UIGA O MAU

Ieremia 29:11—“Ua Ou Iloa Lelei Manatu ua Ou Manatu ai iā te Outou”

PLAY

“Ua ou iloa lelei manatu ua ou manatu ai iā te outou,’ ua fetalai mai ai Ieova, a ʻo manatu o le filemu ae e lē o le malaia, ma ia avatu iā te outou se lumanaʻi ma se faamoemoe.”—Ieremia 29:11, Faaliliuga a le Lalolagi Fou.

“O aʻu nei, ua ou iloa manatu ua ou manatu ai ia te outou, o manatu i le manuia, a e le o le malaia, o loo fetalai mai ai le ALII, e foaiina atu ia te outou le iuga e i ai le faamoemoe.”—Ieremia 29:11, Tusi Paia Samoa —Lomiga 1969

Uiga o le Ieremia 29:11

Na folafola e Ieova i ona tagata tapuaʻi, o le a ia saunia mo i latou se lumanaʻi filemu. E ui na tusia nei upu mo tagata i le taimi ua teʻa, ae o loo faamatalaina fo’i i nei upu manatu o le Atua mo ona tagata i aso nei. O ia o ʻle Atua e aumaia le faamoemoe.’ (Roma 15:13) O le mea moni, na tusia e le Atua na folafolaga i le Tusi Paia, ina ia “aumaia ai le faamoemoe” mo se lumanaʻi manuia.—Roma 15:4.

Siʻomaga o le Ieremia 29:11

O nei upu o se vaega o se tusi na auina atu i tagata Isaraelu na ave faapagota i Papelonia. b (Ieremia 29:1) Na taʻu atu e le Atua iā i latou e umi se taimi o le a ave faapagota ai i latou, ma e tatau ona latou fauina fale, totō togālaau ma tausia o latou aiga. (Ieremia 29:4-9) Peitaʻi, na taʻu atu fo’i e le Atua: “Pe a atoa tausaga e fitu sefulu i Papelonia, ona ou liliu atu lea iā te outou, ma ou faataunuuina iā te outou laʻu upu lelei i le toe faafoʻisia mai o outou i (Ierusalema).” (Ieremia 29:10) O lea na faamautinoa atu ai e le Atua, e na te lē faagaloina i latou ma o le a toe foʻi i o latou aiga e pei ona latou faamoemoe i ai.—Ieremia 31:16, 17.

Na faamaoni le Atua i lana folafolaga i tagata Isaraelu. E pei ona ia folafolaina, na faatoʻilaloina Papelonia e Kuresa le tupu o Peresia. (Isaia 45:1, 2; Ieremia 51:30-32) Mulimuli ane, na faataga ai e Kuresa tagata Iutaia e toe foʻi i lo latou laueleele. Na latou toe foʻi i Ierusalema, ina ua mavae le 70 tausaga talu ona ave faapagota i latou.—2 Nofoaiga a Tupu 36:20-23; Esera 3:1.

O le faataunuuina o le folafolaga i le Ieremia 29:11, o se faamautinoaga iā i latou o loo faamoemoe i folafolaga a le Atua i aso nei. O loo aofia i nei folafolaga le filemu o le lalolagi atoa, e ala i le Malo o le Atua o loo taʻitaʻia e Iesu.—Salamo 37:10, 11, 29; Isaia 55:11; Mataio 6:10.

Manatu sesē e Faatatau i le Ieremia 29:11

Manatu sesē: E iai le “fuafuaga” faapitoa a le Atua mo tagata taʻitoʻatasi.

Mea moni: E faatagaina e le Atua tagata e fai a latou lava filifiliga i mea e fai i o latou olaga. O ana fetalaiga i le Ieremia 29:11, e mo le nuu o Isaraelu na ave faapagota i Papelonia, ma na finagalo o ia ina ia maua e lenā nuu se lumanaʻi filemu. (Ieremia 29:4) Peitaʻi, na faataga e le Atua tagata taʻitoʻatasi o lenā nuu e filifili, pe e latou te mananaʻo e maua faamanuiaga mai i Lana folafolaga pe leai. (Teuteronome 30:19, 20; Ieremia 29:32) O i latou e filifili e saʻili i le Atua, e latou te tatalo iā te ia ma le loto faamaoni.—Ieremia 29:12, 13.

Manatu sesē: E faamanuia e Ieova ona tagata tapuaʻi i ʻoa faaletino.

Mea moni: O le faaupuga “manuia” o loo i le Ieremia 29:11 i isi faaliliuga o le Tusi Paia, e faaliliuina mai i le upu Eperu e uiga atu i le “filemu, soifua mālōlōina ma le olaga sologa lelei.” Pe a fua i le siʻomaga o le mau, na folafola atu e le Atua i tagata Isaraelu na ave faapagota o le a latou maua le filemu ma se olaga lelei ae lē o se olaga e faatamaoaiga i ʻoa faaletino. O le a tumau pea ona avea i latou o se nuu ma mulimuli ane toe foʻi i Ierusalema.—Ieremia 29:4-10.

Faitau le Ieremia mataupu 29 faatasi ma faamatalaga pito i lalo ma mau faasino.

a O Ieova o le suafa o le Atua.—Salamo 83:18.

b Na taʻua e le The Expositor’s Bible Commentary e faatatau i le Ieremia 29:11 e faapea: “O se tasi lenei o folafolaga matagofie o loo i le Tusi Paia, o loo faamatalaina ai le alofa faapelepele o Yahweh [Ieova] i ona tagata na ave faapagota, ma avatu iā i latou se māfuaaga e latou te mautinoa ai o le a taunuu moni lo latou faamoemoe.”—Volume 7, itulau 360.