O le Tusi i le Faapotopotoga i Roma 15:1-33
15 A o i tatou o ē e malolosi, e tatau ona tatou tauave vaivaiga o ē e lē malolosi,+ ma aua neʻi faafiafia i o tatou lava loto.+
2 Ia taʻitasi i tatou ma faafiafia i lona tuaoi i le mea lelei, ina ia atiaʻe ai o ia.+
3 Auā e oo lava i le Keriso, e na te leʻi faafiafia i lona lava loto,+ ae e pei ona tusia: “Ua oo mai iā te aʻu taufaifaiga a ē ua faifai atu iā te oe.”+
4 Auā o mea uma na tusia i aso ua mavae, na tusia e faatonu ai i tatou,+ ina ia tatou maua le faamoemoe e ala i lo tatou tumau,+ ma le faamāfanafana mai o Tusitusiga Paia.+
5 Tau ina ia foaʻi atu iā te outou e le Atua o lē ua tatou tumau ai ma aumaia ai faamāfanafanaga, le mafaufau lava lea e tasi sa iā Keriso Iesu,
6 ina ia outou faamamaluina ma le autasi+ i le leo* e tasi le Atua, o le Tamā lea o lo tatou Alii o Iesu Keriso.
7 Ia talia e le tasi le isi,+ e faapei foʻi ona talia outou e Keriso,+ ina ia faamamaluina ai le Atua.
8 Ou te fai atu iā te outou, ua avea Keriso ma auauna a i latou ua peritomeina+ ina ia faaalia ai le faamaoni o le Atua, ma faamaonia ai foʻi folafolaga na Ia faia i o latou augātamā,+
9 ina ia faamamaluina ai foʻi e nuu ese le Atua ona o lona alofa mutimutivale.+ E pei ona tusia: “O le mea lea ou te taʻutaʻu atu ai oe i luma o atunuu, ma ou te faia foʻi pesega i lou suafa.”+
10 Ua ia toe faapea mai: “Ia olioli outou nuu uma faatasi ma lona nuu.”+
11 Ua ia toe faapea mai foʻi: “O outou nuu uma, inā vivii atu ia iā Ieova,* ma ia vivii atu tagata uma iā te ia.”+
12 Ona toe faapea mai lea o Isaia: “O le a iai le aa o Iese,+ o lē e tulaʻi e pule i nuu;+ e faamoemoe iā te ia nuu uma.”+
13 Tau ina ia faatumuina outou i le olioli uma ma le filemu e le Atua e aumaia le faamoemoe, ona ua outou faatuatua iā te ia, ina ia tupu tele* ai lo outou faamoemoe i le mana o le agaga paia.+
14 Oʻu uso e, ua ou mautinoa ua tutumu foʻi outou i le mataalofa, ua tele lo outou poto, ma ua mafai ona apoapoaʻi* atu le tasi i le isi.
15 Peitaʻi, ua ou lototele e tusi atu ina ia toe faamanatu atu nisi o mea iā te outou, ona o le agalelei faifua ua foaʻi mai e le Atua iā te aʻu
16 ina ia avea aʻu ma auauna* a Keriso Iesu i nuu ese.+ Ua ou faia le galuega paia o le folafola atu o le tala lelei a le Atua,+ ina ia ofoina atu nei nuu, o se taulaga e mālie i le Atua, lea ua faapaiaina i le agaga paia.
17 O le mea lea ua ou matuā olioli ai iā Keriso Iesu, e tusa ai ma mea e uiga i le Atua.
18 Auā ou te lē taʻu atu se mea e tasi na ou faia seʻi vaganā ai mea na faia e Keriso e ala iā te aʻu, ina ia usiusitaʻi nuu ese ona o aʻu upu ma galuega,
19 i le mana o faailoga ma mea ofoofogia*+ ma le mana o le agaga paia o le Atua, ua ou talaʻi māeʻaeʻa atu ai le tala lelei e uiga iā Keriso, mai i Ierusalema ma faataamilo e oo atu lava i Iluriko.+
20 O le mea lea ua ou tauivi ai ina ia lē folafola atu le tala lelei i mea sa taʻua ai le suafa o Keriso, ina ia ou lē atiaʻe ai i luga o se faavae a se isi tagata;
21 ae e pei ona tusia: “E vāai o ē e leʻi folafolaina atu i ai le tala e faatatau iā te ia, e malamalama foʻi o ē e leʻi faalogo.”+
22 O le mea foʻi lea, e tele taimi na taofia ai aʻu mai i le oo atu iā te outou.
23 A o lenei, ua lē o toe iai foʻi ni oganuu ou te leʻi talaʻi ai, ma e tele tausaga* na ou manaʻo ai e fia feiloaʻi ma outou.
24 O lea, pe a ou malaga atu i Sepania, ou te faamoemoe e asiasi atu iā te outou i laʻu malaga, ma ia outou momoli aʻu* i lea mea, pe a uma sa tatou faatasiga fiafia mo sina taimi.
25 A o lenei, o le a ou malaga atu i Ierusalema e auauna i le ʻaupaia.+
26 Auā ua fiafia i latou o loo i Maketonia ma Akaia e tufa atu a latou meaalofa i ē e matitiva o le ʻaupaia o loo i Ierusalema.+
27 E moni, ua fiafia i latou e fai lenā mea, ma e iai la latou tiute tauave iā i latou; auā afai na tofutofusia nuu ese i a latou mea faaleagaga, e tatau la ona latou auauna atu iā i latou i a latou meafaitino.+
28 O lea, pe a uma ona ou faia o lenei mea, ma momoli atu ma le saogalemu lenei meaalofa* iā i latou, ona ou ui atu lea iā te outou pe a ou alu atu i Sepania.
29 Ua ou iloa foʻi pe a ou alu atu iā te outou, ou te alu atu ma le tele o faamanuiaga mai iā Keriso.
30 Uso e, ou te ʻaiʻoi atu iā te outou i lo tatou Alii o Iesu Keriso atoa ma le alofa o le agaga, ia tatou finafinau faatasi e tatalo i le Atua mo aʻu,+
31 ina ia laveaʻiina aʻu+ mai i tagata lē talitonu o Iutaia, ma ia talia e le ʻaupaia laʻu auaunaga i Ierusalema,+
32 ina ia ou alu atu iā te outou ma le olioli e tusa ma le finagalo o le Atua, ona faafouina faatasi ai lea o i tatou.
33 Tau ina ia faatasi ma outou uma le Atua o lē e foaʻiina mai le filemu.+ Amene.
Faamatalaga Pito i Lalo
^ Ele., “gutu.”
^ Po o le “taumasuasua.”
^ Po o le “faatonu.”
^ Po o “auauna i le lautele.”
^ Po o “vavega.”
^ Pe atonu “ma i ni nai tausaga.”
^ Ele., “ia momoli aʻu i se vaega o le auala.”
^ Ele., “fua.”