Manjary fianakavia raiky vaovao ty olo roe lafa mpivaly. Marina fa ho teanao noho hajànao avao ty baba noho reninao, fe fa valinao koa henanizao ro tokony ho olo teanao marè ambony tany etoy. Mety ho sarotsy amy ty longonao sisany ty haneky raha zay. Fe hanampy anareo morovaly hahay ty antonony ty torolala ty Baiboly. Hifandramby soa amy ty longonareo avao nareo amy zay, sady hifankatea marè.

HOY TY BAIBOLY: “Hajao ty baba noho reninao.” (Efesianina 6:2) Mila manaja ty baba noho reninao avao iha, ndre firy tao ndre firy. Ka halino fa mila mikarakara ty baba noho reniny avao koa ty valinao, satria anaky. “Ty fitiava tsy mialona” na mamarahy, ka tsy tokony hatahotsy iha hoe ho azon-dry rafozanao ty fitiava valinao anao laha mifandramby amin-drozy ie.—1 Korintianina 13:4; Galatianina 5:26.

TOY MISY HEVITSY:

• Ka mampitombo lafa mivola raha, ohatsy hoe: “Volambolany fianakavianao reo avao aho sanandro!” na “Tsy tea neninao iaby ze kila raha ataoko!”

• Ataovo sahala baba noho reninao ty rafozanao

HOY TY BAIBOLY: “Ty lahilahy hiala amy ty babany noho ty reniny ka hitambatsy amy valiny, le ho nofotsy raiky avao rozy.” (Genesisy 2:24) Ndre fa manambaly iha, le mety mbo hieritseritsy avao ty baba noho reninao hoe mbo andraikitsin-drozy iha, mety hilitsy anatiny amy ty raha mikasiky ty fanambaleanareo rozy.

Soa laha mifanaraky nareo moravaly hoe ino ty raha azon-drozy ilira na tsy ilira. Bakeo ambaraonareo an-drozy moramora raha rezay. Ataovo mazava soa ty resaky fe ka masiaky. (Ohabolana 15:1) Ty fiambanea, fahalemeam-panahy voho ty fahari-po ro hanampy anareo hifandramby soa noho “hifampiaritsy am-pitiava” avao amy ty longonareo.—Efesianina 4:2.

TOY MISY HEVITSY:

• Laha hitanao fa militsy marè amy fiainanareo roe ty longonareo le resaho amy valinao raha zay, lafa milamindamy rey nareo

• Mifanaraha soa hoe ino ty hataonareo laha misy tsy fetezan-draha