O le ā le Manatu o le Tusi Paia e Faatatau i Faamaʻi Pipisi e Aafia ai le Lalolagi Atoa?

PLAY

Tali a le Tusi Paia

Na valoia e le Tusi Paia o le a i ai faamaʻi (faamaʻi pipisi, e aofia ai faamaʻi ua pesia ai le lalolagi) i aso e gata ai. (Luka 21:11) O na faamaʻi e lē o se faasalaga mai le Atua. O le mea moni, ua toeitiiti ona tafiesea lea e le Atua o faafitauli tau soifua mālōlōina e aofia ai ma faamaʻi, e ala i lona Malo.

Pe na valoia e le Tusi Paia o le a aafia le lalolagi atoa i faamaʻi pipisi?

E leʻi valoia patino e le Tusi Paia o le a iai faamaʻi pipisi e pei o le KOVITI-19, AIDS po o le fulū Sepania. Ae na valoia e le Tusi Paia “faamaʻi” ma “faamaʻi oti.” (Luka 21:11; Faaaliga 6:8) O faamaʻi o se vala o le faailoga o “aso e gata ai” po o le “taufaaiʻuiʻuga o le faiga o mea a le lalolagi.”—2 Timoteo 3:1; Mataio 24:3.

Pe na faasalaina e le Atua tagata i faamaʻi?

O loo taʻua i le Tusi Paia ni taimi na faasala ai e le Atua tagata i faamaʻi. O se faaaʻoaʻoga, na ia faatupuina le lepela i nisi. (Numera 12:1-16; 2 Tupu 5:20-27; 2 Nofoaiga a Tupu 26:16-21) Peitaʻi, e na o na tagata na aafia ai ae e leʻi sosolo atu o ni faamaʻi pipisi i le lalolagi atoa ma aafia ai tagata lē sala. O na mea na tutupu o ni faasalaga mo tagata na matuā tetee i le Atua.

Po o se faasalaga mai le Atua faamaʻi pipisi i le lalolagi atoa i aso nei?

E leai. E manatu nisi tagata ua faaaogā e le Atua faamaʻi pipisi i le lalolagi atoa ma isi faamaʻi e faasala ai tagata i aso nei. Peitaʻi, e lē lagolagoina e le Tusi Paia lenā manatu. Aiseā?

Ona na aafia nisi o tagata tapuaʻi i le Atua i aso ua mavae i faamaʻi ma ua aafia foʻi nisi i aso nei. O se faaaʻoaʻoga, na aafia le soo faamaoni o Timoteo i se “maʻi e tupu soo.” (1 Timoteo 5:23) Peitaʻi e lē o faapea mai le Tusi Paia o se faailoga lenā o le lē fiafia o le finagalo o le Atua iā Timoteo. I aso nei, ua aafia foʻi nisi o auauna faamaoni a le Atua i maʻi ma faamaʻi. O le tele o taimi o nei aafiaga e tutupu faafuaseʻi e aunoa ma le mafaufauina.—Failauga 9:11.

O loo aʻoaʻoina i le Tusi Paia e leʻi oo i le taimi a le Atua e faaumatia ai tagata amioleaga. Ae ua tatou ola i le “aso . . . o le faaolataga” o le taimi o loo faasafua mai ai e le Atua lana valaaulia i tagata uma ina ia iai se faiā vavalalata ma ia ma faaolaina ai. (2 Korinito 6:2) O se tasi o auala ua faasafua atu ai lenā valaaulia, e ala i le talaʻia o le “tala lelei o le Malo” i le lalolagi aoao.—Mataio 24:14.

Po o le a faaiʻuina faamaʻi pipisi i le lalolagi atoa?

Ioe. Ua valoia e le Tusi Paia, ua toeitiiti ona lē toe iai lea o se tasi e maʻi. O le a foʻia e le Atua maʻi uma e ala i lona Malo. (Isaia 33:24; 35:5, 6) O le a ia soloiesea le oti, faanoanoa, ma le tagiauē. (Faaaliga 21:4) I lana pulega, o le a ia toe faatutūina mai i latou ua maliliu ina ia latou olioli i se olaga soifua mālōlōina lelei i luga o le lalolagi i se tulaga lelei atoatoa.—Salamo 37:29; Galuega 24:15.

O mau e faatatau i faamaʻi

Mataio 4:23: “Ona ia [Iesu] femalagaaʻi lea i Kalilaia uma, ua aʻoaʻo atu i o latou sunako ma talaʻi atu le tala lelei o le malo, ma faamālōlō i faamaʻi eseese uma ma maʻi tigā eseese uma o tagata.”

Uiga: O vavega na faia e Iesu ua na o se faaataga itiiti lenā o mea ua toeitiiti ona faia lea e le Malo o le Atua mo tagata.

Luka 21:11: “O le a iai . . . faamaʻi.”

Uiga: O faamaʻi pipisi o se vala o le faailoga o aso e gata ai.

Faaaliga 6:8: “Faauta foʻi! o le solofanua samasama vaivai; ma lē o loo tiʻetiʻe ai ua igoa ia o le Oti. Ua mulimuli atu i ona tua le Tuugamau. Ua tuuina atu i ai le pule . . . ina ia fasiotia . . . i le faamaʻi oti.”

Uiga: O le valoaga e faatatau i tagata tiʻetiʻe solofanua i le faaaliga ua faaalia ai o le a tutupu faamaʻi pipisi i le lalolagi atoa i o tatou aso.