Ua foafoaina e le Atua o tatou tino i se auala mataʻina e mafai ai ona toe faaleleia e le tino o ia lava. Pe a lavea, maʻosia pe tuia se vaega o o tatou tino, “e amata e le tino se gaoioiga lavelave ina ia toe faaleleia ai se manuʻa e tusa pe itiiti pe telē.” (Johns Hopkins Medicine) E vave ona gaoioi le tino e taofia le alu o le toto, faafefete alātoto ma faaleleia le vaega ua lavea.

IA MĀTAU: Pe afai na foafoaina o tatou tino i se auala e mafai ona toe faaleleia ai se manuʻa, pe e tatou te lē mautinoa la i le fesoasoani a Ieova i o tatou faalogona ootia? Ua taʻua e le faisalamo, “Ua faamālōlō e ia o ē ua loto momomo ma fusifusia o latou manuʻa tigā.” (Salamo 147:3) Peitaʻi pe afai o loo e feagai ma faalogona ootia, e faapefea ona e mautinoa e fusifusia e Ieova ou manuʻa i le taimi nei ma le lumanaʻi?

Ua folafola mai e le Atua e faapea, “Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe.”(Isaia 41:10) O le iloaina e se tasi e manatu mamafa mai Ieova, e mafai ona ia maua ai le filemu o le mafaufau ma le malosi e feagai ai ma so o se faafitauli. Na taʻua e Paulo o lenei filemu, o le “filemu mai i le Atua, e silisili i mea uma lava e manatu i ai.” Na ia toe faapea mai: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”​—Filipi 4:4-7, 9, 13.

Ua fesoasoani mai le Tusi Paia ina ia atiaʻe lo tatou faatuatua i folafolaga a Ieova mo le lumanaʻi o tagata. Mo se faataʻitaʻiga, i le Faaaliga 21:4, 5 o loo faamatala mai ai po o le ā o le a faia e Ieova ma aiseā e mafai ai ona tatou faatuatuaina o ia:

• “E na te soloiesea foʻi loimata uma” o tagata. O le a aveesea e Ieova o tatou mafatiaga ma popolega uma, e ui lava e foliga mai e faatauvaa i isi.

• O le a faaaogā e le Tupu o Lē e ona le malosi uma lava, “o loo afio i le nofoālii” i le lagi, lona mana ma le pule e taofia ai mafatiaga ma aumaia le fesoasoani e tatou te manaʻomia.

• Ua faamautinoa mai e Ieova e “moni ma faamaoni” ana folafolaga. Ua ia faamautinoa mai foʻi i lona suafa ma lona mamalu le faataunuuina o ana folafolaga.

“ʻE na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’ Ona fetalai mai lea o Lē o loo afio i le nofoālii: ʻFaauta! Ou te faia ia fou mea uma lava.’ Ua ia toe fetalai mai foʻi: ʻIa tusi, auā o upu nei e faamaoni ma moni.’”​—Faaaliga 21:4, 5.

Ua faaalia e le vateatea ma le Tusi Paia uiga o lo tatou Tamā i le lagi. E ui ua faaalia mai e le foafoaga se valaaulia mo le lautele ina ia faamasani i le Atua o se Uō māfana, ae ua aumaia foʻi e le Tusi Paia se valaaulia mo tagata taʻitoʻatasi e ala i le faapea mai: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) O loo taʻua foʻi i le Galuega 17:27: “E lē o mamao o ia mai iā i tatou taʻitoʻatasi.”

A o faaauau pea ona e aʻoaʻoina e faatatau iā Ieova, o le a atili ai foʻi ona e mautinoa ʻo loo manatu mamafa mai o ia iā te oe.’ (1 Peteru 5:7) O ā ni aogā o lo tatou faatuatuaina o Ieova?

Seʻi mātau le faaaʻoaʻoga a Toru mai i Iapani. Na tausia aʻe o ia e se tinā Kerisiano, peitaʻi na auai o ia i se kegi sauā i Iapani ua taʻua o le yakuza. Na ia taʻua, “Na ou talitonu e inoino le Atua iā te aʻu ma na ou manatu o le maliliu o ē na matou aumea faatasi, aemaise i latou na pele iā te aʻu o laʻu faasalaga lea.” Na taʻua foʻi e Toru o lenei siʻomaga sauā ma ona uiga leaga, na avea ai o ia “o se tagata e leai ni faalogona alofa.” Na faapea mai o ia e faatatau i ona faanaunauga, “Ina ua ou fasiotia se tagata e sili atu ona lauiloa iā te aʻu na ou manaʻo ou te oti e ui i loʻu laʻitiiti ina ia lauiloa ai loʻu igoa.”

 Peitaʻi, ina ua suʻesuʻeina e Toru le Tusi Paia faatasi ma lana avā o Hannah, na ia faia ai ni suiga mataʻina i lona olaga ma ona uiga. Na taʻua e Hannah, “Na ou vaaitino lava i suiga o laʻu tane.” O lea ua faapea mai Toru ma le mautinoa: “O loo iai moni se Atua e manatu mamafa mai iā i tatou. E lē finagalo o ia e oti se tasi, ae e nofosauni e faamagalo i latou e salamō moni mai i a latou mea sesē. E na te faafofoga mai foʻi i mea e lē mafai ona tatou taʻu i isi, ma e na o ia e malamalama iai. E lē o toe umi ona aveesea lea e Ieova faafitauli, mafatiaga ma tigā uma. E oo lava i le taimi nei, o loo fesoasoani mai o ia i auala e tatou te lē faatalitalia. E alofa ma fesoasoani mai pe a tatou vaivai.”​—Salamo 136:23.

Ua faaalia i le faaaʻoaʻoga a Toru, o le iloaina e mafai e le Atua ma ua lē o toe umi ona ia aveesea lea o mala ma soloiesea loimata uma, e lē gata e aumaia ai se faamoemoe mautinoa i le lumanaʻi ae e fesoasoani foʻi i o tatou olaga i aso nei. Ioe, e ui ua tumu lenei lalolagi i mafatiaga, ae e mafai ona e maua aogā mai i le alofa o le Atua.