“Na foafoaina e le Atua le lagi ma le lalolagi i le amataga.”​—Kenese 1:1.

LE MANATU O LE TUSI PAIA

I le Kenese 1:1, o loo taʻua ai na faia e le Atua le vateatea e aofia ai ma le lalolagi “i le amataga.” E ioe saienitisi i aso nei e iai le amataga o le vateatea, ma ua taʻua i nisi o a latou suʻesuʻega, ua tusa nei ma le 14 piliona tausaga talu ona iai le vateatea.

O loo taʻua foʻi i le Tusi Paia “aso” e ono na faia ai le foafoaga. Peitaʻi, e lē o taʻua ai e faapea o nei aso e taʻi 24 itula. (Kenese 1:31) O le mea moni, o loo faaaogā i le Tusi Paia le upu “aso” e faamatala ai ni taimi e eseese le uumi. O se faataʻitaʻiga, o loo taʻua le vaitaimi atoa o le foafoaga, o “le aso na faia ai e Ieova le Atua le lalolagi ma le lagi.” (Kenese 2:4) O lea la, o nei “aso” o le foafoaga na aofia ai le faitau afe o tausaga.​—Salamo 90:4.

AISEĀ E TĀUA AI?

O manatu sesē mai ē o loo suʻesuʻe i le foafoaga, e ono iʻu ai i lo tatou lē amanaʻia o le Tusi Paia. I le isi itu, afai o loo i le Tusi Paia faamatalaga maufaatuatuaina e uiga i le foafoaga, e mafai la ona e maua ai ni iʻuga lelei mai i le “atamai aogā” o loo iai.​—Faataoto 3:21.

“Ua fetalai ane le Atua: ʻIa tutupu mai i le laueleele, o meaola e tusa ma o latou ituaiga.’”​—Kenese 1:24.

LE MANATU O LE TUSI PAIA

E leʻi foafoaina e le Atua ana meafaiola i se auala patino, ona ia tuu lea o na meafaiola ina ia liua pe suia i nisi meafaiola e ese foliga. Nai lo lea, na ia foafoaina “ituaiga” eseese o laau ma meaola, lea ua toe maua mai ai isi laau ma meaola ʻe tusa ma o latou lava ituaiga.’ (Kenese 1:11, 21, 24) O le tulaga lenā o loo iai e oo mai lava i aso nei, ma ua faatumulia ai le lalolagi i “ituaiga” lava o meafaiola ia na foafoaina e le Atua i le amataga.​—Salamo 89:11.

E lē o faailoa patino mai i le Tusi Paia suiga e ono oo i ai se ituaiga o meafaiola ona o tulaga o lona siʻomaga, pe e māfua foʻi pe a feusuaʻi ni meaola o se ituaiga lava e tasi. Ua iloa mai i nisi o suʻesuʻega i aso nei le manatu e faapea, a o faagasolo le faitau afe o tausaga, ua mātauina ai e itiiti lava ni suiga ua iai i ituaiga o meaola ma laau. E ui lava la ina manatu nisi o nei suiga e māfua mai i le evolusione, peitaʻi e manino mai o nei suiga e lē faapea ua maua mai ai se isi ituaiga o meafaiola e ese mai.

AISEĀ E TĀUA AI?

O le saʻo o faamatalaga faasaienisi a le Tusi Paia e faatatau i “ituaiga” o meafaiola, ua faamaonia atili ai le saʻo aʻiaʻi o faamatalaga a le Tusi Paia e uiga i isi mea, e pei o le talafaasolopito ma valoaga.

“O oʻu lava lima na fofola ai le lagi.”​—Isaia 45:12.

LE MANATU O LE TUSI PAIA

O le Atua o le Puna o le mana po o le malosi uma. (Iopu 37:23) E tāua tele lenā manatu, auā ua iloa e saienitisi, e mafai ona suia se malosiaga ina ia maua ai ni mea faasuavaia, o kasa ma isi mea faitino. O loo taʻua i le Tusi Paia o le Atua o le Puna o le ʻmalosi mataʻutia,’ lea ua mafai ona foafoaina ai le vateatea. (Isaia 40:26) Ua folafola mai e le Atua o le a ia faaaogā lona mana ina ia faatumauina ai pea lana foafoaga, auā o loo faapea mai le Tusi Paia e tusa ai o le lā, masina, ma fetu: “Ua ia [Atua] faatūina pea i latou i aso uma lava e oo i le faavavau.”​—Salamo 148:3-6.

AISEĀ E TĀUA AI?

Na taʻua e Allan Sandage o sē e suʻesuʻe i le vateatea: “E lē mafai e le faasaienisi ona taliina fesili e sili ona lavelave. E lē mafai foʻi e le faasaienisi ona faamatala pe na faapefea ona iai le vateatea.” E lē gata e mafai e le Tusi Paia ona faamatala le foafoaga i se auala e talafeagai lelei ma le faasaienisi, ae o loo taliina ai foʻi nisi o fesili e lē mafai e le faasaienisi ona taliina, e pei o le fesili, O le ā finagalo o le Atua mo le lalolagi ma tagata? *