O isi meaalofa e tāua ona sa aumai e se tasi e iai le tulaga pule po o se tasi e tatou te faaaloalogia. Peitaʻi o isi meaalofa, e ui e lē taugatā ae e faatāua ona e aumai i se tauaiga pele po o se uō maufaatuatuaina. O le tulaga lenā i le meaalofa a Russell iā Jordan lea na taʻua i le mataupu ua mavae. E faapefea ona faatatau lea tulaga i le meaalofa o le togiola?

Muamua ua faapea mai le Tusi Paia: “Na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia.” (1 Ioane 4:9) O lenā faamatalaga moni, ua matuā tāua ai lenei meaalofa. E leai se tasi e sili atu lana pule nai lo o le Atua. Na tusi se faisalamo Eperu e faatatau i le Atua: “O oe e ou le suafa o Ieova, e na o oe lava o Lē e Silisili Ese i le lalolagi uma.” (Salamo 83:18) E leai se isi e sili atu iā Ieova o lē ua saunia mai lenā meaalofa.

Lona lua, o le Atua “o lo [tatou] Tamā.” (Isaia 63:16) I le ā le itu? Na ia foaʻi mai le ola. E lē gata i lea, e na te tausia ma le faamaoni i tatou e pei ona tausia e se tamā alofa o lana fanau. Na taʻua e le Atua nisi o ona tagata anamua o Efaraima ina ua ia fesili atu: “Po o Efaraima ea o se atalii e pele iā te aʻu, po o se tamaitiiti ou te tausi faapelepele i ai? . . . Ua tagi lava loʻu loto ona o ia. Ou te tigā alofa lava iā te ia.” (Ieremia 31:20) O faalogona foʻi na o le Atua i ona tagata tapuaʻi i aso nei. E lē gata o ia o Lē e ona le malosi uma lava na foafoaina mea, ae o ia foʻi o lo tatou Tamā ma o le Uō faamaoni. Pe e lē avea ai lenā ma itu e matuā tāua ai so o se meaalofa mai iā te ia?

E tāua isi meaalofa, talu ai sa foaʻiina mai ona o le alofa moni ae e lē ona o se mea e tatau ona fai. O se tagata e foaʻi ma le lē manatu faapito, e na te lē faatalitalia e toe tauia atu lona agalelei.

Na foaʻi mai e le Atua lona Alo ona o lona alofa iā i tatou. Ua faapea mai le Tusi Paia: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi.” Aiseā na ia faia ai faapea? “Ina ia tatou maua ai le ola e ala iā te ia.” (1 Ioane 4:9) Pe o se mea sa tatau ona faia e le Atua? E leai. O “le togiola a Keriso Iesu,” ua faaalia ai le “agalelei faifua” o le Atua.—Roma 3:24.

Aiseā ua avea ai le meaalofa a le Atua o se gaoioiga o le “agalelei faifua”? Ua taʻua i le Tusi Paia: “Ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.” (Roma 5:8) O le alofa lē manatu faapito na uunaʻia ai le Atua e gaoioi mo le lelei o ē vaivai, leai se faamoemoe ma agasala. E lē mafai ona tatou mauaina lenā alofa i a tatou lava taumafaiga, ma e lē mafai foʻi ona tatou totogiina atu. O lana meaalofa, o le faailoaga silisili lea o le alofa i le talafaasolopito.

E tāua isi meaalofa ona e telē se faataulaga na faia e lē na foaʻiina lenā meaalofa. Pe a lotomalie se tagata e foaʻi mai se mea e tautele iā te ia, o le a sili foʻi ona tatou faatāuaina lenā mea ona o le faataulaga na faia.

ʻNa foaʻi mai e le Atua lona Atalii e toʻatasi.’ (Ioane 3:16) Na ia foaʻiina mai mo i tatou lē e sili ona pele iā te ia. I le faitau piliona o tausaga na foafoaina ai e le Atua le aoao o mea, na la galulue faatasi ai ma Iesu ma avea ai o ia ma “lē na ia matuā fiafia i ai.” (Faataoto 8:30) O Iesu o le “Alo pele” o le Atua ma “ua foliga i le Atua e lē vaaia.” (Kolose 1:13-15) E leai lava se faiā e sili atu ona vavalalata e pei o le faiā a le Atua ma Iesu.

Peitaʻi, ʻe leʻi faasaoina ai e le Atua lona lava Alo.’ (Roma 8:32) Na foaʻi mai e Ieova iā i tatou lē e sili ona pele iā te ia. O le meaalofa aupito sili lea ona telē le faataulaga na faia e Ieova ina ia foaʻi mai ai.

E tāua isi meaalofa ona e faamalieina ai se manaʻoga moni, aemaise pe a tulaʻi mai se tulaga e manaʻomia vave ai. O se faataʻitaʻiga, e te faaalia le lotofaafetai i se tasi na lotomalie e totogi se togafitiga faafomaʻi e te lē gafatia, lea na faasaoina ai lou ola. O le mea moni e matuā tautele lenā meaalofa.

“E pei ona oti uma lava iā Atamu, e faapena foʻi ona toe faaolaina uma lava e ala i le Keriso.” (1 Korinito 15:22) Talu ai na tatou tupuga mai iā Atamu, e tatou te ʻfeoti’ uma ma e lē mafai ona sao mai i tigā o le maʻi ma le oti, pe e toe maua se leleiga ma le Atua ma lē nofosala ai i lana silafaga. I le avea ai o ni tagata faatauvaa, e lē mafai ona tatou “faaolaina” i tatou lava po o so o se isi. Ua faapea mai le Tusi Paia: “E leai se tasi o i latou e mafai ona laveaʻi i lona uso, e lē mafai foʻi ona avatu i le Atua se togiola mo ia . . . Ua lē mafaia lava e oo i le faavavau.” (Salamo 49:7, 8) E tatou te matuā manaʻomia le fesoasoani, talu ai e lē mafai ona tatou totogiina le tau o le togiola. Pe ana leai le fesoasoani a Ieova, semanū e leai so tatou faamoemoe.

O le alofa tele o Ieova na ia lotomalie ai e totogi le “togafitiga” faasaoola lea e tatou te manaʻomia, ina ia “toe faaolaina uma” ai e ala iā Iesu. E faapefea ona faataunuu e le togiola lenā mea? ʻE faamamāina i tatou mai i agasala uma i le toto o lona Alo o Iesu.’ Ioe, o le faatuatua i le toto maligi o Iesu,  ua faamagaloina ai agasala ma maua ai le ola e faavavau. (1 Ioane 1:7; 5:13) Ae e faapefea ona aogā le togiola i ē pele iā i tatou ua maliliu? “Ua oo mai le oti ona o le tagata, ua toe faatutūina foʻi o ē ua oti ona o le tagata [Iesu].”—1 Korinito 15:21. *

E leai se isi e sili atu iā Ieova o lē na foaʻiina mai le meaalofa, ma e leai foʻi se alofa e sili atu nai lo o le alofa na saunia ai le taulaga a Iesu. E leai se tasi na faia se faataulaga e sili atu mo i tatou nai lo o Ieova le Atua. E leai se meaalofa e sili ona faamalieina ai o tatou manaʻoga, nai lo o le taulaga lea e faasaʻoloto ai i tatou mai i le agasala ma le oti. Ioe, e leai se meaalofa e tutusa lona tāua ma le tāua e lē mafaamatalaina o le togiola.