O le Tusi Muamua a Ioane 5:1-21
5 O i latou uma e talitonu o Iesu o le Keriso, ua fananau mai i latou i le Atua,+ ma o i latou uma o ē e alolofa i le Atua le tamā, e alolofa foʻi i le fanau a le Atua.
2 O le mea lea ua tatou iloa ai ua tatou alolofa i le fanau a le Atua,+ pe a tatou alolofa i le Atua ma usiusitaʻi i ana poloaʻiga.
3 Auā o le alofa lenei i le Atua, ia tatou tausi i ana poloaʻiga;+ ma e lē mamafa ana poloaʻiga,+
4 auā o i latou uma* e fananau mai i le Atua ua latou manumalo i le lalolagi.+ O le manumalo lenei ua tatou manumalo ai i le lalolagi, o lo tatou faatuatua lea.+
5 O ai sē e mafai ona manumalo i le lalolagi?+ Pe e lē o lē ea e faatuatua o Iesu o le Alo lea o le Atua?+
6 O ia lenei na afio mai e ala i le vai ma le toto, o Iesu Keriso lea, e lē na o le vai,+ ae o le vai atoa ma le toto.+ O le agaga o le molimau lea,+ auā o le agaga o le upu moni lea.
7 Auā e tolu molimau:
8 o le agaga,+ o le vai,+ ma le toto;+ ma e autasi nei mea e tolu.
9 Afai ua tatou taliaina le molimau a tagata, e sili atu la le molimau a le Atua. Auā o le molimau lenei na tuuina mai e le Atua, o le molimau na ia tuuina mai e faatatau i lona Alo.
10 O le tagata e faatuatua i le Alo o le Atua, ua i totonu iā te ia lava le molimau. O le tagata e lē faatuatua i le Atua ua ia taʻupepelo o ia,+ auā e leʻi faatuatua o ia i le molimau na tuuina mai e le Atua e faatatau i lona Alo.
11 O le molimau lenei e faapea, ua foaʻi mai e le Atua iā i tatou le ola e faavavau,+ ma o loo i lona Alo lenei ola.+
12 O lē ua autasi ma le Alo ua iā te ia lenei ola; a o lē e lē autasi ma le Alo o le Atua e lē o iā te ia lenei ola.+
13 Ua ou tusi atu i nei mea ina ia outou iloa ai o loo iā te outou le ola e faavavau,+ o outou o ē e faatuatua i le suafa o le Alo o le Atua.+
14 O le mea lenei ua tatou mautinoa ai* i le Atua,+ po o ā lava mea e tatou te talosaga atu ai e tusa ma lona finagalo, e faafofoga mai lava o ia iā i tatou.+
15 Afai foʻi e tatou te iloa e faafofoga mai o ia i so o se mea e tatou te talosaga atu ai, e tatou te iloa e maua mea na tatou talosaga ai, auā na tatou talosaga atu iā te ia.+
16 Afai e vaai atu se tasi i lona uso ua faia se agasala e lē iʻu ai i le oti, ia tatalo mo ia, ona faaolaina ai lea o ia e le Atua,+ ioe, o i latou na e lē o faia se agasala e iʻu ai i le oti. Peitaʻi, e iai le agasala e iʻu i le oti.+ Ou te lē o fai atu la iā te ia ina ia tatalo mo le tagata na faia lenā agasala.
17 O amioga lē tonu uma lava o le agasala lea,+ ae e iai le agasala e lē iʻu i le oti.
18 Ua tatou iloa o le tagata ua fanau mai i le Atua, e lē faaauau ona ia faia le agasala, ae e tausia o ia e lē ua fanau mai i le Atua,* ma e lē tago atu foʻi o lē o loo leaga iā te ia.+
19 Ua tatou iloa e mai i le Atua lava i tatou, ae o le lalolagi atoa o loo nofo toʻilalo i le pule a lē o loo leaga.+
20 Ae ua tatou iloa ua maliu mai le Alo o le Atua,+ ma ua ia foaʻi mai iā i tatou le malamalama* ina ia tatou iloa ai o lē e moni. Ua tatou autasi foʻi ma lē e moni,+ e ala i lona Alo o Iesu Keriso. O le Atua moni lenei ma o le puna o le ola e faavavau.+
21 Le fanau e, ia leoleo outou mai i tupua.+
Faamatalaga Pito i Lalo
^ Ele., “mea uma.”
^ Po o le “tatou saʻoloto ai e tautatala atu.”
^ E faasino atu iā Iesu Keriso le Alo o le Atua.
^ Ele., “le mafaufau.”
