E tele mea na lua fiafia faatasi ai ma lau paaga a o lua leʻi faaipoipo. Peitaʻi, ina ua uma ona lua faaipoipo, na lua iloa ai e eseese o oulua manatu i le tele o mea ma ua le māfana ai le lua ulugalii. Ua oo ai foʻi ina e manatu i lau paaga o sou fili.

E mafai ona faaleleia la oulua faiā. Muamua, ia iloilo le māfuaaga o lou lē fiafia.

Tulaga moni o le olaga. E mafai ona mou atu le fiafia o se faaipoipoga, ona o faasologa masani o aso taʻitasi e pei o galuega, le tausia aʻe o fanau, ma le auala e feagai ai ma le aiga o lau paaga. E lē gata i lea, o faafitauli e leʻi faatalitalia e pei o le faalētonu o le tulaga tau tupe, po o le tausia foʻi o se tasi o le aiga ua maua i se maʻi faaumiumi.

Feeseeseaʻiga e faigatā ona foʻia. Na faigofie ona lē amanaʻia e se ulugalii a la feeseeseaʻiga a o feoaʻi. Peitaʻi ina ua uma ona faaipoipo, na la iloa ai e tele mea e eseese ai o la manatu, e pei o le auala e feutagaʻi ai, o le faasoasoaina o tupe ma le auala e foʻia ai faafitauli. O nei feeseeseaʻiga sa avea o se mea noa a o feoaʻi, a o lea ua faigatā ona taulima i totonu o le faaipoipoga.

Lē amanaʻia faalogona o le isi. A o faagasolo taimi, o le faia pea o upu ma gaoioiga lē agalelei, faapea le lē foʻia o nisi o feeseeseaʻiga, e ono iʻu atu ai i le lē toe māfana o le mafutaga a se ulugalii, pe amata ai foʻi ona tosina atu i se tasi i fafo atu o le liʻo o le faaipoipoga.

Moomooga lē taulau. A o feoaʻi se tama ma se teine, e manatu i laʻua e matuā fetaui lelei le la faigāuō ma o lana paaga lava lea mo le olaga atoa. Peitaʻi, o lenā manatu faavalea e ono iʻu atu ai i mafatiaga. Pe a aliaʻe faafitauli, o i inā e la te iloa ai le lē moni o lenā manatu, ma iʻu ai ina mafaufau ua sesē le la filifiliga.

Uaʻi atu i uiga lelei o lau paaga. Faataʻitaʻi le mea lenei: Tusi i lalo ni uiga lelei se tolu o lau paaga. Ia teu lenei lisi i tua o se tamaʻi ata o le lua faaipoipoga, po o totonu foʻi o lau telefoni feaveaʻi. Ia fai ma tilofaʻia lenei lisi i aso taʻitasi, ma toe tomānatu pe aiseā na e filifilia ai lenei tagata e avea ma au paaga. O le uaʻi atu i ona uiga lelei o le a faatupu ai le filemu, ma mafai ai ona e onosaia lua feeseeseaʻiga.​—Mataupu silisili o le Tusi Paia: Roma 14:19.

Fuafua se taimi e mafuta ai na o oulua. A o leʻi faaipoipo, e masani ona lua faaalu se taimi e mafuta ai na o oulua. Sa avea o se taimi fiafia le pōpō fou o le lua feoaʻiga. Aiseā e lē toe faia ai ni lua fuafuaga faapena? Ia fuafua se taimi ma se nofoaga e mafuta ai na o oulua. O le faia faapea e atili māfana ai le lua mafutaga, ma faigofie ai ona lua foʻia so o se feeseeseaʻiga e ono tulaʻi mai.​—Mataupu silisili o le Tusi Paia: Faataoto 5:18.

Faailoa atu ou faalogona. Pe mafai ona e faagalo ni gaoioiga ma upu e lafo atu e lau paaga e tigā ai lou loto? Pe afai e lē mafai, ia ʻalofia le faaalia atu o lou lē fiafia e ala i le lē talanoa atu i lau paaga. Ia taumafai e talanoa atu ma le agalelei e faatatau i le faafitauli i le vave e mafai ai, pe i le aso lava lenā pe a talafeagai.​—Mataupu silisili o le Tusi Paia: Efeso 4:26.

Iloilo le eseesega o ou faalogona ma faanaunauga o lau paaga. E masani lava o se gaoioiga po o se faaupuga e leʻi fuafuaina, e ono faatigā ai le tasi i le isi. O lea, ia faamautinoa atu i lau paaga e te leʻi manaʻo e faatigā iā te ia, e ala i lou faatoese atu. Pe a uma, ona lua talanoa lea i ni mea patino e tatau ona ʻalofia, ina ia lē faatigā ai le tasi i le isi e aunoa ma le iloaina. Ia mulimuli i le fautuaga mai le Tusi Paia: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa.”​—Efeso 4:32.

Aua le faatalitalia e lelei atoatoa mea uma. Ua faailoa mai e le Tusi Paia, o i latou e faaipoipo “e oo puapuaga i o latou tino.” (1 Korinito 7:28) O lea pe a aliaʻe mai feeseeseaʻiga, aua e te vave manatu ua sesē lau faaiʻuga i le filifilia o lau paaga. Nai lo lea, ia galulue faatasi ma lau paaga e foʻia na feeseeseaʻiga, ma “ia faaauau ona onosaʻi le tasi i le isi, ma ia fefaamagaloaʻi ma le lotoatoa.”​—Kolose 3:13.