Manitranitra ty mpivaly lafa mahazo anaky, fe sahira avao koa. Laha vo sambanareo ty niteraky, le mety ho tseriky iha fa lany amy fikarakarà ajà io any iaby ty fotoanareo noho ty herinareo. Mbo eo koa ty tsy fahampean-droro noho ty fiovà ty fihetseham-po, ka mety hiova ty fifandrambesanareo. Samby mila manao fanovà nareo morovaly mba ho afaky hikarakara ajà iny sady hifandramby soa avao. Manao akory ty hahavitànareo any zay? Afaky manoro anareo ty raha tokony hatao ty Baiboly.

HOY TY BAIBOLY: “Ty fitiava mahari-po noho soa fanahy.” Sady “tsy mila ze hahasoa ty vatany, tsy mora meloky.” (1 Korintianina 13:4, 5) Laha ampela vo sambanao niteriky iha, le tsy itsereha laha tandrena amy ananao iny eo. Mety hatao valinao tsy midary azy iha. Ka halino fa mila anao koa ie. Ampeo ie hahatsapa hoe mana ty anjarany amy fikarakarà ananareo io koa ie, le miezaha hahari-po noho soa fanahy lafa manao raha zay.

“Nareo lahilahy, miaraha mipetraky amy valinareo avao araky ty fahaiza.” (1 Petera 3:7) Tokony ho azonao soa hoe ty fikarakarà ananareo iny henanizao ro handany marè ty hery valinao. Nahazo andraikitsy vaovao ie, ka mety hiasa ty lohany, sady mety ho reraky ie na ho kivy mihintsy. Mety hasiaky aminao aza ie, fe ka taitaitsy satria “aleo olo tsy malaky meloky tany lahilahy matanjaky.” (Ohabolana 16:32) Miezaha hahay ty raha mahazo valinao, ka ameo azy ty fanampea ilàny.—Ohabolana 14:29.

TOY MISY HEVITSY:

• Ho ahy ty baba: Ampeo amy fikarakarà ajà iny valinao, ndre haly aza. Farito soa ty fotoa laninao amy raha hafa, mba hananao fotoa maro hiaraha amy valinao noho ananareo iny

• Ho ahy ty reny: Manekea lafa ta hanampy anao amy fikarakarà ajà iny valinao. Ka helofa ie, laha tsy hainy ty manao azy, fa atorò azy ty fanaova raha iny. Tokony ho soa fanahy iha lafa manao raha zay

HOY TY BAIBOLY: “Ho nofotsy raiky avao rozy.” (Genesisy 2:24) Ndre niampy raiky aza ty fianakavianareo, le tiarovo fa mbo “nofotsy raiky” avao nareo morovaly. Miezaha marè mba hahavy anareo roe hifandramby soa avao.

Nareo ampela, mahaiza misaotsy valinao amy ty fanampeany anao. Ataovo mamelombelo ty fivolananao azy. (Ohabolana 12:18) Nareo lahilahy, volano amy valinao fa teanao sady lafovily aminao ie. Derao ie amy ty fikarakarany ty fianakavia.—Ohabolana 31:10, 28.

“Sambia ty kiraidraiky hila avao, tsy ze hahasoa ty vatany fa ze hahasoa ty raiky.” (1 Korintianina 10:24) Ataovo avao ze hahasoa ty valinao. Manokàna fotoa hifampiresaha noho hifampijanjìna, voho hifanaova safà soa. Eritsereto ty raha ilà valinao. Ka tea tena amy resaky firaisa. Mivola ty Baiboly hoe: “Ao tsy hisy aminareo tsy haneky hanao adidy amim-baly, laha tsy hoe fa nifanarahanareo vasa.” (1 Korintianina 7:3-5) Mifampiresaha soa mikasiky raha zay. Laha mahaliny raha noho miezaky hifampidary ty raha mahazo ty raiky nareo, le hihasoa ty fifandrambesanareo.

TOY MISY HEVITSY:

• Ka halino ty manoka fotoa ho ahinareo roe avao

• Manaova raha malinidiniky mba hahatsapà ty valinao hoe tea azy iha, ohatsy hoe manoratsy taratasy na manome raha kelikely ho azy

HOY TY BAIBOLY: “Liany naha anakajà kelikely anao, le fa nahay ty soratsy masy iha, ka nahahendry anao ho amy ty fanavota raha io.” (2 Timoty 3:15) Eritsereto sandrany ty raha hataonao mba hampianara ty ananao. Mahay miana-draha ty ajà, ndre ie mbo an-troky ao. Hainy ty feonao sady misy vokany aminy ty fihetseham-ponao, ndre mbo tsy teraky ie. Mamakia teny ho azy ndre mbo anakajà kelikely ie. Marina fa mety tsy hisy raha hainy ty raha vakinao, fe hanampy azy raha zay mba ho tea mamaky teny lafa be.

Ka mieritseritsy hoe mbo kelikely marè ty ananao ka tsy afaky hijanjy anao. Ataovo rèny ty vavaky ataonao. (Deoteronomia 11:19) Miresaha mikasiky ty raha natao Ndranahary, ndre amy fotoa iarahanareo mihisa. (Salamo 78:3, 4) Lafa mihabe ananareo iny, le ho hainy fa tea any Jehovah iha ka hanjary tea azy koa ie.

TOY MISY HEVITSY:

• Mivavaha amy Jehovah mba hahazo fahendrea handesy mampianatsy ty ananareo

• Mieritsereta safà misy dikany bevata, le ampolimpolio amy ajà kelikely iny raha zay. Fa miana-draha sandrany ie amy zay