfuaaga o nei tulaga.

Ua faamautinoa mai e le Tusi Paia

• “E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (IAKOPO 1:13) E mautinoa e lē o toe umi ona aveesea lea o “mea leaga” ua mafatia ai tagata i le tele o senituri e aofia ai faamaʻi, tigā ma le oti.

• Na “ia [Iesu] faamālōlō foʻi i latou uma ua mamaʻi tigāina.” (MATAIO 8:16) O le faia faapea e le Alo o le Atua, na ia faataʻitaʻia mai ai le mea o le a faia e le Malo o le Atua i le lalolagi uma.

• “E na te [le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”​—FAAALIGA 21:3-5.

Aiseā la ua matuā aafia ai tagata i le tele o tigā ma mafatiaga? Ua tele tausaga o tuufesili tagata i lenā fesili. Pe afai e lē tuuaʻia le Atua, o ai la e tuuaʻia? O le a taliina lenā fesili i le mataupu o loo sosoo mai.