E pau le faamatalaga a le Tusi Paia: “Na foafoaina e le Atua le lagi ma le lalolagi i le amataga.” (Kenese 1:1) E lē o taʻua i le Tusi Paia pe na faapefea ona foafoaina e le Atua mea uma. O lea, e tusa pe na iai se pasae telē ma maua mai ai lo tatou vateatea, ae e lē faapea ai ua feteenaʻi ma le manatu o le Tusi Paia. Nai lo o lea, ua iloa mai i le Kenese 1:1 po o ai na faapogaia lenā pasae telē.

E talitonu le toʻatele o saienitisi o lenei pasae telē o se mea na tupu faafuaseʻi, ma o mea ninii na maua mai i lenei pasae telē na mulimuli ane faaputuputu i latou lava, ma maua mai ai fetu ma paneta a o faagasolo taimi. E feteenaʻi lenā manatu ma le Tusi Paia, auā ua taʻua manino i le Tusi Paia, o le vateatea o se mea na faia tuusaʻo e le Atua, e tusa pe na ala mai i se pasae telē po o se isi auala.

“Na foafoaina e le Atua le lagi ma le lalolagi i le amataga.”—Kenese 1:1.

Ioe. O loo taʻua i le Tusi Paia na foafoaina e le Atua meafaiola ʻe tusa ma o latou ituaiga.’ (Kenese 1:11, 12, 21, 24, 25) Pe e mafai ona iai ni suiga i totonu o se ituaiga? Ioe. Peitaʻi, pe e avea suiga i se ituaiga ma itu e faapea atu ai, e mafai ona suia lenā ituaiga o meafaiola ma avea ma se isi ituaiga o meafaiola? E leai.

Mātau se faaaʻoaʻoga: I le vaitausaga o le 1970, na faia ai e ni tagata ni suʻesuʻega i manulele o le segasegamauʻu e maua i atumotu o Galápagos. Na latou mātauina ai, pe a sui le tau, na faigofie i segasegamauʻu e tetelē gutu ona maua mea e ola ai. O lea, sa manatu nisi o se faamaoniga lea o le evolusione. Peitaʻi, po o se faamaoniga lenā o le evolusione, po ua na o se suiga ina ia faigofie ai i na manulele ona ola e tusa ai ma suiga i le tau? I tausaga mulimuli ane, na toe taatele ai segasegamauʻu e lāiti gutu. O lenei suʻesuʻega na manatu ai Jeffrey H. Schwartz, o se polofesa i suʻesuʻega i tagata ma aganuu, o le iai o suiga i se ituaiga o meafaiola ina ia faamasani ai i lona siʻomaga, e ono fesoasoani i lea ituaiga o meafaiola ina ia maua pea le ola e ui i suiga i tulaga o mea, “ae e lē o faapea o maua mai ai se isi meafaiola fou.”

Ua taʻua i le Tusi Paia ʻna foafoaina e le Atua mea uma lava.’ (Faaaliga 4:11) Na faatoʻā “mālōlō” o ia ina ua māeʻa ana galuega o le foafoaga. (Kenese 2:2) E manino mai la, e leʻi faia e le Atua se tamaʻi meafaiola ona mālōlō lea, ae faasolosolo ona fesuisuiaʻi lenā meafaiola mo le faitau miliona o tausaga, ma avea ai ma nisi o ituaiga o iʻa, manukī, ma tagata. * O le manatu lenā e taʻua o le macroevolution, ma ua teena ai le matafaioi a Lē na foafoaina mea, lea o loo taʻua i le Tusi Paia na ia ʻfaia le lagi ma le lalolagi, o le sami ma mea uma lava o loo iai.’—Esoto 20:11; Faaaliga 10:6.

“Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava.”—Faaaliga 4:11.

Ia aʻoaʻo atili: Ua taʻua i le Tusi Paia ʻo uiga lē vaaia o le Atua, ua vaaia lava ia talu ona foafoaina le lalolagi, ona ua mafai ona vaaia i mea na faia.’ (Roma 1:20) O le aʻoaʻoina e faatatau i le Atua e maua ai se olaga aogā, auā o loo iai sana fuafuaga alofa mo i latou uma o loo saʻili ma le faamaoni iā te ia. (Failauga 12:13; Eperu 11:6) Mo nisi faamatalaga, tagaʻi i le www.pr418.com pe faafesootaʻi Molimau a Ieova. O loo maua i le faa-Peretania: Tagaʻi i le BIBLE TEACHINGS > BIBLE QUESTIONS ANSWERED.